كەشە, 16 ءساۋىر كۇنى رەسەي فەدەراتسياسىنىڭ استاناسى – ماسكەۋ قالاسىندا بولىپ وتكەن ەۋرازيالىق ەكونوميكالىق كوميسسيانىڭ كەزەكتى كەڭەسىندە ماڭىزدى دەگەن ماسەلەلەر تاعى ءبىر پىسىقتالدى. اتالعان جيىنعا قازاقستان تاراپىنان پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ قاتىستى. بۇل تۋرالى قازتاگ حابارلادى.
باسقوسۋدا ەۋرازيالىق ەكونوميكالىق وداق اياسىنداعى ەڭ ماڭىزدى دەگەن ماسەلەلەر جان-جاقتى تالقىعا ءتۇستى. اسىرەسە, ينتەگراتسيانى ودان ارى دامىتۋ جانە تاراپتاردىڭ مۇددەلەرىن ەسكەرۋ تۇرعىسىندا كەڭىنەن ءسوز قوزعالدى. بۇعان دەيىن ايتىلىپ جۇرگەندەي, مۇناي جانە مۇناي ونىمدەرى, گاز تاسىمالداۋ, كولىك تاسىمالى سالالارىنا جانە تەمىر جول تاريفتەرى مەن اۋىل شارۋاشىلىعىن مەملەكەت تاراپىنان قولداۋ ىسىنە بايلانىستى جۇمىلا جۇمىس ىستەۋ اڭگىمە ارقاۋىنا اينالدى. سونداي-اق, القالى جيىندا ساۋدا ىستەرى, سانيتارلىق-فيتوسانيتارلىق شارالارعا دا كوڭىل ءبولىندى. بۇعان قوسا, تابيعي مونوپوليا, ترانسپورت, ەنەرگەتيكا سالالارىندا جانە باسەكەلەستىكتى دامىتۋ ىسىندە بىرلەسە ارەكەت ەتۋ تۋرالى دا پىكىرلەر ورتاعا سالىندى.
جالپى, باسقوسۋ قورىتىندىسى بويىنشا ەكونوميكا, ونەركاسىپ, اۋىل شارۋاشىلىعى, ۆاليۋتا كەڭىستىگى, قارجىلىق قوزعالىستار جونىندەگى جاعداياتتارعا قاتىستى ءوزارا تۇسىنىستىككە قول جەتكىزىلدى.
جولدىباي بازار.
دەرەككوز: قازتاگ.
فوتو: Strategy.kz.