پەكيندەگى رەسەي مادەني ورتالىعىندا قازاقستاننىڭ قحر-داعى ەلشىلىگىنىڭ ۇيىمداستىرۋىمەن «وتتى وزەن» كوركەم ءفيلمىنىڭ كورسەتىلىمى ءوتتى.
شاراعا قحر سىرتقى ىستەر ءمينيسترىنىڭ ورىنباسارى چەن گوپين, قكپ ورتالىق كوميتەتىنىڭ حالىقارالىق ءبولىمى باسشىسىنىڭ ورىنباسارى چجوۋ لي, شىۇ باس حاتشىسى د.مەزەنتسەۆ, رەسەي, بەلارۋس, گرۋزيا, وزبەكستان, ازەربايجان, تاجىكستان, ۆەتنام جانە باسقا ەلدەر ەلشىلىكتەرىنىڭ باسشىلارى مەن وكىلدەرى قاتىستى.
قازاقستاننىڭ قىتايداعى ەلشىسى نۇرلان ەرمەكباەۆ «ەلباسى جولى» كينوەپوپەياسىنىڭ ەكىنشى ءبولىمى بولىپ تابىلاتىن «وتتى وزەن» ءفيلمى جاس ۇرپاق ءۇشىن ەڭبەكتى قادىرلەۋدىڭ, وتاندى ءسۇيۋدىڭ ۇلگىسى ەكەنىن, ولاردى ۇلتارالىق كەلىسىم يدەيالارىنا تاربيەلەيتىنىن اتاپ ءوتتى.
شارانىڭ اشىلۋىندا ءسوز سويلەگەن قحر سىرتقى ىستەر ءمينيسترىنىڭ ورىنباسارى چەن گوپين « ۇلى ۇلتتان ۇلى باسشىلار تۋاتىنىن», سونداي-اق, ن.نازارباەۆ قازاقستاننىڭ ۇلتتىق باسشىسى عانا ەمەس, الەمدەگى ەڭ بەدەلدى ساياساتكەرلەردىڭ ءبىرى بولىپ تابىلاتىنىن اتاپ كورسەتتى.
ول, سونداي-اق, ازياداعى ءوزارا ءىس-قيمىل جانە سەنىم شارالارى جونىندەگى كەڭەس, الەمدىك جانە ءداستۇرلى دىندەر كوشباسشىلارىنىڭ سەزى سياقتى ايتۋلى فورۋمدارعا ن.نازارباەۆ باستاماشىلىق تانىتقانىن, ونىڭ اكتيۆىندە جاھاندىق يادرولىق قارۋسىزدانۋ سەكىلدى ۇلكەن باستاما دا بار ەكەنىن اتاپ ءوتتى. قىتايلىق ديپلوماتتىڭ ايتۋىنشا, وسىنىڭ بارلىعى قازاقستانعا كەڭ كولەمدى الەمدىك تانىمالدىق اكەلدى.
چەن گوپين, سونىمەن قاتار, اتالعان كوركەم فيلم قازاقستان پرەزيدەنتىنىڭ تۇلعا بولىپ قالىپتاسۋىنىڭ جولىمەن, قازاق حالقىنىڭ تاريحى جانە ۇلتتىق داستۇرلەرىمەن تەرەڭىرەك تانىس بولۋعا مۇمكىندىك بەرەتىنىن ايتتى.
فيلم كورسەتىلىمىندە رەسەي مادەني ورتالىعىنىڭ ديرەكتورى ۆ.كوننوۆ تا ءسوز سويلەدى. ول «وتتى وزەن» ءفيلمىن ورتالىقتىڭ قابىرعاسىندا كورسەتۋ تمد كەڭىستىگىندەگى مادەني-گۋمانيتارلىق بايلانىستار مەن دوستىقتى نىعايتۋعا مۇمكىندىك بەرەتىنىن كولدەنەڭ تارتتى.
«ەگەمەن-اقپارات».