جەتىسۋدا ءوندىرىس ورىندارى كوپتەپ اشىلىپ, ەل ەكونوميكاسىن دامىتقان ۇستىنە دامىتىپ, حالىقتىڭ الەۋمەتتىك جاعدايىن جاقسارتۋعا سۇبەلى ۇلەس قوسىپ وتىرعان اۋداننىڭ ءبىرى جامبىل اۋدانى بولىپ سانالادى. ءبىر عانا مىسال رەتىندە «سۇڭقار الماتى قۇس فابريكاسى» جشس-ءىن ايتۋعا بولادى. 2012 جىلى قۇرىلىس جۇمىستارى باستالعان ءوندىرىس ورنىندا نەبارى ءبىر جىلدا جۇمىرتقا باعىتىنداعى تاۋىقتاردى باعاتىن 4 جانە بالاپاندارعا ارنالعان 1 كورپۋس سالىنىپ, وندا قازىرگى تاڭدا 230 000 باس قۇس باعىلۋدا. بىلتىرعى جىلى بۇل ءوندىرىس ورنى 9 ملن. دانا قۇس ءوندىرىسى تالابىنا ساي جۇمىرتقا وتكىزىپ, يسو ستاندارتىنا ساي سەرتيفيكات العان ەدى. سونىمەن قاتار ۇلتتىق بيزنەس مالىمەتى بويىنشا «سۇڭقار الماتى قۇس فابريكاسى» جشس تمد-دا ەڭ جاقسى اگرووندىرىستىك جوبا بولىپ تانىلدى. «2013 جىلعى قازاقستان ليدەرى» دەگەن قۇرمەتتى اتاققا يە بولىپ, فرانتسيانىڭ ۇلتتىق وندىرىسكە قاتىسۋشىلار اسسوتسياتسياسىنىڭ «SEIN» التىن مەدالىن العانى تاعى بار. اعىمداعى جىلى قۇرىلىس جۇمىستارى تولىعىمەن اياقتالادى دەپ جوسپارلانعان ءوندىرىس ورنى عىلىمي نەگىزدە جاڭا تەحنولوگيا بويىنشا قۇس ءوندىرىسى تالاپتارىنا سايكەس سالىنۋدا. جەكە ۆەتەرينارلىق زەرتحاناسى بار كەشەندە ەندى قوسىمشا 9 كورپۋس سالىنىپ, بارلىعى 14 كورپۋستان تۇراتىن بولادى. «بيزنەستىڭ جول كارتاسى-2020» باعدارلاماسى اياسىندا جوبانىڭ جالپى قۇنى 877 ملن. تەڭگەگە باعالانعان. «سۇڭقار الماتى قۇس فابريكاسى» جشس 2014 جىلى 65 ملن. دانا جۇمىرتقا وتكىزۋ ءۇشىن قارقىندى جۇمىس جۇرگىزۋدە. سول باعىتتان تايماي 2017 جىلى 168 ملن. دانا جۇمىرتقا ءوندىرۋدى جوسپارلاعان. ونىڭ ناتيجەسىن ۋاقىت كورسەتەر, بۇگىندە ەلىمىزدەگى ءىرى سۋپەرماركەتتەردە وسى ءوندىرىس ورنىنىڭ ونىمدەرى مولىنان ساتىلۋدا.
«ءوندىرىس ورنىندا قۇستى تاماقتاندىرۋدان باستاپ جۇمىرتقاسىن وراپ رەتتەۋگە دەيىن تولىعىمەن اۆتوماتتاندىرىلعاندىقتان 42 ادام جۇمىس ىستەيدى. قاتارداعى جۇمىسكەرلەردىڭ ايلىق جالاقىلارى 50-70 مىڭ تەڭگە. بۇل تازا جالاقىلارى, ونىڭ سىرتىندا ءوندىرىس ورنى رەتىندە ءار جۇمىسشىنىڭ تابىس سالىعىن جانە ايلىق جالاقىسىنىڭ زەينەتاقى قورىنا تيەسىلى پايىزىن تولەيمىز. ارينە, بىلىكتى ماماندار 140-150 مىڭ تەڭگە ايلىق جالاقى الادى. جۇمىسكەرلەر تولىعىمەن ارنايى تاپسىرىسپەن تىگىلگەن جۇمىس كيىمىمەن قامتىلعان. الداعى ۋاقىتتا تەگىن تاماقتاندىراتىن بولامىز. تاياۋ ۋاقىتتا قۇراماجەم زاۋىتىن ىسكە قوسامىز. بۇگىنگى تاڭدا ءبىز قۇس ازىعىن كەلىسىمشارتقا سايكەس وزگە قۇس فابريكاسىنان ساتىپ الۋدامىز. كۇن سايىن 25 مىڭ توننا ازىق بەرەمىز. بىزگە ءتۇرلى ماسەلەلەر بويىنشا جەرگىلىكتى بيلىك جاقسى كومەك كورسەتىپ تۇرادى. ەلەكتر قۋاتى مەن كوگىلدىر وتىندى ءوندىرىس ورنىنا دەيىن تارتۋعا مەملەكەت كومەكتەستى», دەيدى «سۇڭقار الماتى قۇس فابريكاسى» جشس اتقارۋشى ديرەكتورى سەرگەي اسانوۆ.
قورىتا ايتقاندا, بۇل ءوندىرىس ورنى اۋىل تۇرعىندارىن تۇراقتى جۇمىسپەن قامتاماسىز ەتىپ وتىر.
نۇربول الدىباەۆ,
«ەگەمەن قازاقستان».
الماتى وبلىسى,
جامبىل اۋدانى.