قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆتىڭ رەسەي فەدەراتسياسىنا رەسمي ساپارى بولىپ ءوتتى. ماسكەۋگە ساپارى اياسىندا, رەسەيلىك ارىپتەستەرىمەن ەكىجاقتى كەزدەسۋلەردەن باسقا, ەلىمىز سىرتقى ساياسات ۆەدومستۆوسىنىڭ باسشىسى كوپجاقتى فورۋمدار جۇمىسىنا قاتىستى.
ۇجىمدىق قاۋىپسىزدىك شارتى ۇيىمى سىرتقى ىستەر مينيسترلەرىنىڭ كەڭەسىنە قاتىسىپ, ونىڭ شەڭبەرىندە ۇقشۇ-عا مۇشە مەملەكەتتەردىڭ سىرتقى ىستەر مينيسترلەرى سىرتقى ساياسي قىزمەتتى ۇيلەستىرۋ قىرلارىن, حالىقارالىق جاعدايدىڭ نەگىزگى دامۋ ۇردىستەرىن, سونىمەن قاتار, ۇيىمنىڭ جاۋاپكەرشىلىگى اياسىنداعى باسقا دا قاۋىپسىزدىكتى قامتاماسىز ەتۋ ماسەلەلەرىن تالقىعا سالدى.
وتىرىس قورىتىندىسى بويىنشا ۇقشۇ-عا مۇشە مەملەكەتتەر وكىلدەرىنىڭ سىرتقى ساياسات, قاۋىپسىزدىك جانە قورعانىس ماسەلەلەرى جونىندەگى كەڭەسۋ جوسپارى بەكىتىلدى. سونداي-اق, ۇقشۇ سىرتقى ىستەر مينيسترلەرى كەڭەسىنىڭ اۋعانستانداعى پرەزيدەنت سايلاۋىنا بايلانىستى جانە سيرياداعى احۋال بويىنشا ءبىرلەسكەن مالىمدەمەسى بەكىتىلىپ, ۇيىمداستىرۋ جانە ۇدەرىستىك سيپاتتاعى بىرقاتار شەشىمدەر قابىلداندى.
ۇقشۇ سىمك-ءنىڭ كەلەسى وتىرىسى 2014 جىلدىڭ ەكىنشى جارتىسىندا ۇقشۇ مەملەكەت باسشىلارى دەڭگەيىندەگى ۇجىمدىق قاۋىپسىزدىك كەڭەسىنىڭ كەزەكتى سەسسياسىنىڭ قارساڭىندا ماسكەۋدە وتەتىن بولادى.
ە.ىدىرىسوۆ تمد سىرتقى ىستەر مينيسترلەرىنىڭ كەزەكتى كەڭەسىنە قاتىستى. سىرتقى ساياسات ۆەدومستۆولارىنىڭ باسشىلارى حالىقارالىق ساياساتتاعى وزەكتى ماسەلەلەردى, سونىڭ ىشىندە ۋكرايناداعى سوڭعى جاعدايلاردى تالقىعا سالدى. 2013 جىلعا ارنالعان تمد اياسىنداعى كوپدەڭگەيلى ءسىم-ارالىق كەڭەستەردىڭ جوسپارىن ىسكە اسىرۋ بارىسى قاراستىرىلدى. اتالعان قۇجات 10 كونسۋلتاتسيالاردى, سونىڭ ىشىندە بۇۇ, ەقىۇ شەڭبەرىندەگى ءوزارا ىقپالداسۋ ماسەلەلەرى جونىندە كەڭەس وتكىزۋ, قارۋسىزدانۋ سالاسىنداعى ىنتىماقتاستىق جانە باسقا دا ماسەلەلەردى قامتيدى.
وتىرىس بارىسىندا ەسىرتكى اينالىمىن حالىقارالىق قاداعالاۋ جۇيەسىن ساقتاپ قالۋ جانە نىعايتۋ جونىندە تمد سىمك-ءنىڭ مالىمدەمەسى قابىلداندى. وندا بۇۇ-نىڭ ورتالىقتانعان ءۇيلەستىرۋشى ءرولىن كۇشەيتۋ قاجەتتىلىگى اتاپ ءوتىلىپ, عالامدىق ەسىرتكى ترافيگى ماسەلەلەسىن شەشۋدە حالىقارالىق كۇش-جىگەردىڭ ءتيىمدىلىگىن ارتتىرۋ جولدارى تۋرالى كونسترۋكتيۆتى ءۇنقاتىسۋعا دايىن ەكەندىگى راستالدى.
كۇن ءتارتىبى ماسەلەلەرىنىڭ ءبىرى تمد-نىڭ جوعارى ورگاندارى – مەملەكەت باسشىلارى كەڭەسى مەن ۇكىمەت باسشىلارى كەڭەسىنىڭ مازمۇندىق بولىگىن دايىنداۋ بولدى. وسىعان وراي, «2016 جىلدى تمد-داعى ءبىلىم جىلى دەپ جاريالاۋ», «ونكولوگيالىق اۋرۋلارعا قارسى ارەكەتتەر جاساۋ سالاسىنداعى ىنتىماقتاستىق تۇجىرىمداماسىنىڭ جوباسى تۋرالى», «2020 جىلعا دەيىنگى كەزەڭگە ۇلتتىق سپورت تۇرلەرىن قولداۋ جانە دامىتۋ باعدارلاماسى مەن ونى 2015-2017 جىلدار ارالىعىندا ىسكە اسىرۋ جوسپارى», «توپوگەودەزيا سالاسىنداعى ىنتىماقتاستىق ءجونىندە كەلىسىم مەن تمد-عا مۇشە مەملەكەتتەر قارۋلى كۇشتەرىن ناۆيگاتسيالىق قامتاماسىز ەتۋ جوبالارى تۋرالى», «گۋمانيتارلىق ميناسىزداندىرۋ سالاسىنداعى قارۋلى كۇشتەردىڭ ينجەنەرلىك اسكەردىڭ ىنتىماقتاستىعى تۋرالى كەلىسىم» جوبالارى قارالىپ, ماقۇلداندى.
«ەگەمەن-اقپارات».