ەكىباستۇزدىڭ قۇدايكول اۋىلىنىڭ اكىمى نيكولاي ۆينسپەن ءبىز سول اۋىلعا بارعاندا تانىستىق. جاپ-جاس جىگىت, 30-عا دا تولماعان ەكەن. رەسەي جاعىنان وقۋ ءبىتىرىپ كەلىپتى. بۇل – ءبىزدىڭ كوپتەگەن ۇل-قىزدارىمىزعا ۇلگى بولىپ كەلە جاتقان «ديپلوممەن – اۋىلعا!» دەگەن باعدارلامانىڭ ناتيجەسى بولسا كەرەك.
ەكىباستۇزدا تۋىپ-وسكەن نيكولاي مەكتەپتەن سوڭ, نوۆوسيبير گۋمانيتارلىق اكادەمياسىن ءبىتىرىپتى. ءوندىرىستى قالاداعى جاستاردىڭ باسىن قوسىپ, «بايتەرەك» اتتى قوعامدىق جاستار بىرلەستىگىندە مادەني شارالاردىڭ باستاماشىسى, قولداۋشى-ۆولونتەر رەتىندە جۇمىس جاساپتى. بەلسەندى جۇمىستارى ارقاسىندا كوزگە تۇسكەن بالاڭ جىگىت 2006 جىلى وسى بىرلەستىك باسشىسىنىڭ ورىنباسارى بولادى. وسى ۋاقىت ارالىعىندا «بايتەرەكتىڭ» قولداۋىمەن قالا جاستارىن جۇمىسقا تارتۋ بيرجاسى ارقىلى 2 مىڭعا جۋىق جاس جۇمىسقا ورنالاسادى. الەۋمەتتىك تۇرعىدا سەرپىن بەرەتىن شارالار وتكىزۋ ارقىلى جاستارعا جاقسى قولداۋ كورسەتىلدى. ال, 2008 جىلى ن. ۆينس «بايتەرەكتىڭ» باسشىسى بولىپ سايلانادى. سول كەزدەرى «نۇر وتاننىڭ» «جاس وتان» جاستار قاناتى «يننوۆاتسيالىق لاگەر» باعدارلامالار جۇيەسى بويىنشا بريفينگتەر وتكىزىپ ءجۇردى. بۇل «جاستار – وتانعا» باعدارلاماسى جاستاردىڭ يننوۆاتسيالىق دارىن-قابىلەتتەرىن بايقاۋعا ارنالعان ەدى.
ن.ۆينس 2012 جىلى «جاس وتان» سەزىنە دەلەگات بولىپ قاتىستى. ونىڭ ۇلتى نەمىس. اكەسى اندرەي, شەشەسى تاتيانا, اپكەسى مارينا بارلىعى دا جەكە كاسىپكەرلىكپەن اينالىسادى. باۋىرى سەرگەي ستۋدەنت. ۆينستەر اۋلەتىنىڭ ۇلكەن اتالارى 1925 جىلعى قۋعىن-سۇرگىنگە تۇسكەن نەمىس ۇلتىنىڭ وكىلى, 1942-45 جىلدارى قاراعاندى جاقتا ەڭبەك ارمياسىندا بولىپتى. ال بۇگىنگى ۆينستەر اۋلەتى قازاق جەرىن وتانىمىز, ەلىمىز دەپ تاعدىرلارىن وسى جەرگە بايلاپتى. «ەكىباستۇز ءبىز ءۇشىن جەر ءجانناتى, سۇيىكتى قالامىز, ءبىز قازاقستاندىقتارمىز», –دەيدى ۆينستەر. مۇنى كىشكەنتايىنان ەستىپ وسكەن نيكولايدىڭ ءوز ەلىنىڭ, تۋعان قالاسىنىڭ پاتريوتى اتانۋى دا سوندىقتان بولسا كەرەك. ەرجەتكەن سوڭ قاتارلاستارىنىڭ اراسىنان وزا شىعىپ, كوشباسشى-ليدەرلىك قابىلەت-دارىنىن بايقاتىپ ۇلگەردى.
– اۋىلعا قالاي اكىم بولىپ ءجۇرسىڭ؟ – دەپ سۇراپ جاتىرمىز.
– اۋىل ماعان تاڭسىق ەمەس. قازىر جوسپار-جوبالارىم كوپ. قۇدايكول اۋماعىنا قاراستى قاراسور اۋىلى بار. ءوندىرىستى اۋىلدار. كەن بايىتۋ كومبيناتى جۇمىس جاسايدى. اۋىلدىقتار ءۇشىن جۇمىس بار. جاقسى ءومىر قالادا عانا ەمەس قوي, كەرىسىنشە, اۋىلدان جۇمىس باستاپ, ءومىر كورگەن جاقسى دەپ ويلايمىن. شىڭدالاسىڭ, تاجىريبە جيناقتايسىڭ. مەن بۇعان دەيىن ەكىباستۇزدىڭ الكەي مارعۇلان اتىنداعى اۋىلىندا اۋىلدىق اكىمدىكتە باس مامان بولىپ قىزمەت ەتتىم. باس مامان بولا ءجۇرىپ, «ەكىباستۇز وڭىرىندەگى اگروكەشەندەردىڭ دامۋى جايلى» دەگەن تاقىرىپتا باعدارلاما جازىپ, ارنايى سەرتيفيكات الدىم. قۇدايكولگە اكىم بولعانعا دەيىن بۇل اۋىلدا دا باس مامان بولدىم. ال وتكەن جىلدىڭ تامىز ايىندا وسى اۋىلعا اكىم بولىپ سايلاندىم. اۋىلدىقتار, ورالمان اعايىندار بار, بارىمەن قازاق تىلىندە ازداپ سويلەسە باستادىم, جالپى, قازاقشانى جاقسى تۇسىنەمىن. قاسىمدا اكىمدىكتىڭ باس مامانى اقان سەيىلحانوۆ اعامىز بار, ءالى-اق قازاقشانى جاقسىلاپ ۇيرەنىپ الامىن دەپ ويلايمىن. باستىسى – اۋىلدىڭ الەۋمەتتىك جاعدايىن قولعا الىپ, ءار ۇيگە سۋ كەلتىرۋ, جول جوندەۋ مىندەت. اۋىلدىڭ كۇندەلىكتى تىنىس-تىرشىلىگى كوپ, – دەيدى ن.ۆينس.
– ءوزىڭ ءالى ۇيلەنبەپسىڭ دە. كەلىندى وسى قۇدايكولدەن الساڭ قايتەدى؟ – دەيمىز ازىلدەي.
– بولسا, سولاي دا بولىپ قالار, تويعا شاقىرامىن عوي, – دەيدى ك ۇلىپ ول دا.
ءبىز جاستىق جىگەرمەن اۋىلعا كەلىپ, اكىمدىك قىزمەتكە ارالاسقان نيكولايمەن قوشتاستىق. جالپى, ەكىباستۇزدىقتار قۇدايكول اۋىلى جايلى سۇراي قالساڭ, «ءا, وندا قازىر نەمىس بالا اكىم بولىپ ءجۇر», دەپ قولداپ, تىلەكتەستىك ءبىلدىرىپ جاتادى. ءبىز دە ن.ۆينسكە ىسكە ءسات, قۇدايكولدىڭ اكىمى دەيمىز.
فاريدا بىقاي,
«ەگەمەن قازاقستان».
پاۆلودار وبلىسى,
ەكىباستۇز قالاسى.