ەلىمىزدە ەڭ تومەنگى جالاقى مولشەرىن ارتتىرۋ ماسەلەسى قايتا قارالىپ جاتىر. قازىرگى 85 مىڭ تەڭگە كولەمىندەگى ەڭ تومەنگى جالاقىنى 150 مىڭ تەڭگەگە دەيىن جەتكىزۋ جوسپارلانىپ وتىر, دەپ جازادى Egemen.kz.
بۇل تۋرالى ۇكىمەت كۋلۋارىندا ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين مالىمدەدى. ونىڭ ايتۋىنشا, باستاما حالىق تابىسىن ارتتىرۋعا ارنالعان كەشەندى باعدارلاما اياسىندا قاراستىرىلىپ جاتىر. قازىر قازاقستاندا ەڭ تومەنگى جالاقى 85 مىڭ تەڭگەنى قۇرايدى. ال حالىقارالىق تاجىريبەدە ەڭ تومەنگى جالاقى كوبىنە مەديانالىق جالاقىنىڭ 50%-ىنا تەڭ بولادى. قازاقستانداعى مەديانالىق جالاقى شامامەن 302 مىڭ تەڭگە دەڭگەيىندە ەكەن. وسىعان سايكەس, ەڭ تومەنگى جالاقىنى 150 مىڭ تەڭگەگە دەيىن جەتكىزۋ نەگىزگى مىندەتتەردىڭ ءبىرى رەتىندە بەلگىلەنگەن.
ءماجىلىس ەڭ تومەنگى جالاقىعا قاتىستى كونۆەنتسيانى راتيفيكاتسيالادى
سونىمەن قاتار, بۇل شەشىمنىڭ قاشان قابىلداناتىنى بيۋدجەت مۇمكىندىكتەرىنە بايلانىستى بولماق. ۆيتسە-ءمينيستردىڭ ايتۋىنشا, ماسەلە كەشەندى ءارى كۇردەلى بولعاندىقتان, جۇزەگە اسۋ مەرزىمى ازىرگە ناقتىلانباعان.
كەشەندى باعدارلاما شەڭبەرىندە بيزنەسكە قولداۋ كورسەتۋ شارالارى دا قاراستىرىلعان. بۇگىندە كاسىپكەرلەر ءۇشىن باستى ماسەلە – ۇزاق مەرزىمدى ءارى قولجەتىمدى قارجىنىڭ تاپشىلىعى. قازىرگى تاڭدا بازالىق مولشەرلەمە 18% دەڭگەيىندە تۇر. وسىعان بايلانىستى مەملەكەت بانكتەر ارقىلى بەرىلەتىن نەسيەلەردى سۋبسيديالاپ, كەپىلدىك بەرۋ تەتىكتەرىن ىسكە قوسىپ وتىر. ناتيجەسىندە نەسيە قۇنىن 12%-عا دەيىن تومەندەتۋ كوزدەلگەن, بۇل ءوز كەزەگىندە جاڭا جۇمىس ورىندارىن اشۋعا جانە جاڭا جوبالاردى جۇزەگە اسىرۋعا مۇمكىندىك بەرەدى.
قازاقستاندا ەڭ تومەنگى جالاقىنى كىمدەر الادى؟
بۇعان دەيىن اتالعان باعدارلاما بويىنشا بيۋدجەت سالاسى قىزمەتكەرلەرىنىڭ جالاقىسىن ارتتىرۋ ماسەلەسىن ەنگىزۋ مۇمكىندىگى دە ايتىلعان. ناقتى ۇسىنىستاردى مامىر ايىندا تانىستىرۋ جوسپارلانىپ وتىر.
قازاقستاندا 2026 جىلدان باستاپ ەڭ تومەنگى جالاقى مولشەرى ارتادى