كەشە پرەمەر-ءمينيستردىڭ ورىنباسارى گۇلشارا ابدىقالىقوۆانىڭ توراعالىعىمەن سەلەكتورلىق رەجىمدە ۇكىمەت جانىنداعى دەنساۋلىق ساقتاۋ جونىندەگى ۇلتتىق ۇيلەستىرۋ كەڭەسىنىڭ (ۇۇك) ءححىى وتىرىسى ءوتتى.
كەڭەستە «100 مەكتەپ, 100 اۋرۋحانا» جانە «350 دارىگەرلىك امبۋلاتوريا, فەلدشەرلىك-اكۋشەرلىك پۋنكت جانە ەمحانا قۇرىلىسى» جوبالارىن ىسكە اسىرۋ بارىسى قارالدى.
دەنساۋلىق ساقتاۋ ۆيتسە-ءمينيسترى ب.توكەجانوۆ «100 مەكتەپ, 100 اۋرۋحانا» جوباسى بويىنشا 71 نىسان قۇرىلىسى اياقتالعانىن جەتكىزدى. 28 نىسان قۇرىلىسى (22 نىسان – رەسپۋبليكالىق بيۋدجەت ەسەبىنەن, 6 نىسان – مەملەكەت-جەكە مەنشىك سەرىكتەستىگى تەتىگى ارقىلى) 2016 جىلدىڭ سوڭىنا دەيىن ىسكە اسىرۋ كوزدەلگەن.
«350 دارىگەرلىك امبۋلاتوريا, فەلدشەرلىك-اكۋشەرلىك پۋنكت جانە ەمحانا قۇرىلىسى» جوباسى بويىنشا 103 نىسان قۇرىلىسى اياقتالىپ, ىسكە قوسىلدى. 242 نىسان قۇرىلىسىن (99 نىسان – رەسپۋبليكالىق بيۋدجەت ەسەبىنەن, 126 نىسان – جەرگىلىكتى بيۋدجەت ەسەبىنەن, 17 نىسان – مەملەكەت-جەكە مەنشىك سەرىكتەستىگى تەتىگى بويىنشا) 2016 جىلدىڭ سوڭىنا دەيىن ىسكە اسىرۋ كوزدەلگەن.
جوبالىق-سمەتالىق قۇجاتتارعا ساپالى ساراپتاما جاسالماۋى, نىسانداردى ۋاقىتىندا ىسكە قوسپاۋى, اكىمدىك كوميسسيالاردىڭ قۇرىلىس نىساندارىن ساپاسىز قابىلداۋى سياقتى جۇيەلى ماسەلەلەردىڭ بولۋىنا بايلانىستى ۇلتتىق ۇيلەستىرۋ كەڭەسىندە وڭىرلىك دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى, شىعىس قازاقستان, سولتۇستىك قازاقستان, قىزىلوردا جانە اتىراۋ وبلىستارى اكىمدەرى ورىنباسارلارىنىڭ ەسەپتەرى تىڭدالدى.
ۇلتتىق ۇيلەستىرۋ كەڭەسى وبلىستاردىڭ, استانا جانە الماتى قالالارىنىڭ اكىمدەرىنە 2014 جىلى ىسكە قوسۋ جوسپارلانعان دەنساۋلىق ساقتاۋ نىساندارىن ۋاقتىلى پايدالانۋعا بەرۋ, دارىگەرلىك امبۋلاتوريالار مەن فەلدشەرلىك-اكۋشەرلىك پۋنكتتەر قۇرىلىسىنا جەرگىلىكتى بيۋدجەتتەن ۋاقتىلى قارجى ءبولۋ بويىنشا ناقتى شارالار قابىلداۋدى تاپسىردى. دەنساۋلىق ساقتاۋ مينيسترلىگىنە رەسپۋبليكالىق بيۋدجەتتەن بولىنگەن قاراجات يگەرىلمەگەن جاعدايدا ونىڭ كولەمىن قىسقارتۋ نەمەسە باسقا باسىمدى باعىتتارعا جۇمساۋ تاپسىرىلدى. وڭىرلىك دامۋ مينيسترلىگىنە جوبالىق-سمەتالىق قۇجاتتارعا ساپالى ساراپتاما جاساۋ بويىنشا شارالار قابىلداۋ جۇكتەلدى.
«ەگەمەن-اقپارات».