ەلورداداعى ۇلتتىق اكادەميالىق كىتاپحانادا
يۋنەسكو جانە يسەسكو ىستەرى جونىندەگى قازاقستان رەسپۋبليكاسى ۇلتتىق كوميسسياسى جانىنداعى ماتەريالدىق ەمەس مادەني مۇرالاردى قورعاۋ جونىندەگى ۇلتتىق كوميتەتتىڭ التىنشى وتىرىسى بولدى.
2003 جىلى پاريجدە قابىلدانعان «ماتەريالدىق ەمەس مادەني مۇرانى قورعاۋ تۋرالى» كونۆەنتسيا 2011 جىلى 23 جەلتوقساندا قازاقستان تاراپىنان ماقۇلدانعان بولاتىن. وسىعان بايلانىستى يۋنەسكو جانە يسەسكو ىستەرى بويىنشا ەلىمىزدىڭ ۇلتتىق كوميسسياسى جانىنان ماتەريالدىق ەمەس مادەني مۇرالاردى قورعاۋ ءجونىندەگى ۇلتتىق كوميتەت قۇرىلدى.
ەلباسىنىڭ 2003 جىلعى قازاقستان حالقىنا جولداۋى نەگىزىندە دۇنيەگە كەلگەن مەملەكەتتىك «ءمادەني مۇرا» باعدارلاماسى شەڭبەرىندە وشكەنىمىز جانىپ, جوعالعانىمىز جاڭعىردى. مادەني مۇرالارىمىزدى جيناۋ, جۇيەلەۋ جولىندا ماتەريالدىق نىساندار باستى نازاردا بولىپ, رۋحاني قۇندىلىقتارىمىزدىڭ كەيبىرىن ەلەۋسىزدەۋ قالدىرعانىمىز راس.
سوعان قاراي, 2013 جىلى 29 ساۋىردە ۇكىمەتتىڭ №408 قاۋلىسىمەن «قازاقستان رەسپۋبليكاسىندا ماتەريالدىق ەمەس مۇرانى قورعاۋ جانە دامىتۋ جونىندەگى تۇجىرىمداما» قابىلداندى. تۇجىرىمدامانىڭ ماقساتى – قازاقستان حالقىنىڭ ماتەريالدىق ەمەس مادەني مۇراسىن قورعاۋ, دامىتۋ جانە ناسيحاتتاۋ ءۇشىن قولايلى جاعدايلار جاساۋ بولىپ بەلگىلەندى.
مادەنيەت مينيسترلىگى, يۋنەسكو جانە يسەسكو ىستەرى ءجونىندەگى ۇلتتىق كوميسسياسى جانىنداعى ماتەريالدىق ەمەس ءمادەني مۇرالاردى قورعاۋ ءجونىندەگى ۇلتتىق كوميتەتىنىڭ ۇيىمداستىرۋىمەن وتكەن باسقوسۋدا ادامزاتتىڭ ماتەريالدىق ەمەس مادەني مۇراسىنىڭ كورنەكى ءتىزىمىنە جانە يۋنەسكو-نىڭ جەدەل قورعاۋ تىزىمىنە ەنگىزۋ ءۇشىن ۇلتتىق ءوتىنىم بەرۋ جونىندە ماسەلەلەر قارالىپ, وعان ەلىمىزدىڭ قۇندىلىقتارى بولىپ سانالاتىن نەگىزگى نوميناتسيالار ۇسىنىلدى. ولار: «بۇركىتپەن اڭ اۋلاۋ» مەن «ءداستۇرلى اسىق ويىندارى» ء(ال-فارابي اتىنداعى قازاق ۇلتتىق ۋنيۆەرسيتەتى), «قازاق زەرگەرلىك ونەرى. كۇمىستى وڭدەۋدىڭ ءداستۇرلى ونەرى» (م.اۋەزوۆ اتىنداعى ادەبيەت جانە ونەر ينستيتۋتى جانە قازاقستان قولونەرشىلەر وداعى), «باتىرلار جىرى» مەن «قىز جىبەك» ەپوسى (م.اۋەزوۆ اتىنداعى ادەبيەت جانە ونەر ينستيتۋتى), «قوبىزدا ويناۋ ونەرى» مەن «قازاقتىڭ ءداستۇرلى انشىلىك ونەرى» (قازاق ۇلتتىق ونەر ۋنيۆەرسيتەتى), «دومبىرا اسپابىن جاساۋ ونەرى» (اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە قازاقستان قولونەرشىلەر وداعى) مەن «قورقىت اتا كۇيلەرى» (قورقىت اتا اتىنداعى قىزىلوردا مەملەكەتتىك ۋنيۆەرسيتەتى).
وتىرىسقا ماتەريالدىق ەمەس مادەني مۇرالاردى قورعاۋ ءجونىندەگى ۇلتتىق كوميتەتتىڭ ءتوراعاسى الىبەك اسقار, كوميتەت ءمۇشەلەرى, اكادەميك سەيىت قاسقاباسوۆ, عالىم شاكىر ىبىراەۆ, ساراپشى-عالىمدار – ساۋىتبەك ابدراحمانوۆ, سايدا ەلامانوۆا, ديحان قامزابەك ۇلى, سەرىكقازى قوراباي, ەۆفرات مامبەكوۆ, جانەركە شايكوزوۆا, بايمۇرات وسپانوۆ سياقتى سالا ماماندارى قاتىستى.
ءىس-شارا بارىسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ دوتسەنتى ءسابيرا قۇلساريەۆا, م.اۋەزوۆ اتىنداعى ادەبيەت جانە ونەر ينستيتۋتىنىڭ دوتسەنتى سەرىكقازى قوراباي, قازاق ۇلتتىق ونەر ۋنيۆەرسيتەتىنىڭ لابوراتوريا مەڭگەرۋشىسى بازارالى مۇپتەكەەۆ, پروفەسسور سايدا ەلامانوۆا, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورلارى بايمۇرات وسپانوۆ پەن جانەركە شايكوزوۆا مەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ دوتسەنتى عابيت تۇياقباەۆتار اتالعان نوميناتسيالار بويىنشا جەكە-جەكە دەرەكتى فيلمدەردى كورسەتە وتىرىپ, ءار قۇندىلىقتىڭ ءمان-ماڭىزىنا توقتالىپ, كەڭ كولەمدە تۇسىنىك بەرىپ ءوتتى.
بەرىك سادىر,
«ەگەمەن قازاقستان».