كوكتەمگى ەگىس جۇمىستارىنا دايىندىق شەڭبەرىندە «قازاگروقارجى» كومپانياسىنا جالپى سوماسى 13 ملرد. تەڭگەگە 1365 بىرلىك تەحنيكا ساتىپ الۋعا ءوتىنىم كەلىپ ءتۇستى. بۇگىنگى تاڭدا شارۋاگەرلەرمەن جالپى قۇنى 3 664 ملن. تەڭگەگە 479 بىرلىك ەگىس تەحنيكاسىن ساتىپ الۋعا قارجى ليزينگى شارتتارى جاسالىپ تا قويعان, ال ەندى تاعى دا 886 بىرلىك تەحنيكاعا تاپسىرىلعان وتىنىمدەر كومپانيانىڭ نەسيە كوميتەتىندە قارالۋ ۇستىندە, دەپ حابارلادى «قازاگروقارجى» اق ءباسپاسوز حاتشىسى ءاليا يسەنوۆا وتكەن سارسەنبىدە.
كوپشىلىككە ايگىلى تەحنيكالاردىڭ اراسىندا, تراكتورلار مەن تۇقىم سەپكىشتەردەن باسقا, تىرما, كۋن, سوقا, پىشەن تايلاۋشى, قوپسىتقىش, دەستەلەگىش جانە ت.ب. سياقتى تەحنيكا تۇرلەرى دە بار. كوكتەمگى ەگىس جۇمىستارى شەڭبەرىندە ديقانشىلاردىڭ ساتىپ الاتىن تەحنيكالارىنىڭ كوپشىلىگى قازاقستاندىق ءوندىرىستىڭ جاساپ شىعارعان تەحنيكالارى, اتاپ ايتقاندا, ەڭ ايگىلى ۇلگىلەرىنىڭ ءبىرى – سەمەيدەگى «سەماز» اۆتوقۇراستىرۋ زاۋىتىندا قۇراستىرىلعان «بەلارۋس» تراكتورى ەكەنىن ايتىپ كەتكەن ءجون. ءوز الدىنا, تەحنيكاعا ارنالعان اسپالى جابدىقتار تەك اقش-تان عانا ەمەس, سونىمەن قاتار, رەسەيدەن, بەلورۋسسيادان, ۋكراينادان, كانادادان, گەرمانيادان دا ساتىلىپ الىنادى.
ءسوزدىڭ رەتى كەلىپ تۇرعاندا ايتا كەتۋ كەرەك, اۋىلشارۋاشىلىق تاۋار وندىرۋشىلەرىن قولداۋ ماقساتىندا, 2013 جىلدان باستاپ «قازاگروقارجى» اق اۋىلشارۋاشىلىق تەحنيكاسىن ساتىپ الۋعا ارنالعان العى تولەمدى 25%-دان 15%-عا تومەندەتتى. 2014 جىلدىڭ كوكتەمگى ەگىس جۇمىستارىنا دايىندالۋ شەڭبەرىندە كەپىلزاتپەن قامتاماسىز ەتۋمەن بىرگە العى تولەم دە ليزينگ زاتى قۇنىنىڭ 15 %-ىن قۇرايدى.
جالپى, «قازاگرو» ۇلتتىق باسقارۋشى حولدينگى اعىمداعى جىلدىڭ كوكتەمگى ەگىس جۇمىستارىنا 61,6 ملرد. تەڭگە باعىتتاۋدى جوسپارلاپ وتىر, ونىڭ 40 ملرد. تەڭگەسى بيۋدجەتتىك نەسيە. اعىمداعى جىلى ەگىس جۇمىستارىنا نەسيەلەر ەنشىلەس كومپانيالار ارقىلى وتكەن جىلداعى ۇقساس نەسيەلىك ونىمدەر بويىنشا بەرىلەدى. بۇدان باسقا «قازاگرو» العاشقى رەت كوكتەمگى ەگىس جۇمىستارىن ەكىنشى دەڭگەيلى بانكتەر ارقىلى قارجىلاندىراتىن بولادى. بۇل ماقستاتتارعا بيۋدجەتتىك نەسيە قاراجاتىنان 20 ملرد. تەڭگە ءبولىندى. ەگىن ەگۋگە ارنالعان نەسيەلىك قاراجاتتىڭ جاڭا كوزى «اگروبيزنەس-2020» باعدارلاماسىنا سايكەس شارۋالاردىڭ قارجىلاندىرۋعا قولجەتىمدىلىگىن ارتتىرۋ ماقساتىندا قوسىلدى. جالپى, ۇلتتىق حولدينگتەن ەگىن جۇمىستارىنا بولىنگەن قاراجات 6,1 ملن.گا جەر كولەمىنە اگروتەحنيكالىق شارالاردى جۇرگىزۋگە مۇمكىندىك بەرەدى, دەپ حابارلادى «قازاگروقارجى» اق ءباسپاسوز حاتشىسى.
سۇڭعات ءالىپباي,
«ەگەمەن قازاقستان».