كەشە استانادا ابايسىزدا ەسىلدەگى مۇزدىڭ استىنا ءتۇسىپ كەتكەن ەكى بالا قۇتقارىلدى. اعايىندى الدابەرگەن جانە قۇدايبەرگەن بەكتانوۆتار ساعات 11:00 شاماسىندا «الاتاۋ» سپورت كەشەنىندە وتكەن دزيۋدو جاتتىعۋىنان شىققان ەكەن.
ەكى بالا ويناپ كەلە جاتىپ ەسىل وزەنىنە سىرعاناي جونەلەدى. سول بويى ويىلعان مۇزدىڭ استىنا كۇمپ بەرەدى. ولاردىڭ كومەككە شاقىرىپ ۇلگەرگەن داۋىستارىن ەستىپ قالعان ەكى جاس جىگىت بىردەن وزەن ارناسىنا قاراي قۇستاي ۇشادى. ولار سۋعا باتىپ بارا جاتقان بالالاردى سىرتقا تارتىپ الادى. ال اعايىندى بالاقايلاردى اجالدىڭ تىرناعىنان امان الىپ قالعان ماقسات بەيىسوۆ پەن دوسحان مۇسا-ناماز ىشكى ىستەر مينيسترلىگى ۇكىمەتتىك مەكەمەلەردى كۇزەتۋ جونىندەگى پوليتسيا پولكىنىڭ قىزمەتكەرلەرى بولىپ شىقتى.
سۋعا كەتىپ قالا جازداعان بالالارعا سوسىن «الاتاۋ» كەشەنىندە العاشقى كومەك كورسەتىلگەن. «دارىگەرلەر بىزگە دە كومەكتەستى. ەكى بالانىڭ جاعدايى قازىر جاقسى. اكە-شەشەسى كەلدى. ءبارى ويداعىداي», دەدى قۇتقارۋشىلار.
بالالاردىڭ اكەسى تولقىن بەكتانوۆتىڭ ايتۋىنشا, جۇمىستا جۇرگەنىندە جاتتىقتىرۋشىلار حابارلاسىپ, بالالاردىڭ سۋعا ءتۇسىپ كەتكەنىن جەتكىزگەن. وقيعا ورنىنا بىردەن جەتكەن ول بالالارىن قۇتقارىپ العان جىگىتتەرگە العىسىن جاۋدىردى.
رۋسلان يگىلىك.