بيىلعى 8 ماۋسىمدا جاريالانعان QS WUR جاھاندىق رەيتينگىنىڭ قورىتىندىسى بويىنشا ءال-فارابي اتىنداعى قازاق ۇلتتىق ۋنيۆەرسيتەتى 150-ورىنعا يە بولدى. وسىعان وراي, ءبىلىم ورداسىنداعى ءال-فارابي كىتاپحاناسىندا ۋنيۆەرسيتەتكە QS رەيتينگىنىڭ سەرتيفيكاتىن سالتاناتتى تاپسىرۋ ءراسىمى ءوتتى.
ماراپاتتى تمد جانە ورتالىق ازيا ەلدەرى بويىنشا QS رەيتينگتىك اگەنتتىگىنىڭ ايماقتىق ديرەكتورى سەرگەي حريستوليۋبوۆ قازۇۋ-دىڭ باسقارما توراعاسى – رەكتورى جانسەيىت تۇيمەباەۆقا تابىستادى.
سەرگەي حريستوليۋبوۆ قازۇۋ-دىڭ سوڭعى جىلدارداعى جەتىستىكتەرىن اتاپ ءوتىپ, QS جاھاندىق رەيتينگىندەگى تالاپتارعا توقتالدى.
ء«ال-فارابي اتىنداعى قازۇۋ بيىل كوپتەگەن تالاپ بويىنشا ءوز كورسەتكىشتەرىن ەداۋىر جاقسارتتى. حالىقارالىق دەڭگەيدەگى رەيتينگتە 150-ورىنعا جايعاسۋ بۇل ۇلكەن كورسەتكىش جانە جەتىستىك. مۇنداي قازۇۋ تاريحىندا بولماعان. ۋنيۆەرسيتەتتىڭ دامۋىنا سۇبەلى ۇلەس قوسىپ, ەڭبەك ەتكەن وقىتۋشى-پروفەسسورلار قۇرامى, عالىمدار مەن بارلىق ۇجىمعا العىسىمدى بىلدىرگىم كەلەدى. بۇل – سىزدەردىڭ ەڭبەكتەرىڭىز. ماسەلەن, سىزدەردىڭ ءبىلىم وردالارىڭىز دامىعان مەملەكەتتەردىڭ ۋنيۆەرسيتەتتەرى اراسىنان وزا شىعىپ, الدىڭعى قاتارعا جايعاستى. بۇل ءبىلىم ورداسىندا اۋقىمدى جۇمىستار اتقارىلعانىن كورسەتەدى. شارا اياسىندا ۋنيۆەرسيتەتتىڭ الداعى دامۋ جوسپارىمەن جانە عالىمدار ازىرلەگەن عىلىمي-يننوۆاتسيالىق جوبالارىمەن تانىستىق. الداعى جۇمىستارىڭىزعا تابىس تىلەيمىن», دەدى سەرگەي حريستوليۋبوۆ.
ءوز كەزەگىندە ۋنيۆەرسيتەت باسشىسى جانسەيىت تۇيمەباەۆ حالىقارالىق رەيتينگ قازاقستاندىق جوعارى وقۋ ورىندارى ءۇشىن جىل سايىن ءوز كورسەتكىشتەرىن جەتىلدىرۋگە مۇمكىندىك بەرەتىنىن جەتكىزدى.
ء«بىر جىل ىشىندە وقۋ ورنىمىز 175-ورىننان 25 پوزيتسياعا جوعارىلادى. QS WUR جاھاندىق رەيتينگىندەگى جاڭا كورسەتكىشىمىز – 150-ورىن. بۇل – ءبىز ءۇشىن ۇلكەن جەتىستىك ءارى جوعارى جاۋاپكەرشىلىك. قازۇۋ – QS Stars Rating System حالىقارالىق رەيتينگىندە «بەس جۇلدىز» ماراپاتىن العان ورتالىق ازياداعى العاشقى جانە جالعىز جوعارى وقۋ ورنى. سونداي-اق QS by Subject پاندىك رەيتينگىندە ۋنيۆەرسيتەت ءتورت ءپان سالاسى مەن 16 دايىندىق باعىتى بويىنشا ۇزدىكتەر قاتارىنا كىرەدى. ۋنيۆەرسيتەتتىڭ 137 ءبىلىم بەرۋ باعدارلاماسىنىڭ حالىقارالىق دەڭگەيدەگى باسەكەگە قابىلەتتىلىگىن دالەلدەيدى. بۇل ۋنيۆەرسيتەت ۇجىمىنىڭ كوپجىلعى جانە كۇندەلىكتى تىنىمسىز ەڭبەگىنىڭ ناتيجەسى», دەپ اتاپ ءوتتى رەكتور.
سونداي-اق ۋنيۆەرسيتەت باسشىسى بارلىق عالىمداردى, وقىتۋشى-پروفەسسورلار قۇرامى مەن قىزمەتكەرلەردى قۇتتىقتاپ, بۇل جەتىستىكپەن توقتاپ قالماي, مەجەلى ماقساتتارعا جەتۋ جولىندا تابىستى ەڭبەك ەتۋگە شاقىردى.
سونىمەن قاتار ءىس-شارا بارىسىندا حيميا جانە حيميالىق تەحنولوگيا فاكۋلتەتىنىڭ پروفەسسورى زۇلحاير مانسۇروۆ, Instituto Universitário de Lisboa پروفەسسورى پوستولاح وكتاۆيان, حالىقارالىق ءبىلىم بەرۋ امەريكالىق كەڭەستەر ۇيىمىنىڭ جوعارى ءبىلىم بەرۋ باعدارلامالارىنىڭ باسقارۋشى ديرەكتورى گرەم حەتتلينگەر, كولۋمبيا ۋنيۆەرسيتەتىنىڭ دوكتورى ماماتحا حانۋماپپا, حيميا جانە حيميالىق تەحنولوگيا فاكۋلتەتىنىڭ اعا وقىتۋشىسى گەميل احمات, فيزيكا-ماتەماتيكا عىلىمدارىنىڭ دوكتورى, پروفەسسور مۋززامميل يلاحي جانە دوكتورانت اريفيوگلۋ ابدۋرراحمان زەكي قازۇۋ ۇجىمىن قۇتتىقتاپ, جىلى لەبىزدەرىن ءبىلدىردى.
ايتا كەتەيىك, QS WUR الەمنىڭ ۇزدىك ۋنيۆەرسيتەتتەرىنىڭ ءتىزىمى 2004 جىلدان بەرى جاريالانىپ كەلەدى. اعىمداعى جىلى رەيتينگكە الەمنىڭ 100 ەلىنەن 2,5 مىڭعا جۋىق جوو قاتىسقان بولاتىن.
ءال-فارابي اتىنداعى قازۇۋ-دىڭ ءباسپاسوز قىزمەتى