بيىلعى جىلدىڭ كوكتەمىندە قازاقستاندىق اگرارشىلارعا كوكتەمگى ەگىس ناۋقانى جۇمىستارىنا 360 مىڭ توننا ارزانداتىلعان جانار-جاعارماي بولىنەتىن بولادى.
مۇناي جانە گاز مينيسترلىگى اۋىل شارۋاشىلىعى مينيسترلىگىمەن بىرلەسە وتىرىپ, 2011 جىلعى 20 شىلدەدەگى №463 IV «مۇناي ونىمدەرىنىڭ جەكەلەگەن تۇرلەرىنىڭ ءوندىرىسىن جانە اينالىمىن مەملەكەتتىك رەتتەۋ تۋرالى» زاڭ نەگىزىندە 2014 جىلعى كوكتەمگى ەگىس ناۋقانى جۇمىستارىنا جانار-جاعارماي جەتكىزۋ بويىنشا مۇناي ءوندىرۋ زاۋىتتارىن وبلىستارعا بەكىتۋ تۋرالى كەستەنى بەكىتتى. ناۋرىز ايىنان مامىرعا دەيىن اۋىلشارۋاشىلىق تاۋارلارىن وندىرۋشىلەرگە ءبىر تونناسى ءۇشىن 98 312 تەڭگە باعامەن 360 مىڭ توننا ارزانداتىلعان جانار-جاعارماي بولىنەتىن بولادى.
اۋىلشارۋاشىلىق تاۋارلارىن وندىرۋشىلەرگە ارزانداتىلعان جانار-جاعارمايدى جەتكىزۋ زاڭنامالىق دەڭگەيدە بەكىتىلگەن, ال ونى تيەۋ-ءتۇسىرۋ بويىنشا تاۋلىك سايىن مونيتورينگ جۇرگىزۋ مينيسترلىكتىڭ باقىلاۋىندا.
«ەگەمەن-اقپارات».