ەۋرازيالىق ەكونوميكالىق وداق اياسىندا تەمىر جول تاريفتەرى بۇرىنعى قالپىندا ساقتالىپ قالادى. بۇل تۋرالى بۇگىن, 18 ءساۋىر كۇنى ورتالىق كوممۋنيكاتسيالار قىزمەتىندە «قازاقستان تەمىر جولى» ۇك» اق –نىڭ كورپوراتيۆتىك دامۋ جونىندەگى باسقارۋشى ديرەكتورى ەركىن جۋسانباەۆ جەتكىزگەن مالىمدەمەگە سىلتەمە جاساعان egemen.kz ءتىلشىسى حابارلادى.
باسقارۋشى ديرەكتوردىڭ ايتۋىنا قاراعاندا, ەۋرازيالىق ەكونوميكالىق وداق اياسىندا تەمىر جول ترانزيتتىك قىزمەتىنىڭ الەۋەتى ارتادى. ال تەمىر جول ءتاريفى, سونىڭ ىشىندە بيلەت قۇنى قىمباتتامايدى.
«ەۋرازيالىق ەكونوميكالىق وداقتى قۇرۋ كەزىندە كولىك قاتىناستارىنا قاتىستى كەلىسىم-شارتتا وداق ىشىندە تەمىرجولدىڭ ءتاريفىن تەڭەستىرۋ ماسەلەسى قاراستىرىلىپ, بىردەي بولسىن دەلىنگەن ەدى. رەسەي تەمىرجولىنىڭ قىزمەتى بىزدەن 2-2,5 ەسە قىمبات ەكەنى ءمالىم. وسىنى ەسكەرىپ, ءبىز بۇل شەشىمگە كەلىسپەدىك. ءسويتىپ, ءار ەل ءوزىنىڭ كولىك قىزمەتىنىڭ اقىسىن ءوزى شەشەتىن بولدى», - دەدى ە.جۋسانباەۆ.
ول سونداي-اق ەۋرازيالىق ەكونوميكالىق وداق كولىكتىك ءترانزيتتىڭ الەۋەتى مەن باسەكەلەستىكتى ارتتىراتىندىعىن دا توقتالدى. قازاقستان, رەسەي جانە بەلارۋس ينفراقۇرىلىمدارىنىڭ شەكارالاس ۋچاسكەلەرىندە تاۋەلسىز تاسىمالداۋشىلارعا تەڭدەي مۇمكىندىك اشۋ ماسەلەسى قاراستىرىلىپ وتىر. اتالعان تەلىمدەر قازاقستان مەن رەسەي اۋماقتارىندا لوكوموتيۆتەرگە قىزمەت كورسەتىلەتىن ورىنداردىڭ شەكاراسى رەتىندە انىقتالاتىن كورىنەدى. ءسويتىپ, تاسىمالداۋشىلار تەڭدەي جاعدايدا جۇمىس ىستەۋ مۇمكىندىكتەرىنە يە بولادى.
نۇرباي ەلمۇراتوۆ.
دەرەككوز: egemen.kz.
فوتو: www.newskaz.ru.