كەشە استانادا «مەملەكەتتىك قىزمەت سەكتورىندا ادامي رەسۋرستاردى باسقارۋدىڭ اۆتوماتتاندىرىلعان جۇيەلەرى» تاقىرىبىندا قازاقستان رەسپۋبليكاسى مەملەكەتتىك قىزمەت ىستەرى اگەنتتىگى مەن ەۋرووداقتىڭ «قازاقستان ۇكىمەتى مەملەكەتتىك قىزمەت رەفورماسى جانە مودەرنيزاتسياسى» جوباسىنىڭ قولداۋىمەن سەمينار ءوتتى.
مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ سەميناردى اشاردا ءسويلەگەن سوزىندە: «ەڭبەك ءتيىمدىلىگىن ارتتىرىپ, كەز كەلگەن جۇمىستى جەڭىلدەتىپ, وڭتايلى پايدالانۋ – قاشاننان بەرگى ادامزات بالاسىنىڭ ءارى قارايعى دامۋىنداعى زاڭدىلىقتارىنىڭ ءبىرى. سوڭعى جىلدارى اقپاراتتىق تەحنولوگيالار ءومىردىڭ بارلىق سالاسىندا كەڭىنەن پايدالانىلۋدا. ولاردىڭ باعىتى – ادامي رەسۋرستاردى باسقارۋدىڭ ساپاسىن ارتتىرۋ. سول سەبەپتەن دە, ەلىمىزدە وسى تۇرعىدا ءبىراز قادامدار جاسالدى. قازاقستان زاماناۋي تەحنولوگيالاردى قولدانۋدىڭ ناتيجەسىندە مەملەكەتتىك اپپاراتتىڭ ءتيىمدىلىگىنە قول جەتكىزىپ, مەملەكەت كورسەتەتىن قىزمەتتىڭ ساپاسىن ارتتىرۋدا ءبىراز جۇمىس اتقاردى. ءبىزدىڭ مەملەكەتىمىز بۇۇ-نىڭ ەلەكتروندى ۇكىمەتتى دامىتۋدىڭ جاھاندىق بەدەلباعاسى (رەيتينگى) بويىنشا 2012 جىلى – 38-ءشى, ال ەلەكتروندى قاتىسۋ يندەكسى بويىنشا 2-ءشى ورىندى يەلەندى», دەدى.
وسىلاي دەگەن توراعا ەلىمىزدىڭ مەملەكەتتىك قىزمەتتە زاماناۋي تەحنولوگيالاردى پايدالانۋدا الەمدەگى وزىق تاجىريبەلەردى زەردەلەۋدە ەكەندىگىن, بۇل رەتتە نيدەرلاند ۇكىمەتىنىڭ ەڭ الدىڭعى ورىندا ەكەنىن قاپەرگە سالدى. سول سەبەپتەن دە, ءبىزدىڭ ماماندارىمىز نيدەرلاندقا بارىپ, P-Direkt مەملەكەتتىك كومپانياسىنىڭ جۇمىسىن زەرتتەدى. مىنە, بۇگىن بارلىق مينيسترلىكتەردىڭ پەرسونالدى باسقارۋ قىزمەتتەرىنىڭ وكىلدەرى قاتىسىپ وتىرسىزدار, سەميناردا مەملەكەتتىك ورگانداردا وسى «ە-قىزمەت» جۇيەسى قالاي دامۋى كەرەك, ول نە بەرەدى, قانداي ارتىقشىلىقتارى بار دەگەن باعىتتا اڭگىمە وربىتەتىن بولامىز, دەدى.
ەو جوباسىنىڭ شەشۋشى ساراپشىسى ج.ماكسيميليان فيودينگەر ءوز كەزەگىندە مەملەكەتتىك قىزمەتتە ادام رەسۋرستارىن باسقارۋ جۇيەسىن اۆتوماتتاندىرۋداعى حالىقارالىق تاجىريبەلەرگە توقتالىپ: «مەنىڭ بۇل باعىتتا ايتقان اڭگىمەلەرىمنەن گورى, سىزدەر ءۇشىن وسى تاجىريبەنى ناقتى تۇردە ءتيىمدى جۇزەگە اسىرىپ جۇرگەن جاننىڭ ورتاعا شىققانى دۇرىسىراق بولار», دەپ مىنبەرگە كەلەسى كوتەرىلەتىن شەشەندى تانىستىرىپ وتكەن. ول – نيدەرلاند مەملەكەتتىك سەكتورىندا كادرلىق ۇدەرىستەردى اۆتوماتتاندىرۋ بويىنشا مول تاجىريبەسى بار نيدەرلاندتىق P-Direkt مەملەكەتتىك كومپانياسىنىڭ پرەزيدەنتى سيلۆيا برومانس ەكەن.
نيدەرلاند مەملەكەتىندەگى 10 مينيسترلىكتىڭ كادرلىق ۇدەرىستەرىن ورتالىقتاندىرۋمەن جانە ستاندارتتاۋمەن اينالىساتىن كومپانيا وزدەرى اتقارعان جۇمىستارىندا مول تاجىريبە جيناقتاپتى. د-ر سيلۆيا برومانستىڭ ورتاعا سالعان ويلارىنان ءمالىم بولعانىنداي, نيدەرلاند ۇكىمەتى 2003 جىلى رەسۋرستاردى ۇنەمدەۋ ءارى تيىمدىلىگىن ارتتىرۋ ماقساتىندا HR قىزمەتىن قايتا قۇرۋدى جوسپارلاپتى. ءسويتىپ, 2004 جىلى جۇمىسىن باستاعان كومپانيانىڭ العاشقى تاجىريبەسى ءدال كۇتكەندەي بولىپ شىقپاپتى.
«بىراق ءبىز قانداي قاتەلىكتەر جىبەرگەنىمىزدى, كەلەشەكتە نەنى ەسەپكە الۋىمىزدى تۇسىندىك. مۇنان سوڭ 2007 جىلى جوبانى 2 كەزەڭدە اتقارۋ كەرەك دەگەن ۇيعارىممەن جۇمىسىمىزدى ءارى قاراي جالعاستىردىق. قولعا العان ءىسىمىز ناتيجەلى بولدى. قازىرگى كۇنى 10 مينيسترلىكتىڭ جۇمىسى ورتالىقتاندىرىلعان 1 پورتال ارقىلى جۇزەگە اسىپ, ءتىپتى, ەڭبەكاقى تولەۋدىڭ ءوزى ءبىر جۇيەمەن اتقارىلۋدا. ءمولدىر دە اشىق جۇرگىزىلەتىن وسى جۇمىس ەڭبەك تيىمدىلىگىن ارتتىرىپ, ەندى مەملەكەتتىك قىزمەتشىلەر قاعازباستىلىقتان ارىلىپ, اكىمشىلىك جۇمىستارىنان گورى ستراتەگيالىق ماقساتتارعا مويىن بۇرۋعا كوپ ۋاقىتتارىن جۇمسايتىن بولدى. قازىر ءبىز بۇل جۇيەنىڭ ۇيالى تەلەفوندار, سمارتفوندار مەن پلانشەتتەر ارقىلى جۇرگىزىلەتىن ءموبيلدى نۇسقاسىن دا ەندىردىك. قىسقاسى, ءبىز وزىمىزگە تاپسىرىس بەرۋشى مەملەكەتتىك ورگانداردىڭ ادىمىن كەڭەيتتىك. ءار توقسان سايىن جۇيەمىزدى جەتىلدىرىپ وتىرۋ دا ءبىزدىڭ باستى ماقساتتارىمىزدىڭ ءبىرى», دەدى سيلۆيا برومانس.
مەملەكەتتىك قىزمەتتە ادام رەسۋرستارىن ۇنەمدەپ, ولاردى مازمۇندى جۇمىسقا باعىتتاۋعا مۇمكىندىك بەرەتىن «ە-قىزمەت» جوباسىن ەنگىزۋدىڭ دايىندىق جۇمىستارى ەلىمىزدە وسىدان 3 جىل بۇرىن قولعا الىنعان بولاتىن. قازىرگى كەزەڭدە نەگىزگى دايىندىقتىڭ سوڭعى كەزەڭى وتۋدە, ال 2015 جىلدان باستاپ, قاناتقاقتى رەجىمدە وسى قىزمەت ەنە باستايدى.
سەميناردا ەلىمىزدەگى مەملەكەتتىك قىزمەتتەگى پەرسونالدى باسقارۋدى اۆتوماتتاندىرۋ ۇردىستەرىنىڭ نەگىزگى ماسەلەلەرىن قازاقستان IT-كومپانيالار قاۋىمداستىعىنىڭ پرەزيدەنتى نۇرلان يسين, پەرسونالدى باسقارۋدىڭ «ە-قىزمەت» ىقپالداستىرىلعان اقپاراتتىق جۇيەسىن قۇرۋ جوباسى بويىنشا وڭعارباي دانەبەكوۆ, قازاقستانداعى HR مەنەدجمەنت جايىندا «سامۇرىق-قازىنا» ۇاق» اق ادام رەسۋرستارىن باسقارۋ دەپارتامەنتىنىڭ ديرەكتورى گۇلميرا رايسوۆا باياندامالار جاساپ, سەمينارعا قاتىسۋشىلار ەلىمىزدەگى كادرلىق ساياسات پەن ادامي رەسۋرستار جۇيەسىن اۆتوماتتاندىرۋدى ۇلتتىق كومپانيالاردىڭ مىسالىندا تالدادى.
انار تولەۋحانقىزى,
«ەگەمەن قازاقستان».