شەللي بەركلي, اقش-تىڭ كونگرەسس-ۆۋمەنى:
– قازاقستان – اقش-تىڭ وتە ماڭىزدى ستراتەگيالىق ارىپتەسى. 1991 جىلى قازاقستان پرەزيدەنت نۇرسۇلتان نازارباەۆتىڭ باسشىلىعىمەن سەمەي يادرولىق پوليگونىن جاۋىپ, الەمدەگى ءتورتىنشى يادرولىق ارسەنالدان ءوز ەركىمەن باس تارتۋ تۋرالى ەرلىككە پارا-پار شەشىم قابىلدادى. قازاقستان وسى ۋاقىتقا دەيىن مۇنداي باتىل دا كەمەڭگەرلىك قادام جاساعان, الەمگە قاۋىپسىزدىك جولىن كورسەتكەن ءبىردەن-ءبىر مەملەكەت بولىپ تابىلادى. ءبىز جاھاندىق قاۋىپسىزدىكتى قامتاماسىز ەتۋ جولىنداعى قازاقستاننىڭ وراسان زور ۇلەسى ءۇشىن شەكسىز ريزامىز. وسى جولداعى قازاقستاننىڭ كوشباسشىلىعى جانە ونىڭ يادرولىق قارۋدى تاراتپاۋ سالاسىنداعى اقش-پەن جوعارى ىنتىماقتاستىعى باسقا مەملەكەتتەر ءۇشىن ۇلگى بولۋعا ءتيىس.
روبەرت ۆەكسلەر, كونگرەسسمەن-دەموكرات,
دجوزەف پيتتس, كونگرەسسمەن-رەسپۋبليكالىق:
– جالپى قىرىپ-جويۋ قارۋىن تاراتۋعا جانە لاڭكەستىككە قارسى ءبىزدىڭ جاھاندىق كۇرەسىمىزدە پرەزيدەنت نۇرسۇلتان نازارباەۆ باستاعان قازاقستان حالقى مەن ۇكىمەتى قۇراما شتاتتاردىڭ بەرىك وداقتاسى بولىپ تابىلادى. قۇراما شتاتتاردىڭ حالىقارالىق قاۋىمداستىقپەن ءوزارا ءىس-قيمىل شەڭبەرىندە تاياۋ شىعىستا دەموكراتيانى ورنىقتىرۋ جانە يراكتى قالپىنا كەلتىرۋ ماسەلەلەرىندە قازاقستانمەن بايلانىستى بارىنشا نىعايتۋ اقش-تىڭ مەملەكەتتىك مۇددەلەرىنە تولىق جاۋاپ بەرەدى.
دەن دەۆيسون, حالىقارالىق ءبىلىم بەرۋ كەڭەسىنىڭ پرەزيدەنتى:
– سول شارادا پرەزيدەنت نۇرسۇلتان نازارباەۆتىڭ تاراپىنا اسا جوعارى باعا بەرىلدى, رەسمي ۆاشينگتوننان مۇنداي جوعارى باعا الۋ وتە قيىن. سوندىقتان مەن وسى ۋاقىتقا دەيىن مۇنداي لايىقتى جوعارى باعا العان شەتەلدىك باسشىنى ايتا المايمىن.
ميتچەلل ريسە, حالىقارالىق ساراپشى, اقش مەملەكەتتىك دەپارتامەنتىنىڭ ساياساتتى جوسپارلاۋ جونىندەگى ەكس-ديرەكتورى:
– بۇگىندە قازاقستان پلانەتادا تۇراقتىلىقتى جانە بەيبىتشىلىكتى قامتاماسىز ەتۋ جولىندا جانە ادامزاتتىڭ مۇددەسى ءۇشىن ەرىكتى تۇردە ۇستامدىلىق تانىتقان مەملەكەت رەتىندە الەمگە ۇلگى بولىپ تابىلادى. قازاقستان يادرولىق ارسەنالدان باس تارتقان جانە يادرولىق سىناق پوليگونىن جاپقان الەمدەگى ءبىرىنشى مەملەكەت رەتىندە ايرىقشا ورىن الادى. بۇل مەملەكەتتىڭ يادرولىق قارۋدى تاراتپاۋعا دەگەن ۇستانىمى يادرولىق قارۋعا قۇشتار مەملەكەتتەر ءۇشىن ىقپالدى جانە ىزگىلىكتى ساباق بولا الادى.