قۋانىش سۇلتانوۆتىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيانىڭ كەڭەيتىلگەن وتىرىسى بولىپ, وندا ىشكى ىستەر مينيسترلىگىنىڭ سوتتالعانداردىڭ كونستيتۋتسيالىق قۇقىقتارىن جانە ولاردى تۇزەۋ مەكەمەلەرىندە ۇستاۋدى قامتاماسىز ەتۋدەگى قىزمەتى تۋرالى ماسەلە تالقىلاندى.
بەرىلگەن تاقىرىپتا ىشكى ىستەر ءمينيسترى قالمۇحانبەت قاسىموۆ بايانداما جاسادى. كوميسسيا وتىرىسىنىڭ جۇمىسىنا بيلىكتىڭ زاڭ شىعارۋشى, اتقارۋشى جانە سوت تارماقتارىنىڭ وكىلدەرى, قۇقىقتانۋشى عالىمدار, ادۆوكاتتار, حالىقارالىق جانە ۇكىمەتتىك ەمەس قۇقىق قورعاۋ ۇيىمدارىنىڭ, جۇرتشىلىقتىڭ جانە باق وكىلدەرى قاتىستى.
كوميسسيانىڭ وتىرىسىندا سوتتالعانداردىڭ قازاقستان رەسپۋبليكاسىنىڭ كونستيتۋتسياسى مەن قىلمىستىق-اتقارۋ كودەكسىندە, ازاماتتىق جانە ساياسي قۇقىقتار تۋرالى حالىقارالىق پاكتىدە, ازاپتاۋلارعا جانە باسقا دا قاتىگەز, ادامگەرشىلىككە جاتپايتىن جانە ار-نامىستى قورلايتىن ءىس-ارەكەتتەر مەن جازالاۋ تۇرلەرىنە قارسى كونۆەنتسيادا, سونداي-اق, ەلىمىزدىڭ باسقا دا حالىقارالىق مىندەتتەمەلەرىمەن كەپىلدىك بەرىلگەن قۇقىقتارىنىڭ ساقتالۋى تالقىلاندى.
كوميسسيا مۇشەلەرى سوتتالعانداردىڭ ورتا ءبىلىم الۋ جانە دەنساۋلىعىن قورعاۋ, جەكە قاۋىپسىزدىگى مەن ءوز قۇقىقتارىن قورعاۋ ماقساتىندا ءتيىستى مەملەكەتتىك ورگاندارعا, حالىقارالىق ۇيىمدارعا جۇگىنۋ كونستيتۋتسيالىق قۇقىقتارىنىڭ ساقتالۋى ماسەلەلەرىنە ەرەكشە كوڭىل ءبولدى.
كوميسسيا قىلمىستىق-اتقارۋ كوميتەتىنىڭ قىلمىستىق-اتقارۋ مەكەمەلەرىنىڭ نەگىزگى قورلارى مەن وندىرىستىك بازالارىن جاڭارتۋعا, بوستاندىقتان ايىرۋعا بالامالى جازالاۋ تۇرلەرىن كەڭىنەن پايدالانۋعا جاعداي جاساۋعا, ءتۇرمەدەگى ادامداردىڭ ەڭبەكپەن قامتىلۋىن جانە قاماۋدان بوساعان ازاماتتاردىڭ الەۋمەتتىك ورتاعا قايتا بەيىمدەلۋىن قامتاماسىز ەتۋگە باعىتتالعان ۇسىنىستارىن قولداۋعا بەرىك نيەت تانىتتى.
كوميسسيانىڭ وتىرىسىندا تۇرمەدە وتىرعان ادام سانىن مەيلىنشە ازايتۋدىڭ وزەكتى ماسەلەلەرى دە تالقىلاندى.
كوميسسيانىڭ جوعارىدا اتالعان پروبلەمالاردى شەشۋ ءجونىندەگى ۇسىنىستاردى قامتيتىن ۇسىنىمدارى مەملەكەت باسشىسىنىڭ, قازاقستان رەسپۋبليكاسى پارلامەنتى مەن ۇكىمەتىنىڭ نازارىنا جەتكىزىلەتىن بولادى.
«ەگەمەن-اقپارات».