كەشە ماسكەۋدە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆتىڭ قاتىسۋىمەن ەۋرازيالىق ەكونوميكالىق كوميسسيانىڭ (ەەك) كەزەكتى وتىرىسى ءوتتى, دەپ حابارلادى قر پرەمەر-ءمينيسترىنىڭ ءباسپاسوز قىزمەتى.
وتىرىسقا قاتىسۋشىلار وسى جىلدىڭ 15 ساۋىرىندەگى قازاقستان, رەسەي جانە بەلارۋس ۇكىمەتى باسشىلارىنىڭ كەزدەسۋى بارىسىندا قول جەتكىزىلگەن, كەلىسىمدەر شەڭبەرىندەگى ەۋرازيالىق ەكونوميكالىق وداق (ەاەو) تۋرالى كەلىسىم جوباسىن دايىنداۋدىڭ كوكەيكەستى ماسەلەلەرىن تالقىلادى.
اتاپ ايتقاندا, كەلىسىم جوباسىن جاساۋ بارىسىندا ارىپتەس ەلدەرمەن بىرلەسىپ ماسەلەنىڭ ءتۇيىندى اسپەكتىلەرى, سونىمەن قاتار, مەملەكەتتەردىڭ ءوزارا مۇددەلەرىن قاناعاتتاندىرۋعا جانە ينتەگراتسيانى ودان ءارى دامىتۋعا باعىتتالعان ەرەجەلەر تالقىلاندى.
بۇدان بۇرىنعى قول جەتكەن جەتىستىكتەردى ەسەپكە الىپ, كەلىسىم جوباسىن دايىنداۋدىڭ نەگىزگى ماسەلەلەرى مۇناي مەن مۇناي ونىمدەرىن جونەلتۋ, گاز تاسىمالداۋ, اۆتوكولىك تاسىمالى, تەمىر-جول تاريفتەرىن قولدانۋ جانە اۋىل شارۋاشىلىعىن مەملەكەتتىك قولداۋ سالالارىندا ءوزارا ءىس-قيمىل پەرسپەكتيۆالارىن انىقتادى.
كەڭەسكە قاتىسۋشىلار كەشە ساۋدا ساياساتى, تەحنيكالىق رەتتەۋ جانە سانيتارلىق-فيتوسانيتارلىق شارالار ماسەلەلەرىن ويداعىداي تالقىلادى.
ونەركاسىپ, اگروونەركاسىپ, ۆاليۋتا سالالارى, قارجى رىنوكتارىن قامتيتىن ەكونوميكانىڭ شەشۋشى سەكتورلارىندا ورتاق تۇسىنىستىككە كەلىپ, بۇل سالالاردى ءوزارا ءتيىمدى دامىتۋ مۇمكىندىكتەرى كەلىسىم جوباسىنا ەنگىزىلدى.
سونداي-اق, باسەكەلەستىكتى دامىتۋ, كولىك, ەنەرگەتيكا ءجانە تابيعي مونوپوليالار سالالارىنداعى ىنتىماقتاستىق ماسەلەلەرى قارالدى.
تۇتاستاي العاندا, كەلىسىم جوباسىن دايىنداۋ بارىسى تۋرالى ماسەلەنى تالقىلاۋ قورىتىندىسى بويىنشا, ءوزارا ءتيىمدى ارىپتەستىكتىڭ ءتۇيىندى اسپەكتىلەرى بويىنشا ەلەۋلى ناتيجەلەرگە قول جەتكىزىلدى.
ەكونوميكالىق ينتەگراتسيانى دامىتۋ باعىتىنداعى بىرلەسكەن جۇمىس مەملەكەتتەردىڭ تەڭ قۇقىقتى ارىپتەستىك قارىم-قاتىناس الەۋەتىن ءتيىمدى پايدالانۋ بويىنشا ىنتىماقتاستىعى مەن نيەتىنىڭ جوعارى دەڭگەيدە ەكەنىنىڭ جارقىن كورسەتكىشى بولىپ تابىلادى.