بۇگىن, 17 ءساۋىر كۇنى استانادا ءدىن ىستەر اگەنتتىگىنىڭ ۇيىمداستىرۋىمەن «ورتالىق ازياداعى يسلامنىڭ ءرولى» تاقىرىبىندا كونفەرەنتسيا ءوتتى. بۇل تۋرالى egemen.kz ءتىلشىسى حابارلادى.
كونفەرەنتسياعا ءدىن سالاسىنداعى قارىم-قاتىناستى رەتتەۋ جانە ءدىني ەكسترەميزمگە قارسى تۇرۋ ماسەلەلەرىمەن اينالىساتىن رەسەي, وزبەكستان, تاجىكستان, قىرعىزستان, تۇركيا, ەگيپەت مەملەكەتتەرىنەن كەلگەن ساراپشىلار, مەملەكەتتىك ورگاندار وكىلدەرى, ءدىن جانە ءدىني سەنىم بوستاندىعى ماسەلەلەرىن زەرتتەۋشى قازاقستاندىق ساراپشى-ماماندار, عالىمدار, ءدىنتانۋشىلار, ۇكىمەتتىك ەمەس ۇيىمدار وكىلدەرى قاتىستى.
كونفەرەنتسيانىڭ نەگىزگى ماقساتى يسلامنىڭ دامۋىندا ايتارلىقتاي ۇلەس قوسقان ورتالىق ازيانىڭ ءرولىن تالقىلاۋ بولدى. وسىعان وراي جيىنعا قاتىسۋشىلار يسلام ءدىنىنىڭ ءرولىن, قازاقستان مەن ورتالىق ازيا مەملەكەتتەرىنىڭ مادەني جانە رۋحاني تۇرعىدان دامۋىنداعى ىقپالىن تالقىلاپ قانا قويماي, ورتالىق ازيا ايماعىنان شىققان مۇسىلمان ويشىلدارىنىڭ قالامىنان تۋعان عىلىمي, ادەبي, مادەني جانە رۋحاني-ونەگەلىك مۇرالاردىڭ قازىرگى كەزدەگى ەكسترەميستىك يدەيالاردىڭ تارالۋىنا يدەولوگيالىق تۇرعىدا بوگەت بولا الاتىنىن اتاپ ءوتتى. ماسەلەن, حالىقارالىق كونفەرەنتسيادا ءسوز العان قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى ءوزىنىڭ سوزىندە ىزگىلىك پەن ىزەتتىلىكتىڭ, بەرەكە مەن بىرلىكتىڭ, ەكى دۇنيە باقىتىنىڭ باستاۋى بولعان ءدىن – يسلامنىڭ قازاق توپىراعىنا جەتكەنىنە 1250 جىلدان اسقانىنا, ال بايتاق دالانى مەكەندەگەن بابالارىمىز ءوز سالت-ءداستۇرى مەن بولمىسىنا بارىنشا جاقىن ءدىندى VIII عاسىردا قابىلداعانىنا توقتالا كەلە: «يسلام – وسىعان دەيىن جۇرتىمىزدىڭ جۇرەر جولى, باعىت-باعدارى, قورعانى, تىرەگى دە بولىپ كەلەدى. اسىل دىننەن قۋات العان حالقىمىز قامىققانعا قامقور, ۇلتتار مەن ۇلىستاردى ىنتىماققا ۇيىتقان ىرگەلى ەلگە اينالدى» دەگەن ويىن جەتكىزدى.
ال رەسەي عىلىم اكادەمياسىنىڭ شىعىستانۋ ينستيتۋتىنىڭ جەتەكشى عىلىمي قىزمەتكەرى فاريد ابدۋللين بۇگىندە يسلامدى الەمدىك ءدىن رەتىندە تەرەڭ وقۋ جانە يسلامدىق اعارتۋ, يسلامداعى ءبىلىم سالالارىن تۇبەگەيلى زەرتتەۋ ۇدەرىسى كەڭىنەن جۇرگىزىلىپ جاتقانىن اتاپ ءوتتى. ونىڭ ايتۋىنشا, بۇل اكادەميالىق قوعام – ارابتانۋشىلاردى, يسلامتانۋشىلاردى جانە تاريحشىلاردى عانا ەمەس, جاڭا زاماننىڭ يمامدارىن دايارلايتىن ءدىني قايراتكەرلەردىڭ باسىن دا بىرىكتىرگەن. «يسلامنىڭ الەمدىك ءدىن رەتىندەگى ەڭ نەگىزگى ارتىقشىلىقتارىنىڭ ءبىرى – وندا ءبىلىم-عىلىم مەن سەنىم ارقاشان, ءاردايىم ماعىنا جاعىنان ۇقساس ۇعىم رەتىندە قاراستىرىلادى. ياعني, سەنىم – ءبىلىمنىڭ فۋنكتسياسى بولسا, ءبىلىم دە سەنىمنىڭ فۋنكتسياسى. دەمەك, ءبىلىم مەن عىلىمعا ۇمتىلۋ – ءاربىر سەنىم يەسىنىڭ باستى مىندەتى بولۋى ءتيىس», دەدى شەتەلدىك ساراپشى ءوزىنىڭ سوزىندە.
ءلايلا ەدىلقىزى.
دەرەككوز: egemen.kz.
فوتو: dknews.kz.