مەملەكەت باسشىسى نۇرسۇلتان نازارباەۆ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى حالىققا ارناعان جولداۋىندا: «بارلىق قۇقىق قورعاۋ جۇيەسى جۇمىسىنىڭ ساپاسىن ارتتىرۋ قاجەت. زور وكىلەتتىلىك پەن قۇقىق يەلەنگەن شەندىلەر ءمىنسىز مىنەز-قۇلقىمەن جانە جوعارى كاسىبي دەڭگەيىمەن ەرەكشەلەنۋگە ءتيىس. زاڭ الدىنداعى تەڭدىك قۇقىق ءتارتىبىنىڭ شىنايى نەگىزى بولۋعا ءتيىس», دەپ ەرەكشە اتاپ ءوتتى. بۇل ورايدا ادامداردىڭ قۇقىن قورعاۋ, زاڭدىلىقتى, قوعامدىق ءتارتىپتى ساقتاۋ ىشكى ىستەر ورگاندارىنىڭ بىردەن-ءبىر مىندەتى بولىپ تابىلادى. مىنە, وسى ورايدا كەشە استانا قالاسىنىڭ ىشكى ىستەر دەپارتامەنتىندە پرەزيدەنت جانىنداعى ادام قۇقىقتارى جونىندەگى كوميسسيا مۇشەلەرىنىڭ ىشكى ىستەر دەپارتامەنتىنىڭ باسشىلىعىمەن جانە قىزمەتكەرلەرىمەن كەزدەسۋى ءوتتى. وندا, جوعارىدا ايتقانىمىزداي, استانا قالالىق ىشكى ىستەر دەپارتامەنتىنىڭ زاڭدىلىقتى جانە ازاماتتاردىڭ كونستيتۋتسيالىق قۇقىقتارىن قامتاماسىز ەتۋدەگى قىزمەتى تالقىلاندى.
ەلوردالىق پوليتسەيلەر الدىندا ادام قۇقىقتارى جونىندەگى كوميسسيا توراعاسى قۋانىش سۇلتانوۆ, ىشكى ىستەر ءمينيسترىنىڭ ورىنباسارى ەرلان تۇرعىمباەۆ مەملەكەتتىڭ, بيلىك وكىلدەرىنىڭ, ونىڭ ىشىندە ءتارتىپتى ساقتاۋ بارىسىنداعى پوليتسيا قىزمەتكەرلەرىنىڭ مىندەتتەرى مەن ادام قۇقىقتارىن ساقتاۋ جونىندە ءسوز سويلەدى. ق. سۇلتانوۆ ەلوردالىق پوليتسەيلەرگە ايرىقشا مىندەت پەن جاۋاپكەرشىلىك جۇكتەلەتىنىن, ويتكەنى حالىقارالىق, مەملەكەتتىك ماڭىزدى ماسەلەلەر وسى استانادا وتەتىنىن ايتىپ ءوتتى. سوعان وراي قوعامدىق ءتارتىپ پەن حالىقتىڭ قۇقىن قورعاۋدا ەلوردالىق پوليتسەيلەردىڭ ءرولى زور ەكەنىن, بيلىككە دەگەن بارلىق سەنىمنىڭ باستاۋى ولاردىڭ زاڭدى ءىس-ارەكەتتەرىنەن باستاۋ الاتىنىن جەتكىزدى. دەمەك, ەلوردالىق پوليتسيا قىزمەتكەرلەرى باسقالارىنا ۇلگى بولاتىنداي, تەك جاعىمدى جاعىنان عانا كورىنۋى قاجەتتىگىن ايتتى. بۇدان كەيىن استانا قالالىق ىشكى ىستەر دەپارتامەنتىنىڭ باستىعى امانتاي اۋباكىروۆ زاڭدىلىقتى جانە ازاماتتاردىڭ كونستيتۋتسيالىق قۇقىقتارىن قامتاماسىز ەتۋدەگى قىزمەتى جونىندە بايانداما جاسادى.
كەزدەسۋگە قاتىسۋشىلار مەملەكەتتىڭ حالىقارالىق بەدەلىن نىعايتۋ جانە ۇلتتىق زاڭناما مەن قۇقىق قولدانۋ تاجىريبەسىن ودان ءارى جەتىلدىرۋ ءۇشىن قازاقستان راتيفيكاتسيالاعان ادام قۇقىقتارىن قورعاۋ سالاسىنداعى حالىقارالىق قۇقىقتىق اكتىلەردىڭ ماڭىزىن اتاپ ءوتتى. كەزدەسۋ سوڭىندا ادام قۇقىقتارى جونىندەگى كوميسسيانىڭ مۇشەلەرى مەن ساراپشىلار پوليتسيا قىزمەتكەرلەرىنىڭ قويعان سۇراقتارىنا جاۋاپ قايتاردى.
الەكساندر تاسبولاتوۆ,
«ەگەمەن قازاقستان».