سوناۋ ءبىر جىلدارى تسەلينوگراد اتالعان قالادا, بۇگىنگى ەلوردادا ىرىمعا ءبىر-اق قازاق مەكتەبى قالعان كۇندەر دە بولعان. ەستۋگە ەرسى, ايتۋعا اۋىز بارمايتىن-اق تىرشىلىك ەدى-اۋ, بۇل. شۇكىر! ءتاۋەلسىزدىك تاڭى اتىپ, قازاق ەلىنىڭ استاناسىندا بىرقاتار قازاق مەكتەپتەرى اشىلدى. سولاردىڭ ءبىرى بولىپ, كوكتال-2 كەنتىندە بولاشاق وسكەلەڭ تالاپقا ساي №68 ورتا مەكتەپ عيماراتى بوي كوتەردى. ايتپاي كەتۋگە بولماس, ىرگەمىزدە سالىنا باستاعان قۇرىلىس بىرەر جىل تۇرىپ تا قالعان ەدى. مەردىگەرلەر ءجيى اۋىسىپ, ءبىراز قيىنشىلىقتاردى باسىنان كەشىردى. ابىروي بولعاندا, «ساباقتى ينە ساتىمەن» دەگەندەي, 2011 جىلدىڭ قىركۇيەگىندە مەكتەپتىڭ ءبىلىم قاقپاسى ايقارا اشىلىپ, العاشقى قوڭىراۋى قاعىلدى.
بۇگىندە اتالمىش ءبىلىم وشاعىنا كەلسەڭىز, دالىزدەردىڭ جيناقىلىعى, بەزەندىرۋلەردىڭ جوعارى ەستەتيكالىق تالعام دەڭگەيى كوزىڭىزگە بىردەن تۇسەدى. اناۋ ماڭدايشاداعى حاكىم ابايدىڭ «تالاپ, ەڭبەك, تەرەڭ وي, قاناعات, راقىم ويلاپ قوي» دەگەن دانالىق سوزدەرى كوپ جايدىڭ بەتىن اشىپ تۇرعانى اقيقات. نەمەسە, تاريحىمىزدى قايتادان تارازىلاپ جاتقان وسىناۋ كەزدە ەلباسىنىڭ «قاسيەتتى قازاق جەرى – اتا-بابالارىمىزدىڭ داڭقتى تاريحىن اتىنىڭ تۇياعىمەن جازىپ كەتكەن جەر» دەگەن سوزدەرى بەكەردەن-بەكەر ورنالاستىرىلماسا كەرەك.
مەكتەپتەگى يگى ىستەرمەن تەرەڭىرەك تانىسۋدىڭ دا ءساتى ءتۇستى. قولىمدا «مەكتەپ حابارشىسى» جۋرنالى. اياعىن ەندى ءتاي-ءتاي باسا باستاعان جاس ۇجىم – ءبىلىم ۇياسى اشاماي ەردى مىسە تۇتپاي, ءبىردەن تۇلپاردىڭ جالىنا جارماسقانعا ۇقسايدى. مەكتەپ ديرەكتورى ءشارىپحان جاكەنباي باس بولىپ, ۇجىم قوسشى بولىپ, وسى ادەمى شارۋانى بىردەن-اق قولعا العان. مەكتەپ شەجىرەسى جازىلا باستاعان. جۋرنالدا جاريالانعان ماقالالاردىڭ ارقايسىسى جەكە-جەكە باسىلىمدارعا سۇرانىپ تۇرعان دۇنيەلەر.
«ادامعا ەڭ ءبىرىنشى ءبىلىم ەمەس, ءتاربيە بەرىلۋى كەرەك, تاربيەسىز بەرىلگەن ءبىلىم – ادامزاتتىڭ قاس جاۋى, ول كەلەشەكتە ونىڭ بارلىق ومىرىنە اپات اكەلەدى», دەگەن ۇلى عۇلاما عالىم, بابامىز ءال-فارابيدىڭ ءسوزىن ءبىلىم ۇياسى وزىنە باستى باعدار ەتىپ العانعا ۇقسايدى. نەگە دەيسىز عوي؟ مەكتەپتە ءبىر ءوزى مادەنيەت سارايىنا بەرگىسىز اكت زالى بار. بۇل ءزاۋلىم سارايدىڭ ء(يا, سارايدىڭ) ساحناسىنا كىمدەر كەلىپ, كىمدەر كەتپەگەن. انە, وقۋشىلار ساحنانى كۇمبىرلەتكەن «اق جاۋىن» كامەرالىق وركەسترىنىڭ ونەرىن تاماشالاۋدا. وركەستر ارنايى شاقىرۋمەن كەلگەن. شەبەرلىگىمەن, نازىكتىگىمەن ەرەكشەلەنەتىن سەكەن تۇرىسبەك باسقاراتىن وركەستر سول كەشتە نەبىر كۇيلەردى كۇمبىرلەتتى. وسىناۋ كۇمبىرلەگەن كۇيگە كوكتال-2 كەنتىنىڭ ءبىراز تۇرعىندارى تامسانىس ءبىلدىرىپ, قول سوقتى.
قازاق تەلەديدارىنىڭ شەجىرەسىن سومداعان قوعام قايراتكەرى سۇلتان ورازالين اعامىز دا مەكتەپكە كەزدەسۋگە كەلىپتى. جاي كەلمەپتى: قوس عابەڭدى «ەرتە كەلىپتى». كەزىندە قازاق ادەبيەتىنىڭ الىپتارى عابيت مۇسىرەپوۆ پەن عابيدەن مۇستافين تۋرالى فيلم تۇسىرگەنى بەلگىلى. وسى كينوفيلمدى وقۋشىلار مەن مۇعالىمدەر تاماشالادى. ءارى عالىم اعالارىنىڭ ساليقالى اڭگىمەسىن تىڭدادى.
ءبىلىم وشاعىنىڭ شەجىرەسى ودان ءارى جالعاسۋدا. مىنە, مەكتەپ ۇجىمى تاعى ءبىر كەزدەسۋگە جينالىپ جاتىر. قازاق فيلوسوفيا عىلىمىنىڭ كورنەكتى وكىلى بۇرىنعى سەنات دەپۋتاتى عاريفوللا ەسىم مەن حالىق قاھارمانى, اۋعان سوعىسىنىڭ باتىرى, ءماجىلىس دەپۋتاتى باقىتجان ەرتاەۆ اعالارى دا عيبراتى مول اڭگىمەلەردىڭ تيەگىن اعىتسا كەرەك. ماناعى, «اشاماي ەردى مىسە تۇتپاي, بىردەن تۇلپاردىڭ جالىنا جارماستى» دەۋىمنىڭ سىرى دا وسىندا ەدى. بۇل پىكىرىمدى اشىلعانىنان ءۇشىنشى عانا وقۋ جىلىن باسىنان وتكەرىپ جاتقان جاس ۇجىمنىڭ سان قىرلى ءىس-ارەكەتتەرى دالەلدەي تۇسەدى.
مەكتەپ جۇمىسىنىڭ باستى كورسەتكىشى ءبىلىم ساپاسى دەسەك, ونى كوتەرۋگە اتسالىسىپ جۇرگەن ۇستازداردىڭ ءبىر شوعىرى ءوز شەبەرلىكتەرىمەن كەڭىنەن تانىمال بولعان. بىلتىرعى وقۋ جىلىندا «اتامەكەن» ورتالىعىندا ۇزدىك ساباق وتكىزگەن تاريح ءپانىنىڭ مۇعالىمى ناعاشىبەرگەن كاربوز ءبىرىنشى ورىندى يەلەنىپ, 100000 تەڭگە سىياقى السا, بيىلعى وقۋ جىلىندا سول بايقاۋعا وسى مەكتەپتىڭ بەس ۇستازى قاتىسىپ, ماراپاتقا يە بولىپتى. وتكەن وقۋ جىلىندا رەسپۋبليكالىق عىلىمي-ادىستەمەلىك جۋرنالداردا, حالىقارالىق, رەسپۋبليكالىق, قالالىق عىلىمي-پراكتيكالىق كونفەرەنتسيالار مەن سەمينارلار جيناقتارىندا ون سەگىز مۇعالىمنىڭ 38 ماقالاسى جارىق كورگەن. ال عىلىمي جوبادا, بىلتىرعى وقۋ جىلىندا «عارىشتىق زەرتتەۋلەر ارقىلى عىلىم الەمىن اشامىز» اتتى ءىح حالىقارالىق بايقاۋدا جۇلدەگەر اتانعان 11-سىنىپ وقۋشىسى ەرلىك ءابدىكامالوۆتىڭ ەسىمىن ەرەكشە اتاعان ءجون.
مەكتەپ مۇعالىمدەرىنىڭ وزىق ءتاجىريبەسىن ءبىلىم باسقارماسى ورىندى باعالاپ وتىرعانىن بايقادىق. بيىلعى وقۋ جىلىندا تاجىريبەلى ۇستازدار جازىبەك ەشتاناەۆ /قازاق ءتىلى مەن ادەبيەتى/, ناعاشىبەرگەن كاربوز /قازاقستان تاريحى/, جادىرا دايراباي /ماتەماتيكا/, گۇلنازيرا ءابدىلدينا /باستاۋىش سىنىپ/ قازاقستان رەسپۋبليكاسى ءبىلىم جانە عىلىم مينيسترلىگىنىڭ بۇيرىعىمەن جاڭا وقۋلىقتارعا ساراپتاما جاساۋعا قاتىسۋدا. ءسوز اراسىندا ايتا كەتكەن ءجون شىعار, وقۋ جىلى بويى مونيتورينگ جۇرگىزىلىپ, وقۋ-تاربيە جۇمىسىنىڭ ءالسىز جاقتارى دا ەسەپكە الىنىپ وتىرادى ەكەن. بۇل – قۇپتارلىق جايت.
بيىلعى وقۋ جىلىنىڭ باسىندا حالىقارالىق «ل.ن.تولستوي جانە قازاقستان» اتتى كونكۋرسقا قاتىسقان №68 ورتا مەكتەبىنىڭ وقۋشىلارى ءاسيا ەرگەشبەك پەن ايجان جالعاسباەۆا ۇلى جازۋشىنىڭ ياسنايا پولياناداعى مۋزەي-ۋسادباسىنىڭ ديرەكتورى ە.تولستايا قول قويعان العىس حاتپەن ماراپاتتالدى.
مەكتەپ وقۋشىلارىنىڭ تابىستارى اۋىز تولتىرىپ ايتۋعا ابدەن لايىق. 3 «ا» سىنىبىنىڭ وقۋشىسى ماقسۇت نۇراي توتىقۇس قۇپياسىن زەرتتەپ, رەسپۋبليكالىق «زەردە» زەرتتەۋ جۇمىستارىنىڭ جۇلدەگەرى اتانىپ, 3-دارەجەلى ديپلوممەن ماراپاتتالدى. وتكەن كۇزدە, كيەلى اباي جەرىندە وتكەن رەسپۋبليكالىق اباي وقۋلارىندا استانانىڭ نامىسىن قورعاعان 9-سىنىپ وقۋشىسى راۋان ادەتحان 3-ورىننان كورىنسە, مەكتەپ اشىلعاننان بەرى قىزدار ۆولەيبول كومانداسى قالا بويىنشا كۇمىس جۇلدەگەر. ال كوماندا مۇشەسى ايدا ەسىلباي «ۇزدىك شابۋىلشى» اتاندى. قۋانارلىق ەڭبەك. دزيۋدو كۇرەسىنەن استانا قالاسىنىڭ اشىق بىرىنشىلىگىنە قاتىسقان مەكتەپتىڭ 7-سىنىپ وقۋشىلارى التاي تالاس, اسلان قاپساتتار جانە باتىرحان ساكەنوۆ استانا قالاسىنىڭ چەمپيوندارى اتاندى. ۇلتتىق بىرىڭعاي تەستىلەۋ بويىنشا وتكەن وقۋ جىلىندا ورتاشا بالل 85,3-ءتى قۇراپ, ءبىر وقۋشى مەكتەپتى ۇزدىك اتتەستاتقا ءبىتىردى.
الاش ارىستارىنىڭ ءجۇرىپ وتكەن «سوقتىقپالى-سوقپاقتى» جولى بۇگىنگى ۇرپاققا اركەز ۇلگى بولۋى كەرەك. ەلىم دەپ ەڭىرەگەن ەرلەردىڭ تاعدىر-تالايى سان قيلى بولدى. تەرەڭ بىلىممەن, عىلىممەن قارۋلانعان وسىناۋ پاراساتتى دا ابزال جاندار قازاق حالقىنىڭ باسىنا ءتۇسىپ وتىرعان اۋىر جاعدايلارعا قاتتى الاڭدادى. ساياسي پارتيا قۇردى, ۇكىمەت جاريالادى. الاشوردا ۇكىمەتىن بەسىگىندە تۇنشىقتىردى. بىراق الاش ارىستارىنىڭ اسقاق ارماندارى امانات بولىپ بۇگىنگە جەتىپ وتىر.
وسى مەكتەپتە بيىلعى وقۋ جىلىندا «الاش جولى» تاجىريبەلىك الاڭى ومىرگە جول تارتتى. ماقسات-مۇددەسى قۇپتارلىق. 2017 جىلى «الاشوردا» ۇكىمەتىنىڭ قۇرىلعانىنا 100 جىل تولادى. ماقسات – مەكتەپ وقۋشىلارىن الاش ارىستارىنىڭ جولىمەن الىپ ءوتۋ, ءارى وسى تاقىرىپتا مۇراجاي اشۋ. ىسكە ءسات!
«جاقسىنىڭ جاقسىلىعىن ايت, نۇرى تاسىسىن» دەگەندەي, مەكتەپ ديرەكتورى ءشارىپحان قاجىتاي ۇلىنىڭ باسشىلىعىمەن ۇجىم اتقارىپ جاتقان يگى ىستەر وسىنداي.
تىلەۋبەك ىسقاقوۆ,
زەينەتكەر ۇستاز, قازاقستاننىڭ ءبىلىم بەرۋ
ءىسىنىڭ وزىق قىزمەتكەرى.
استانا.
سۋرەتتە: مەكتەپ عيماراتى.