«ءساۋىر بولماي ءتاۋىر بولماس», دەگەن ماقال قىزىلوردالىق ساربازداردىڭ سيپاتىن اشپاي تۇر. ەل گازەتىنىڭ بەتىندە قىزىلورداداعى №55/47 اسكەري ءبولىمىنىڭ 36 ساربازى ۋلانىپ, وبلىستىق جۇقپالى اۋرۋلار اۋرۋحاناسىنا تۇسكەنىن جازعانبىز. ەندى ولاردىڭ سانى 52-گە جەتىپ وتىر.
اۋرۋحاناعا جاتقىزىلعان اسكەري قىزمەتشىلەر تولىققاندى ءتيىستى ەم قابىلداۋدا جانە مامان-دارىگەرلەر مەن مەديتسينالىق قىزمەتكەرلەردىڭ تۇراقتى باقىلاۋىنا الىنعان. ولاردىڭ حال-جاعدايى قالىپتى جاعدايدا, دەيدى دارىگەرلەر.
اسكەري ءبولىم قىزمەتشىلەرىن وبلىستىق جۇقپالى اۋرۋلار اۋرۋحاناسىنىڭ ينفەكتسيونيست-دارىگەرلەرى تاراپىنان مەديتسينالىق باقىلاۋ ۇيىمداستىرىلعان. بۇگىندە ولار دارىگەرلەردىڭ باقىلاۋىنا الىنعان.
وسىعان دەيىن اسكەري بولىمدە اۋىز سۋ, تاماق ونىمدەرىنە باكتەريولوگيالىق زەرتتەۋلەر ءۇشىن ساراپتاما جاسالعان بولاتىن.
سونىمەن قاتار, سىرتقى سۋ-قۇبىر جۇيەلەرىنە تەحنيكالىق تەكسەرىس جۇرگىزىلدى.
بۇگىنگى تاڭدا ەپيدەمياعا قارسى بارلىق ءتيىستى شارالار قولعا الىنىپ, سانيتارلىق-ەپيدەميولوگيالىق جاعدايدى باقىلاۋ قاتاڭ قاداعالانىپ وتىر.
ەرجان بايتىلەس,
«ەگەمەن قازاقستان».
قىزىلوردا.