دەپوزيت بويىنشا كوشباسشىلار

قاشاندا قارجىلىق تابەتىنىڭ جوعارى ەكەنىن اڭعارتىپ كەلە جاتقان (جاقىندا سبەردىڭ 330 ملرد تەڭگە كولەمىندەگى نەسيە پورت­فەلىن دە ساتىپ الدى) Halyk Bank دەپوزيت بويىنشا كوشباسشى سانالادى. قارجى ينستيتۋتىنىڭ پورتفەلى اقپاندا 636,1 ملرد تەڭگەگە ءبىر-اق وسكەن. جىل باسىنان بەرى ونداعى سالىم – 712,2 ملرد-قا, سوڭعى ءبىر جىل­دا – 1,74 ترلن-عا ارتقان. ءسوي­تىپ, جالپى سوماسى 9,11 ترلن تەڭگە­نى قۇ­راپ وتىر. بۇل دەگەنىڭىز – ەل­دەگى دەپوزيت نارىعىنىڭ 34,2 پايىزى.

ەكىنشى ورىندا – «امەريكا­لىق» سيتيبانك قازاقستان. بانك سالىم كولەمىن 181,7 ملرد تەڭگە پليۋسكە شىعىپ, 1,09 ترلن تەڭگەگە جەتكىزگەن. بۇل قارجى ينستيتۋتىنىڭ تەك كورپوراتيۆتى سەكتوردا جۇمىس ىستەيتىنىن ايتىپ وتەيىك. ءبىر جىلداعى پورتفەلى 402,6 ملرد تەڭگەگە ۇلعايعان. ۇشتىكتە Kaspi Bank تە بار: ءبىر اي­دا دەپوزيتكە 152,1 ملرد تەڭ­گە قوسىلعان, جالپى سوماسى 2,9 ترلن تەڭگەگە جەتكەن. سالىم پورتفەلىنىڭ 90 پا­يىزدان استامىن جەكە تۇلعالار­دىڭ اقشاسى قۇرايدى.

ال باتىستان سوققان بۇرقا­سىنعا تاپ بولعان ءۇش رەسەيلىك ەنشىلەس بانك – «سبەربانك قازاقستان», «الفا-بانك» جانە ۆتب قازاقستان ايتارلىقتاي اقشا جوعالتىپتى. بۇل قارجى ۇيىمدارى اقپان ايىندا 515,2 ملرد تەڭگەسىنەن ايىرىلعان. ودان بولەك «زامان-بانك» تە ۇتىلعاندار قاتارىندا. سالىمشىلار بۇل يسلام بانكىنەن 0,8 ملرد تەڭگە كولەمىندەگى سومانى كەرى اكەتكەن.

«جاڭا داعدارىسقا, گەوساياسي قىسىمعا, رەسەيلىك ەنشىلەس بانكتەردىڭ ۇتىلىسىنا جانە ءبىزدىڭ باستى ساۋدا سەرىكتەسىمىز رف-نىڭ سانكتسيالىق شەكتەۋ­لەر­گە ۇشىراپ جاتقانىنا قارا­ماستان قازاقستاننىڭ دەپوزيت نارىعى ءپوزيتيۆتى دامىپ جاتىر. حالىقارالىق اگەنتتىكتەر دە ءبىزدىڭ بانك سەكتورىنا, جالپى ەكونوميكاعا وپتيميستىك كوز­قاراسپەن قارايدى. 1 ساۋىردە Standard & Poor’s كەزەكتى رەت قازاق­ستاننىڭ دەربەس نەسيە رەيتينگىن «BBB−/ا-3» (تۇراقتى) دەڭگەيىندە راستادى. ولار تەڭگەلەي سالىمداردى ساقتاۋ ءۇشىن مەملەكەتتىڭ بيۋدجەت قارجىسى ەسەبىنەن تەڭگەلىك دەپوزيتتەردى قورعاۋ مەحانيزمىن ەنگىزگەنىن دە اتاپ ءوتتى. اگەنتتىك دەرەگىنشە, 2022 جىلى قازاقستان ەكونوميكاسىنىڭ ءوسىمى 2 پايىز دەڭگەيىندە بولۋى ءتيىس», دەيدى ساراپشىلار.

دەپوزيت توڭىرەگىندە اڭگىمە قوزعالعان سوڭ, نارىقتان كەتكەن بانكتەردىڭ دەپوزيتتەرى جايلى دا از-كەم ءسوز قوزعايىق. قازىر ەلىمىزدە قىزمەتى توقتاعان 9 بانكتە جيناقتالعان سالىمداردى يەلەرىنە قايتارۋ پروتسەسى بەلسەندى جۇرگىزىلىپ جاتىر. بۇل پروتسەسكە قازاقستاننىڭ دەپوزيتتەرگە كەپىلدىك بەرۋ قورى جاۋاپتى. جاقىندا قور توراعاسى ءادىل وتەمباەۆ ءالى 2,3 ملرد تەڭگەنىڭ قايتارىلماي تۇرعانىن ايتتى. ياعني اتالعان قارجى يەلەرى سومانى قايتارۋ تۋرالى ءوتىنىم بەرمەگەن. قارجىنى ونلاين تۇردە نەمەسە بانك بولىمشەسىنە كەلۋ ارقىلى دا الۋعا بولادى.

«قىزمەتى توقتاعان 8 بانكتەگى سالىمداردى بيىل 1 مامىرعا دەيىن الۋعا بولادى. «Capital Bank Kazakhstan» اق-نىڭ كەشىرەك جويىلۋى سەبەپتى, ونىڭ كليەنتتەرى دە تولەمدەردى 2022 جىلدىڭ 3 شىلدەسىنە دەيىن الا الادى», دەيدى ءا.وتەمباەۆ.

تولەم بەرۋ مەرزىمى اياق­تال­­عان­نان كەيىن قىزمەتى توقتا­عان قار­­جى ينستيتۋتتارىنىڭ – «ۆاليۋت-ترانزيت بانك», «كازين­ۆەست­بانك», Delta Bank, «ەكسيمبانك كازاحستان», Qazaq Banki, «استانا بانك», Tengri Bank جانە AsiaCredit Bank-ءتىڭ شوتىنداعى تالاپ ەتىلمەگەن قاراجات 31 مامىرعا دەيىن ازاماتتاردىڭ بجزق-داعى جەكە زەينەتاقى شوتتارىنا جىبەرى­لەدى. «Capital Bank Kazakhstan» سا­لىمشىلارىنىڭ قارجىسى 2 تا­مىزعا دەيىن زەينەتاقى شوتتارىنا اۋدارىلماق.