وڭتۇستىك قازاقستان وبلىسىنداعى ءبىر فيرمادا جۇمىس جاساعان 59 جاستاعى فرانتسيا ازاماتى وزىنە جۇمىس بەرۋشىدەن 100 مىڭ دوللاردان ارتىق اقشا مەن جارتى ميلليونعا جۋىق تەڭگەنى ۇرلاپ العانىن مويىندادى. بۇل تۋرالى Remarka.kz حابارلادى.
ۇستىمىزدەگى جىلعى 23 اقپاندا شىمكەنت قالالىق ىشكى ىستەر باسقارماسىنىڭ اباي پوليتسيا بولىمىنە قالاداعى فيرمالاردىڭ ءبىرىنىڭ ديرەكتورى بەلگىسىز بىرەۋلەردىڭ سەيفىنەن ءىرى كولەمدەگى اقشانى ۇرلاپ كەتكەنى تۋرالى ارىزدانىپ كەلدى. وقيعا ورنىنا كەلگەن پوليتسيا قىزمەتكەرلەرى مۇندا بەلگىسىز بىرەۋلەردىڭ سىرتقى ەسىكتىڭ كىلتىن تاۋىپ الۋ ارقىلى فيرما عيماراتىنا كىرگەندەرىن انىقتادى. قاسكويلەر وسىلايشا دۋاداق وسىرۋمەن اينالىساتىن فيرمانىڭ تەمىر جاشىگىنەن 200 مىڭ اقش دوللارى مەن 400 مىڭ تەڭگەدەن استام اقشانى سەيفتەن الىپ كەتكەن. ارادا اپتا وتكەندە جەدەل ىزدەستىرۋ ءبولىمىنىڭ قىزمەتكەرلەرى وسى فيرمادا دۋاداق ءوسىرۋشى بولىپ جۇمىس جاسايتىن فرانتسيانىڭ 1955 جىلى تۋعان ازاماتىن ۇستادى.
«ۇستالعان ازاماتتىڭ سوزىنە قاراعاندا, ول كەزىندە فيرمانىڭ قۇس وسىرۋگە, ءارتۇرلى مۇقتاجدىقتارعا بولىنگەن 85 مىڭ دوللارعا جۋىق اقشاسىن جاراتىپ قويعان. ال فيرماعا اۋديتورلىق تەكسەرۋ كەلگەلى جاتقانىن ەستىگەندە, جەتىسپەيتىن اقشانىڭ ورنىن توناۋ وقيعاسىن ۇيىمداستىرۋ ارقىلى جاۋىپ جىبەرمەكشى بولعان. سول كۇنى كۇدىكتى بۋحگالتەريا كابينەتىنە كىرىپ, شكافتان كىلتتى الادى دا, سەيفتى اشىپ, ودان 100 مىڭنان اسا اقش دوللارى مەن 400 مىڭنان كوپ تەڭگەنى الادى. وسىدان كەيىن توناۋ جاسالعانداي ەتىپ, اينالانى شاشىپ تاستايدى. ءبارىن جاساپ بولعاسىن, ەسىكتى ىشىنەن جاۋىپ, ءوزى تەرەزەدەن شىعىپ كەتەدى. ەر كىسى اقشانى ءبىر جەرگە اپارىپ جاسىرادى», - دەلىنگەن وڭتۇستىك قازاقستان وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاماسىندا.
كەيىن سەيفتەگى بار اقشانى الىپ, كەڭسەنىڭ استان-كەستەڭىن شىعاردى. ول وقيعا ورنىنان ءىزىن سۋىتىپ, قارجىنى ءبىر جەرگە جاسىرعان", - دەدى مەملەكەتتىك ءتىل جانە اقپارات باسقارماسىنىڭ جەتەكشىسى سالتانات قاراكوزوۆا.
«فرانتسيا ازاماتى شىمكەنتتىڭ ءتارتىپ ساقشىلارى بۇل قىلمىستىڭ بەتىن اشا المايدى دەپ ويلاعان بولار», - دەگەن بولجام جاسادى سالتانات قاراكوزوۆا.
الايدا, سەيفتىڭ بۇزىلماعانىن كورگەن پوليتسەيلەر بۇل قىلمىستى قىزمەتكەرلەردىڭ ءبىرى جاساعانىن بىردەن ءبىلدى. اتالعان فاكتى بويىنشا قىلمىستىق كودەكستىڭ 175-بابىنا سايكەس قىلمىستىق ءىس قوزعالدى. كۇدىكتى قاماۋعا الىندى. ول كىناسىن مويىندادى.
مۇرات ايتقوجا.
دەرەككوز: Remarka.kz.
فوتو: ۆرەميا.