ءومىر جايلى توقتاۋسىز تولعام جاساۋعا بولادى. ايتكەنمەن, ونىڭ ءمانىن ءبىر تۇيىنگە توپتاستىرعان دا ەشكىم جوق. ماسەلە – ءومىر سۇرە بىلۋدە. تىرشىلىكتىڭ وسىناۋ قاراپايىم دا قاسيەتتى زاڭدىلىعىن تەڭ ۇستاعان ازاماتتار بارشىلىق ارامىزدا. سولاردىڭ ءبىرى دارىگەر – ايريك اكوپيان. «تىرشىلىكتىڭ تۇتقاسى ادال ەڭبەكتە», دەيدى ول. قاعيداتقا بەرىكتىگىن ءومىر بويى دالەلدەپ تە كەلەدى.
جۇرتشىلىقتىڭ جىلى لەبىزى جەلپىنتكەنى شىعار, الدىمەن ايريك اندرونيكوۆيچ جايلى كەڭ كوسىلىپ جازساق دەگەن وي بولعان. اسا قۇلشىنا قويمادى. قولىما ارەكەڭدى جۋىرداعى جەتپىس جاسىمەن قۇتتىقتاعان ۇجىمىنىڭ لەبىز حاتىن ۇستاتتى. ماقتاۋ-ماداقتاۋعا دا جۇتاڭداۋمىز عوي. ءدارىگەرلەردىڭ مىنەزىمەن قىسقا قايىرىلىپتى. بىراق, «التىن قولدى ازامات!» دەگەن ءسوز بار ەكەن. بۇل كاسىبي وتاشىنىڭ قىزمەتىن بىلىكتى ماماندار مويىنداعان جوعارى باعا ەكەندىگى داۋسىز. ەڭبەگىمەن ەلگە ەلەندى دەگەنىڭىز وسى.
ايريك اكوپيان ەرەۆان مەديتسينالىق ينستيتۋتىن بىتىرىسىمەن ەڭبەك جولىن كوكشەتاۋ (قازىرگى اقمولا) وبلىستىق اۋرۋحاناسىندا باستاعان. مىنە, وعان دا 47 جىلدان اسىپ بارادى. بۇگىنگى كۇنى دە ابىرويلى ساپتا. جوعارى دارەجەلى ماماننىڭ كاسىبي جولىن ول اتقارعان 40 مىڭنان استام وتامەن, وبلىستى بىلاي قويىپ, وزگە ايماقتاردان ادەيى ىزدەپ كەلگەن ادامداردى قابىلداۋلارىمەن, ءۇمىت وتىن ۇشقىنداتقان كەڭەستەرىمەن بايلانىستىرۋعا بولادى. ارەكەڭ بىلىكتى وتاشى مامانداردىڭ بىرنەشە بۋىنىن ءتاربيەلەدى. ولار قازىرگى كەزدە قازاقستان رەسپۋبليكاسىنىڭ تۇكپىر-تۇكپىرىندە, رەسەيدە, بەلورۋسسيادا, ازەربايجاندا, ءتىپتى, گەرمانيادا, اقش-تا, كانادا مەن يزرايلدە جەمىستى ەڭبەك ەتۋدە.
التىن قولدى ازامات 1995 جىلى اقمولا وبلىستىق اۋرۋحاناسىندا, رەسپۋبليكامىزدا العاشقىلاردىڭ ءبىرى بولىپ لاپاروسكوپيالىق وتا جاسادى. وسى ارالىقتا ءتورت مىڭنان استام ناۋقاسقا دارىگەرلىك كومەك كورسەتىلىپ, تالاي ءۇيدىڭ قۋانىش شامى جارقىرادى. اتالعان ەڭبەكتەرىنىڭ نەگىزىندە ايريك اندرونيكوۆيچ 1999 جىلى مەديتسينا عىلىمدارىنىڭ كانديداتى عىلىمي اتاعىن قورعادى.
ۇنەمى ىزدەنىس ۇستىندەگى جاننىڭ ىزگىلىك جولىنداعى ەڭبەكتەرى دە ەسكەرۋسىز قالعان جوق. ول «كسرو دەنساۋلىق ساقتاۋ ءىسىنىڭ ۇزدىگى», «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى» اتاقتارىنىڭ يەگەرى جانە ەلباسى نۇرسۇلتان نازارباەۆتىڭ العىس حاتىمەن ماراپاتتالعان. بۇعان قوسا ءبىزدىڭ قادىرلى دارىگەر ءوزىنىڭ ەلىمىزگە تانىمال شاكىرتتەرىمەن ماقتانادى, كەسەلىنە شيپا تاپقان مىڭداعان ادامدارمەن بىرگە قۋانادى.
– مەنىڭ ەڭبەك كىتاپشامدا ءبىر عانا جازۋ بار, – دەيدى ول. ونىڭ باستى سەبەبى, قازاقستانداعى تۇراقتىلىقتا, سان ءتۇرلى ۇلت پەن ۇلىس وكىلدەرىنىڭ بەيبىت قاتار تىرشىلىك كەشۋىندە, ءوزىڭنىڭ دە, بالا-شاعاڭنىڭ دا بولاشاققا الاڭسىز قادام باسۋىندا. ەلباسىمىز ءوزىنىڭ كورەگەن ساياساتى ارقىلى قازاقستان حالقى اسسامبلەياسىن بارشامىزدىڭ وي-پىكىرلەرىمىزدىڭ جۇزەگە اسۋىنا, الداعى كۇندەرگە جاقسى جوسپار قۇرۋىمىزعا مۇمكىندىك جاساۋ ورداسىنا اينالدىردى. ءبىز قازاق حالقىنا وسى ءۇشىن دە قارىزدارمىز.
باقبەرگەن امالبەك,
«ەگەمەن قازاقستان».
اقمولا وبلىسى.