شۋ ستانساسىنداعى لوكوموتيۆ جوندەۋ زاۋىتى بولاشاعىنان ۇلكەن ءۇمىت كۇتتىرەتىن ومىرشەڭ جوبانىڭ ءبىرى. «قازاقستان تەمىر جولى» ۇك» اق-تىڭ ماڭىزدى ءوندىرىس ورنىنا اينالىپ وتىرعان زاۋىتتا سوڭعى جىلدارى لوكوموتيۆ جوندەۋ وندىرىسىمەن قاتار, ەلباسىنىڭ باستاماسىمەن قىتاي مەملەكەتىمەن بىرلەسە تم KZ تەپلوۆوزىن قۇراستىرۋ جوباسى قولعا الىنعان.
قىتايلىق كومپانيالارمەن بىرلەسە قۇراستىرىلعان بۇل تەپلوۆوزداردا بىرتە-بىرتە قازاقستاندىق ۇلەستى ارتتىرىپ, شەتەلدىك ءونىمدى جەرسىندىرۋ ماقساتىندا زاۋىتتا سوڭعى ۋاقىتتا اۋقىمدى جۇمىستار قولعا الىنىپ وتىرعانىن قۇلاعىمىز شالىپ, جۋىردا اتباسىن شۋ زاۋىتىنا ارنايى بۇردىق.
ات شاپتىرىم كەڭ تسەحتا ءالى تولىق جينالىپ بىتپەگەن قاز-قاتار تىزىلگەن ءۇش تەپلوۆوزدىڭ ءتوڭىرەگىندە جۇمىس قىزۋ ءجۇرىپ جاتىر.
– قىتايدان ساتىلىپ الىنىپ جاتقان سكD تەپلوۆوزداردى قۇراستىرۋ جۇمىستارى زاۋىتتاعى وسى ەكى ۇلكەن تسەحتا جينالدى. وتكەن جىلى ەكى ءىرى تاپسىرىس بەرۋشى «لوكوموتيۆ-2030» جانە «لوكوموتيۆ» اق تاپسىرىستارى بويىنشا مۇندا 18 تەپلوۆوز قۇراستىرىلدى. ونىڭ توعىزى تولىق پايدالانۋعا بەرىلسە, قازىر توعىزى بويىنشا جاڭعىرتۋ ءجۇرىپ جاتىر. العاشقى 2012 جىلى زاۋىتتا ءبىر عانا تەپلوۆوزدى قۇراستىرىپ, پايدالانۋعا بەردىك. ول كەزدە قۇراستىرۋ جۇمىستارىندا قازاقستاندىق ۇلەس بار بولعانى 5 پايىزدى قۇراعان بولاتىن. ال, وتكەن جىلى بارلىق 18 دانا تەپلوۆوزدى قۇراستىرۋ جۇمىستارىندا قازاقستاندىق ۇلەستىڭ سالماعى ارتىپ, ول 31,8 پايىزدى قۇرادى. ال 2016 جىلعا قاراي ونىڭ دەڭگەيىن 50 پايىزعا دەيىن جەتكىزۋدى جوسپارلاپ وتىرمىز,– دەدى شۋ لوكوموتيۆ جوندەۋ زاۋىتىنىڭ ديرەكتورى ماليك اقجىگىتوۆ.
مانەۆرلىك تەپلوۆوزداردىڭ بۇرىنعى تەپلوۆوزداردان ارتىقشىلىعىن سۇراعانىمىزدا, ءبىرىنشىدەن, بۇل تەپلوۆوزدار قوزعالىس قاۋىپسىزدىگىن قامتاماسىز ەتۋگە نەگىزدەلگەن. ماشينيست كابيناسى جۇمىس ىستەۋگە وتە ىڭعايلى, تازا, شۋدان مەيلىنشە وقشاۋلاندىرىلعان. ماشينيست الدىنداعى مونيتور ارقىلى بارلىق ارەكەتتى باسقارىپ وتىرادى. كومپيۋتەرگە ەنگىزىلگەن باعدارلامالىق جۇيە ارقاسىندا ماشينيستىڭ وزدىگىنەن جۇمىس ىستەۋىنە بولادى. ءبىز تاپسىرىس نەگىزىندە مانەۆرلىك تەپلوۆوزداردى قۇراستىرامىز. ءبىزدىڭ نەگىزگى تاپسىرىس بەرۋشىمىز – «لوكوموتيۆ» اق, ودان كەيىن «لوكوموتيۆ – 2030» جشس. ال ازىرگە ءبىز قۇراستىراتىن لوكوموتيۆتەردى ەكسپورتقا شىعارۋ قاراستىرىلماعان. ءبىزدىڭ ماماندارىمىز جاڭا تەحنيكانىڭ قىر-سىرىن مەڭگەرۋ ءۇشىن قىتاي زاۋىتىندا بولىپ, سوندا وقىپ, ءبىلىمدەرىن جەتىلدىرىپ كەلدى. سوسىن زاۋىتتاعى ارىپتەستەرىنە ءۇيرەتتى. بۇل لوكوموتيۆتەردىڭ قۋاتتىلىعى 1000 كۆت, ال كەڭەستىك تەپلوۆوزداردىكى 800 كۆت بولاتىن, دەيدى كاسىپورىن باس ينجەنەرى مارات نۇرباەۆ زاۋىتتى ارالاتىپ ءجۇرىپ.
جوعارىداعى تەپلوۆوزدار تولىعىمەن وسى زاۋىتتا ساراپتامادان ءوتىپ, سودان كەيىن عانا وندىرىسكە جىبەرىلگەن. سونداي-اق, جاڭا ءوندىرىس ورىندارىنىڭ قۇرىلىپ, قايتا قۇرىلىپ, اۋىس-ءتۇيىس بولىپ جاتقانىمەن كاسىپورىندا ەڭبەك ەتىپ جۇرگەن 986 جۇمىسشىنىڭ بارلىعى دەرلىك ءوز جۇمىس ورنىن ساقتاپ, قازىر وندىرىسكە ەنگىزىلىپ جاتقان جاڭا تەحنولوگيالارمەن جۇمىس ىستەۋدە ەكەن.
سونىمەن قاتار بۇگىنگى كۇنى كاسىپورىندا ماگيسترالدىق جەلى ديرەكتسياسىنىڭ تاپسىرىسىمەن اۋىر جول تەحنيكالارىن جوندەۋ يگەرىلىپ جانە جول ديستانتسيالارى جۇمىسشىلارىنا ارنالعان كەشەندىك ۇيشىكتەر دە دايىندالىپ جاتقانىن ايتۋ كەرەك. اتاپ ايتقاندا, زاۋىت جۇمىسشىلارى اعىمداعى جىلدىڭ العاشقى جارتىسىندا جول ديستانتسيالارىنىڭ ۆاحتالىق ادىسپەن ەڭبەك ەتەتىن جولشىلارىنا ارناپ ۇيشىكتەردىڭ 15 كەشەندى جيىنتىعىن پايدالانۋعا بەرمەكشى. ال بۇل كونتەينەرلەردەن جاسالىپ جاتقان ۇيشىكتەردى قۇراستىرۋدا قازاقستاندىق ۇلەس 60 پايىزدان اسىپ جىعىلاتىن كورىنەدى. بۇل جەتىستىك ەمەس پە؟ جالپى, زاۋىتتا اۋىز تولتىرىپ ايتارلىقتاي جاڭالىق تا, جەتىستىك تە كوبەيىپ وتىر ەكەن.
– اعىمداعى جىلدىڭ 1 قاڭتارىنان باستاپ زاۋىتتىڭ الەۋەتى ارتىپ وتىر. ياعني كاسىپورىندا اۋىر جول تەحنيكالارىنا كۇردەلى, اعىمداعى جوندەۋ جۇمىستارى جۇرگىزىلىپ, سەرۆيستىك قىزمەت تۇرلەرى ۇسىنىلادى. ازىرگە, ءبىر جىلعا 51 اۋىر جول تەحنيكالارىنا سەرۆيستىك قىزمەت كورسەتۋ جۇمىستارىنىڭ كەلىسىمشارتىنا قول قويىپ وتىرمىز. استانا ىرگەسىندەگى قىرقىنشى جانە شۋ ستانساسىنداعى پچم تەحنيكالارىن جوندەۋ مەن سەرۆيستىك-تەحنيكالىق قىزمەت كورسەتۋدى دە يگەرىپ, جولعا قويدىق. اتاپ ايتقاندا, اۆستريالىق جانە رەسەيلىك جول تەحنيكالارىنا كۇردەلى جانە اعىمداعى جوندەۋ جۇمىستارى تەك بىزدە جۇرگىزىلەدى. ولاردىڭ قاتارىندا رم, دۋومات, ۋنيمات, كۆر, دگس تەحنيكالارى تولىق دەرلىك سەرۆيستىك قىزمەت الادى. ەندى الداعى ۋاقىتتا اۋىر جول تەحنيكالارىنا سەرۆيستىك قىزمەت كورسەتۋ مەرزىمىن بەس جىلعا دەيىن ۇزارتىپ دايىنداۋ ويىمىزدا بار. وعان زاۋىتتىڭ الەۋەتى تولىعىمەن جەتەدى, – دەيدى ماليك ماقسوت ۇلى.
توعىز جولدىڭ تۇيىسكەن تورابىنداعى شۋ ستانساسىنىڭ بايىرعى لوكوموتيۆ دەپوسىنىڭ بازاسىندا دۇنيەگە كەلگەن جاڭا, زاماناۋي ءوندىرىس ورنىنىڭ جىلدان-جىلعا وركەن جايىپ كەلە جاتقان تىنىس-تىرلىگى, بۇگىندە, مىنە, وسىنداي.
ەرمان ابديەۆ,
جۋرناليست.
جامبىل وبلىسى,
شۋ اۋدانى.
سۋرەتتى تۇسىرگەن اۆتور.