ماسكەۋدە وتكەن «سۋزدال-2014» انيماتسيالىق كينولار فەستيۆالىندە قازاقستاننان شىققان مۋلتفيلمدەرگە جىلى لەبىزدەر, ماقتاۋلار ايتىلدى. بۇل تۋرالى «ەكسپرەسس ك» حابارلادى.
«ەلىمىزدە وندىرىلگەن انيماتسيالىق فيلمدەردى, اسىرەسە, رەسەي مۋلتيپليكاتورلارى جوعارى باعالادى. اتالمىش جيىنعا قاتىسۋشىلار ەلىمىزدىڭ تاراپىنان ۇسىنىلعان «بايقوڭىر», «تيمۋر جانە ايداھار», «كوكسەرەك», «جىبەك جولى» اتتى انيماتسيالىق فيلمدەردى قىزىعا تاماشالادى», - دەلىنگەن باسىلىمدا.
قازاقستان انيماتسيالىق كينولار قاۋىمداستىعىنىڭ پرەزيدەنتى عالي مىرزاشەۆ: «ءبىزدىڭ مۋلتفيلمدەرىمىزدى كورگەننەن كەيىن رەسەيلىك ارىپتەسىم – ميحايل تۋمەل. مەن سىزدەردىڭ ەڭبەكتەرىڭىزدى كورىپ وتىرىپ كەڭەستىك انيماتسيالىق فيلمدەردى تاماشالاعانداي بولدىم دەگەن پىكىرىن ءبىلدىردى. ال بۇل ءبىزدىڭ جۇمىسىمىزعا بەرىلگەن ۇلكەن باعا. ويتكەنى, كسرو كەزىندە شىققان مۋلتفيلمدەر وتە جاقسى بولاتىن. ميحايل تۋمەلدىڭ پىكىرىن «كۋ-كين-دزا-دزا» ءمۋلتفيلمىنىڭ رەجيسسەرى, «نيكا» سىيلىعىنىڭ يەگەرى, تاتيانا يلينا دا قوستادى», – دەدى.
عالي مىرزاشەۆتىڭ ايتۋىنشا, فەستيۆالعا قاتىسۋشىلارعا «كوكسەرەكتىڭ» تۇپنۇسقادان اۋىتقىماي بەرىلگەنى ءارى ۇشقىر قيالدىڭ شەبەرلىكپەن ورىلگەنى ۇناپتى. ال «تيمۋر جانە ايداھار» كارتيناسىنداعى ويناقى ءازىل فەستيۆالعا جينالعانداردى كۇلكىگە كومىپتى.
«سويۋزمۋلتفيلم» جايعاسقان جاڭا عيماراتتى كورىپ, تاڭقالىپ قايتقان عالي مىرزاشەۆتىڭ سوزىنە سۇيەنە سويلەسەك, «قازاقمۋلتفيلمىن» زامان تالابىنا ساي جابدىقتاۋدىڭ تەتىكتەرى قاراستىرىلىپ جاتىر ەكەن.
ەلىمىزدە ءبىر جىلدا بارلىعىن قوسقاندا 50-70 مينۋتتى قۇرايتىن انيماتسيالىق فيلمدەر شىعارىلادى. ماماننىڭ ايتۋىنشا, بۇل وتە از. قازاقستان انيماتسيالىق كينولار قاۋىمداستىعىنىڭ پرەزيدەنتى وتاندىق مۋلتفيلمدەردى كورەرمەنگە تەاترلار ارقىلى ۇسىنۋدىڭ مۇمكىندىكتەرى جوق ەكەنىنە دە قىنجىلىس ءبىلدىردى.
قازىر وتاندىق انيماتسيالىق فيلمدەردى «بالاپان» تەلەارناسى ارقىلى كورسەتۋ باعىتىندا جۇمىستار اتقارىلۋدا. سونداي-اق, عالي مىرزاشەۆ دەپۋتاتتارمەن كەزدەسىپ, ولاردان «قازاقمۋلتفيلمگە» زاڭدىق تۇرعىدا قولداۋ كورسەتۋلەرىن وتىنبەك.
جولدىباي بازار.
دەرەككوز: «ەكسپرەس ك».