مەملەكەتتىك كاسىپورىن بولىپ قۇرىلعانىنا 50 جىل تولىپ وتىرعان «ماڭعىستاۋمۇنايگاز» اق – رەسپۋبليكاداعى ەڭ ءىرى بەس كومپانيانىڭ ءبىرى. جارتى عاسىر ىشىندە جەر قويناۋىنان 214 ملن. توننادان استام قارا التىن شىعارعان كاسىپورىن ەلىمىز بويىنشا مۇنايدىڭ 8, ايماق بويىنشا 31 پايىزىن وندىرەدى. جىلىنا وندىرەتىن 6 ملن. توننادان استام مۇناي, ياعني شيكىزات تۇگەلگە جۋىق ەكسپورتتالادى. كومپانيا قۇرامىندا 36 مۇناي-گاز كەن ورنى, سونداي-اق, كاسپي قايراڭىنداعى بىراقاتار بارلاۋ تەلىمدەرى مەن ەلىمىزدىڭ باتىس وڭىرىندە ورنالاسقان كەيبىر كەنىشتەر بار. كومپانيادا قازىر 4 مىڭنان استام مۇناي ۇڭعىماسى جۇمىس ىستەۋدە.
كومپانيا تاريحىنداعى ەلەۋلى جاڭالىق – قىتايلىق مۇناي كومپانياسىمەن بىرلەسكەن كاسىپورىن بولۋى. 2009 جىلى ەلباسىمىز نۇرسۇلتان نازارباەۆ پەن سول كەزدەگى قحر توراعاسى حۋ تسزينتاو كەلىسىمدەرى نەگىزىندە ەكى ەلدىڭ ءىرى مۇناي كومپانيالارى – «قازمۇنايگاز» ۇلتتىق كومپانياسى مەن قىتايدىڭ CNPC كومپانياسى ءبىرلەسكەن كومپانيا «Mangistau Investments B.V» ارقىلى ءبىزدىڭ اق-تىڭ 100 پايىزدىق اكتسيالارىن ساتىپ العان ەدى. قازىر ەكى جاق پايدانى تەڭ بولىسەدى. سوڭعى جىلدار ىشىندە مۇناي ءوندىرۋ دەڭگەيى وڭ ەكپىندى بايقاتىپ كەلە جاتقان «ماڭعىستاۋمۇنايگاز» وسىدان ون جىل بۇرىن 5 ملن. توننا ۇستىندە مۇناي وندىرسە, قازىرگى تاڭدا بۇل كورسەتكىش 6 ملن. توننادان استى. بولاشاقتا بۇدان دا زور ءونىم ءوندىرۋ ەسەبىمىزدە بار. قىسى-جازى ايانباي ەڭبەك ەتىپ جاتقان مۇنايشىلاردىڭ تەگەۋرىنىنە قاراپ, وسىلاي دەۋگە تولىق قۇقىلىمىز.
جىل سايىن مەملەكەت قورجىنىنا 25 ملرد. تەڭگەدەن استام قاراجات قۇياتىن كومپانيا سوڭعى ءۇش جىلدا جەرگىلىكتى بيۋدجەتكە 711 ملرد. تەڭگەدەن استام سالىق, وزگە دە تولەم تۇرلەرىن ءتۇسىردى. كومپانيا مۇناي وندىرۋدە زاماناۋي تەحنيكا مەن وزىق تەحنولوگيالاردى ۇنەمى وندىرىسكە ەنگىزىپ وتىرادى. بۇل ەڭبەك ونىمدىلىگىن ارتتىرۋ ارقىلى وندىرىلگەن تاۋاردىڭ وزىندىك قۇنىن تومەندەتۋدىڭ جولى, ەكىنشىدەن قىزمەتكەرلەردىڭ قاۋىپسىزدىگىن قامتاماسىز ەتىپ, اپاتتى جاعدايلار مەن وقىس وقيعالاردىڭ قاتەرىن بارىنشا ازايتۋعا مۇمكىندىك بەرەدى. مۇنداي وزىق ادىستەردىڭ قاتارىندا مۇناي-گاز قاباتتارىنىڭ اراسىن سۋمەن جارۋ, تەرەڭنەن مۇناي سوراتىن بۇراندالى سورعىلار قويۋ, بولات قۇبىرلاردى شىنى-پلاستيكالىق قۇبىرلارمەن الماستىرۋ سياقتى تاجىريبە بارىسىندا ءوزىن ءوزى اقتاعان جاڭا تاسىلدەردى اتاۋعا بولادى. ەلىمىزدە ەڭ ءبىرىنشى بولىپ مۇناي كوزدەرىن جوعارى قىسىممەن جارۋ ءتاسىلىن قولدانۋى – «ماڭعىستاۋمۇنايگازدىڭ» باتىل دا تاۋەكەلشىل قادامدارىنىڭ ءبىرى. 1999 جىلى جەتىبايدا, 2003 جىلى قالامقاستا وندىرىسكە ەنگىزىلگەن بۇل ءادىس ءوزىنىڭ تيىمدىلىگىن كورسەتتى. مۇناي قاباتىن سۋمەن جارۋ ءادىسىنىڭ ناتيجەسىندە 2012 جىلى 90,4 مىڭ توننا مۇناي ارتىق ءوندىرىلدى. وسى ءتاسىل ەنگىزىلگەلى بەرى كاسىپورىن جىل سايىن 200 مىڭ توننادان استام قوسىمشا مۇناي ءوندىرىپ كەلەدى.
كومپانيادا بارلىق وندىرىستىك جانە تەحنولوگيالىق جۇمىس تۇرلەرى تولىقتاي اۆتوماتتاندىرىلعان جانە كومپيۋتەرلەندىرىلگەن. جاڭا كومپيۋتەرلىك تەحنولوگيالاردىڭ كومەگىمەن كەن ورىندارىن وڭدەۋ جاعدايىن ساراپتاۋ جانە باقىلاۋدا ۇستاۋعا, سول ارقىلى مۇناي بەرۋ دەڭگەيىن جەر قويناۋىنا بارىنشا زيانسىز ەتۋگە مۇمكىندىك بەرەتىن مۇناي مەن گازدىڭ گەولوگيالىق جانە گيدروديناميكالىق قازبالار كەنى جاسالۋدا. مۇناي-گاز سالاسىندا يننوۆاتسيالىق تەحنولوگيالاردى يگەرۋ جانە پايدالانۋ – مۇناي ءوندىرۋ مەن سالىق ءتۇسىمىن ارتتىرۋعا, ادامي كاپيتالدى ءجانە ەكونوميكانىڭ ساباقتاس سالالارىن دامىتۋعا بايلانىستى ەلەۋلى الەۋمەتتىك-ەكونوميكالىق تيىمدىلىككە قول جەتكىزدى. يننوۆاتسيالىق ءادىستەر نەگىزىندە 2013 جىلى 46 ۇڭعىما كولدەنەڭ, 76 ۇڭعىما تىك بۇرعىلاندى, ناتيجەسىندە قوسىمشا 175,8 مىڭ توننا ءونىم الىندى. مۇناي ونىمدەرى «دوستىق» قۇبىر جەلىسىمەن جانە اقتاۋ پورتى ارقىلى تاسىمالدانادى. قازىرگى تاڭدا باكۋمەن ەكى ارادا قازاقستاندا جاسالعان تۇڭعىش تانكەر – سىيىمدىلىعى 12 مىڭ توننالىق «استانا» قاتىناپ ءجۇر. ول بۇعان دەيىن رەسەي مەن ازەربايجاننان جالداعان تانكەرلەردىڭ ەكى رەت تاسيتىن مۇنايىن ءبىر ساپارىندا-اق جەتكىزەدى. بۇل تاسىمالعا جۇمسالاتىن قاراجاتتى ەكى ەسە ۇنەمدەۋگە ءمۇمكىندىك بەرەدى.
كومپانيا قىزمەتكەرلەرىنىڭ الەۋمەتتىك-ەڭبەك قۇقىقتارى مەن مۇددەلەرىن قورعاۋعا, جۇمىس ورىندارىن ساقتاپ, لايىقتى ەڭبەكاقى الۋىنا, ءوندىرىس قاۋىپسىزدىگىن قامتاماسىز ەتىپ, جۇمىس بەرۋشىلەرمەن ىسكەرلىك ىنتىماقتى قالىپتاستىرۋعا باعىتتالعان 2013-2016 جىلدارعا ارنالعان ۇجىمدىق شارتقا 2013 جىلدىڭ 7 قاراشاسىندا قول قويىلدى. وتكەن جىلداردىڭ تاجىريبەسى ەسكەرىلىپ, ءار جۇمىسشىعا قولجەتىمدى جانە تاجىريبەدە قولدانۋعا ىڭعايلى ەتىپ جاسالىنعان, الەۋمەتتىك سالاداعى باستى ايقىندامالار ساقتالىپ, جاقسارعان, ەڭبەك اقى سالاسى, ەڭبەك شارتى, دەنساۋلىق ساقتاۋ, كاسىپوداق ۇيىمدارىنىڭ مىندەتتەرى ناقتى جازىلعان. كومپانيادان زەينەتكە شىققان 1300 زەينەتكەر ءاردايىم كومپانيا قامقورلىعىندا.
«ماڭعىستاۋمۇنايگاز» اق ءوڭىردىڭ الەۋمەتتىك الەۋەتىن ارتتىرۋعا بەلسەنە ارالاسىپ كەلەدى. ماڭعىستاۋ اۋدانىندا الەۋمەتتىك جوبالاردىڭ جۇزەگە اسىرىلۋىنا 188 ملن. تەڭگە, قاراقيا اۋدانىنىڭ الەۋمەتتىك ينفراقۇرىلىمىن دامىتۋ ءۇشىن 146 ملن. تەڭگەدەن استام قاراجات ءبولىندى.
مەملەكەت باسشىسىنىڭ بيىلعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنان تۋىندايتىن مىندەتتەردى ورىنداۋ ءۇشىن, ورتاق ماقسات جولىندا كۇش جۇمىلدىرۋعا, تاۋەلسىز قازاقستاننىڭ ازاماتتارى جانە الەۋمەتتىك جاۋاپتى بيزنەستىڭ وكىلدەرى رەتىندە الدىمىزعا قويعان تاپسىرمالاردى جۇزەگە اسىرۋعا دايىنبىز. ءبىزدىڭ بۇل باعىتتاعى جۇمىسىمىز, اسىرەسە, گەولوگيالىق سالادا كورىنىس تاباتىن بولادى. كومپانيانىڭ 2014-2016 جىلدارعا ارنالعان گەولوگيالىق بارلاۋ جۇمىستارىنىڭ اۋقىمى وتە زور. 2014 جىلى جەتىباي, بەكتۇرلى جانە قالامقاس, 2015 جىلى پريدوروجنوە, وڭتۇستىك جەتىباي, شىعىس جەتىباي كەن ورىندارىندا 3د سەيسموبارلاۋ جۇمىستارى جۇرگىزىلمەك. سونداي-اق, اسار, بۇرماشا كەن ورىندارىندا, ماحامبەت, ءبوبەك ۋچاسكەلەرىندە جۇمىستار جالعاساتىن بولادى.
تاۋەلسىز قازاقستاننىڭ يگىلىگى, ىرىسى ءۇشىن ءونىمدى جۇمىس ىرعاعىنان جاڭىلماي, حالقىمىزبەن بىرگە جارقىن بولاشاققا ۇمتىلا بەرەتىن بولامىز.
باقىت يمانباەۆ,
«ماڭعىستاۋمۇنايگاز» اق باس ديرەكتورىنىڭ
ءبىرىنشى ورىنباسارى.
ماڭعىستاۋ وبلىسى.