ەلوردادا كيبەرسپورت جانكۇيەرلەرى ءۇشىن ءىرى وقيعا وتپەك. استانادا PGL Astana 2026 حالىقارالىق ءتۋرنيرى ۇيىمداستىرىلىپ, وعان الەمنىڭ ۇزدىك كوماندالارى جينالادى. بۇل دودا Counter-Strike 2 بويىنشا ءوتىپ, ميلليونداعان كورەرمەن نازارىن وزىنە اۋدارماق, دەپ جازادى Egemen.kz.
استانا قالاسى تاعى دا جاھاندىق كيبەرسپورت ورتالىقتارىنىڭ بىرىنە اينالۋعا مۇمكىندىك الىپ وتىر. تۋرنير 15–17 مامىر ارالىعىندا Barys Arena الاڭىندا وتەدى. جارىسقا الەمدىك دەڭگەيدەگى 16 كوماندا قاتىسادى.
ايتا كەتەيىك, 2025 جىلعى تۋرنير جوعارى دەڭگەيدە ۇيىمداستىرىلىپ, ونلاين قارالىم كورسەتكىشى رەكوردتىق دەڭگەيگە جەتكەن ەدى. حالىقارالىق اۋديتوريا تاراپىنان ۇلكەن قىزىعۋشىلىق تانىتىلىپ, استانانىڭ كيبەرسپورت كارتاسىنداعى ورنى نىعايا ءتۇستى. ال 2026 جىلعى تۋرنير – وسى جەتىستىكتىڭ زاڭدى جالعاسى.
1,5 ملن-نان استام قازاقستاندىق كيبەرسپورتپەن اينالىسادى
استانا قالاسى اكىمدىگىنىڭ مالىمەتىنشە, جارىستى ۇيىمداستىرۋشى – PGL Esports SRL. كومپانيا الەمدەگى ءىرى كيبەرسپورت تۋرنيرلەرىن وتكىزەتىن جەتەكشى وپەراتورلاردىڭ ءبىرى سانالادى.
بيىلعى دودانىڭ ەرەكشەلىگى – جۇلدە قورىنىڭ ارتۋى. 2026 جىلى جالپى جۇلدە قورى 1,6 ملن دوللارعا دەيىن ۇلعايتىلدى. بۇل كورسەتكىش ءتۋرنيردى Counter-Strike 2 بويىنشا وتەتىن ءىرى جارىستاردىڭ, سونىڭ ىشىندە مەيدجور دەڭگەيىندەگى دودالاردان دا جوعارى سىياقىسى بار تۋرنيرلەر قاتارىنا قوسادى.
وسىلايشا, PGL Astana 2026 قازاقستاننىڭ كيبەرسپورت يندۋسترياسىنداعى بەدەلىن ارتتىرىپ, ەلوردانى حالىقارالىق دەڭگەيدەگى ماڭىزدى الاڭداردىڭ بىرىنە اينالدىرۋعا ىقپال ەتپەك.
پاتريوتيزم, كيبەرسپورت, تەحنولوگيا: ونلاين مارافوندا قوعام ءۇشىن وزەكتى تاقىرىپتار تالقىلاندى