دۇكەندەردە عانا ەمەس قالا بازارلارى مەن ءتۇرلى ساۋدا نۇكتەلەرىندە دە قاراپايىم حالىق ءۇشىن ەڭ ءبىرىنشى كەزەكتەگى الەۋمەتتىك ماڭىزى بار ازىق-ت ۇلىك تاۋارلاردىڭ قولجەتىمدى بولۋى قاراستىرىلۋدا. وسىدان ءبىراز جىل بۇرىن باعانى ءتيىمدى ءارى بىرقالىپتى ۇستاۋ ماقساتىندا ارنايى تۇراقتاندىرۋ قورلارى قۇرىلعان بولاتىن. سەمەيدە وسىعان وراي تۇراقتاندىرۋ قورىنىڭ ونىمدەرىن ساۋدالايتىن تاعى ءبىر ساۋدا ورنى اشىلدى. ول «اقشىڭ» بازارىندا ورنالاسقان. قالا اكىمدىگى مەن كاسىپكەرلەر اراسىنداعى مەموراندۋمنىڭ ارقاسىندا تۇتىنۋشىلار ەسىگىن ايقارا اشقان بۇل نۇكتەدەگى تاۋارلاردىڭ باعاسى كەلىسىمگە سايكەس ءتىپتى, دۇكەندەر مەن بازاردان دا ءبىرشاما ارزان. ماسەلەن, قانت كەلىسى 152 تەڭگەدەن, قاراقۇمىق 120 تەڭگەدەن, وسىمدىك مايى 280 تەڭگەدەن, كارتوپ, كوكونىستەردىڭ بارلىق ءتۇرى 55 تەڭگەدەن ساتىلادى. سەمەي تۇرماق, قالا ماڭىنداعى اۋىلدار مەن وبلىس اۋداندارىنان بازارشىلاپ كەلگەندەر ارزان باعامەن ساتىپ الۋ مۇمكىندىگىنە يە بولعاندارىنا ءدان ريزا. اتالمىش ساۋدا نۇكتەسىنىڭ اشىلۋىندا «شىعىس سامعاۋ» جشس توراعاسىنىڭ ورىنباسارى تالعات مۇراتوۆ پەن كاسىپكەرلىك جانە ساۋدا سەكتورىنىڭ مەڭگەرۋشىسى ءامينا سىزدىقوۆا بۇل ورىنداعى تاۋارلار قۇنىنىڭ جاقىن ارالىقتا ەشقانداي وزگەرىسكە ۇشىرامايتىندىعىنان حاباردار ەتتى.
– «اقشىڭ» قالاداعى ەڭ ۇلكەن بازار ءارى ورتالىقتا ورنالاسقان, – دەدى ءامينا سىزدىقوۆا, – سوندىقتان دا قالا تۇرعىندارى عانا ەمەس, وبلىس تۇرعىندارىنىڭ دا كەلىپ-كەتۋىنە اسا قولايلى. تاعى دا ايتا كەتەرىم, بۇگىن «يۋنوست» شاعىن اۋدانىندا دا تۇراقتاندىرۋ قورىنىڭ ونىمدەرىن ساۋدالايتىن وسىنداي ءۇش نۇكتە اشىلدى. سونداي-اق, «دينا» دۇكەنىندە دە ازىق-ت ۇلىك ونىمدەرىن تومەن باعامەن ساتاتىن ارنايى ورىن ءبولىندى. قازىر قالادا تۇراقتاندىرۋ قورىنىڭ ونىمدەرىن ساۋدالايتىن 40-تان استام نۇكتە بار. وسى اپتانىڭ سوڭىنا دەيىن ولاردىڭ سانىن الپىسقا دەيىن جەتكىزۋدى جوسپارلاپ وتىرمىز.
– ءبىز سياقتى تۇرمىسى تومەن وتباسىلارىنا جاعداي جاساپ وتىرعان اكىمدىككە ريزامىز, – دەدى قالا تۇرعىنى ءباتيما بايجۇمانوۆا – كوپبالالى انامىن. شىنى كەرەك, دوللار ءوستى دەگەن كەزدە ءبىراز الاڭداپ قالعانىمىز راس. دەگەنمەن, كوڭىلىم ورنىنا ءتۇستى. مىنا اشىلعان ساۋدا ورنىنداعى باعالار ماعان ۇنادى.
قالادا باعانىڭ نەگىزسىز وسۋىنە جول بەرمەۋ ءۇشىن الدىن الۋ شارالارى جاقسى ءجۇرىپ جاتىر. سونىڭ ءبىر دالەلى وسىنداي الەۋمەتتىك دۇكەن, نىساندار قاتارىنىڭ كوبەيۋى.
راۋشان نۇعمانبەكوۆا.
سەمەي.