قازاقستاننىڭ دەنساۋلىق ساقتاۋ جۇيەسىندە جاساندى ينتەللەكت تەحنولوگيالارىن كەزەڭ-كەزەڭىمەن ەنگىزۋگە ارنالعان جاڭا نورماتيۆتىك قۇجات ازىرلەندى. بۇل باستاما مەديتسينالىق قىزمەتتەردىڭ ساپاسى مەن تيىمدىلىگىن ارتتىرۋعا باعىتتالعان, دەپ جازادى Egemen.kz.
دەنساۋلىق ساقتاۋ مينيسترلىگىنىڭ مالىمەتىنشە, قۇجات مەملەكەت باسشىسىنىڭ جولداۋىندا بەرىلگەن تاپسىرمانى ورىنداۋ شەڭبەرىندە دايىندالعان. وندا جاساندى ينتەللەكت ارقىلى مەديتسينالىق قىزمەتتەردىڭ ساپاسى مەن كولەمىن مونيتورينگتەۋدىڭ جاڭا جۇيەسىن قالىپتاستىرۋ مىندەتى كوزدەلگەن.
جاڭا ءتارتىپ دەنساۋلىق ساقتاۋ سالاسىنا جي ەنگىزۋدىڭ اشىق, قاۋىپسىز جانە عىلىمي نەگىزدەلگەن مودەلىن قالىپتاستىرۋعا باعىتتالعان. سونىمەن قاتار شەشىمدەردىڭ كلينيكالىق جانە ەكونوميكالىق تيىمدىلىگىن مىندەتتى تۇردە باعالاۋ قاراستىرىلعان. بۇل ولاردىڭ پراكتيكالىق قولدانىسىن جانە كەڭ اۋقىمدا ەنگىزىلۋ تۇراقتىلىعىن قامتاماسىز ەتەدى.
قۇجاتتا جاساندى ينتەللەكت جۇيەلەرىن ەنگىزۋ مەن پايدالانۋدىڭ بىرىڭعاي تاسىلدەرى بەلگىلەنگەن. ول مەديتسينالىق بۇيىم رەتىندە قاراستىرىلاتىن باعدارلامالىق شەشىمدەردى دە, سونداي-اق باسقارۋشىلىق جانە اكىمشىلىك پروتسەستەردە قولدانىلاتىن كلينيكالىق ەمەس قۇرالداردى دا قامتيدى.
سالادا العاش رەت جي تەحنولوگيالارىن ەنگىزۋدىڭ كەزەڭ-كەزەڭىمەن جۇزەگە اسىرىلاتىن ناقتى الگوريتمى ايقىندالدى. ول ءوتىنىم بەرۋدەن باستاپ تەحنولوگيالىق دايىندىقتى باعالاۋ, پيلوتتىق سىناقتان وتكىزۋ, قاجەت بولعان جاعدايدا تىركەۋ راسىمدەرى مەن سەنىمدى شەشىمدەر تىزبەسىنە ەنگىزۋ جانە كەيىنگى كەڭەيتۋ كەزەڭدەرىن قامتيدى.
«Ascle» جوباسى: جاساندى ينتەللەكت دارىگەر قابىلداۋىنداعى كەزەكتى ازايتۋعا كومەكتەسەدى
قۇجاتتا شەشىمدەردىڭ تيىمدىلىگى مەن قاۋىپسىزدىگىن دالەلدەۋگە ەرەكشە ءمان بەرىلگەن. بيوەتيكالىق ساراپتاما, كلينيكالىق ۆاليداتسيا جانە دەنساۋلىق ساقتاۋ تەحنولوگيالارىن باعالاۋ تەتىكتەرى ەنگىزىلەدى. پيلوتتىق جوبالار بارىسىندا الگوريتمدەردىڭ دالدىگى مەن سەزىمتالدىعى, ولاردىڭ كلينيكالىق شەشىمدەرگە ىقپالى جانە مەديتسينا قىزمەتكەرلەرىنىڭ جۇكتەمەسىنە اسەرى جان-جاقتى تالدانادى.
سونىمەن بىرگە, سەنىمدى جاساندى ينتەللەكت جۇيەلەرىنىڭ تىزبەسىن قالىپتاستىرۋ جانە ولاردى ەنگىزگەننەن كەيىنگى مونيتورينگ جۇيەسىن دامىتۋ كوزدەلگەن. بۇل جۇيەلەردىڭ قاۋىپسىزدىگى مەن تيىمدىلىگى تۇراقتى باقىلاۋدا بولادى.
قۇجات اقپاراتتىق قاۋىپسىزدىك پەن دەربەس دەرەكتەردى قورعاۋ تالاپتارىن كۇشەيتۋدى, سونداي-اق بارلىق قاتىسۋشىلاردىڭ – ازىرلەۋشىلەردەن باستاپ مەديتسينالىق ۇيىمدار مەن پايدالانۋشىلارعا دەيىن – جاۋاپكەرشىلىگىن ناقتىلاۋدى قاراستىرادى.
مينيسترلىك وكىلدەرىنىڭ ايتۋىنشا, جاڭا بۇيرىق تەڭگەرىمدى رەتتەۋشى ورتا قالىپتاستىرىپ, جاساندى ينتەللەكت تەحنولوگيالارىن قاۋىپسىز ءارى باقىلاناتىن تۇردە ەنگىزۋگە مۇمكىندىك بەرەدى. بۇل ءوز كەزەگىندە قازاقستاننىڭ دەنساۋلىق ساقتاۋ جۇيەسىن تسيفرلىق ترانسفورماتسيالاۋدى جەدەلدەتۋگە جول اشادى.
جاساندى ينتەللەكت ينسۋلتتان بولاتىن ءولىم-ءجىتىمدى 40%-عا تومەندەتكەن