قازاقستان رەسپۋبليكاسى پرەزيدەنتى اكىمشىلىگىنىڭ باسشىسى – قازاقستان رەسپۋبليكاسى مەملەكەتتىك حاتشىسىنىڭ مىندەتىن ۋاقىتشا اتقارۋشى كارىم ءماسىموۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
وتىرىس بارىسىندا قازاقستان پرەزيدەنتىنىڭ باستاماسىمەن جۇزەگە اسىپ كەلە جاتقان «بولاشاق» حالىقارالىق ستيپەندياسىن ودان ءارى جەتىلدىرۋ جونىندەگى ۇسىنىستار قارالدى.
2014 جىلدان باستاپ ماگيستراتۋرادا وقۋ جانە تاعىلىمدامادان ءوتۋ ءۇشىن شەت ءتىلىن ءبىلۋدىڭ قاجەتتى باستاپقى دەڭگەيى IELTS 9.0 بالدان – 3.0-دەن 4.0. بالعا دەيىن, ال رەزيدەنتۋرادا, دوكتورانتۋرادا وقۋعا – 5.0 بالعا دەيىن ۇلعايتىلدى.
سونداي-اق, مەملەكەتتىك ءتىلدى ءبىلۋ جونىندەگى بارلىق ساناتتاعى ۇمىتكەرلەرگە ەڭ تومەنگى تالاپتار ارتتىرىلدى. قازتەست جۇيەسى بويىنشا ەڭ تومەنگى دەڭگەي – 150 بالدان 85-كە دەيىنگى بالدى قۇرادى.
وقۋ جانە تىلدىك كۋرستاردان ءوتۋ ءۇشىن ۇسىنىلاتىن شەتەلدىك جەتەكشى جوعارى وقۋ ورىندارىنىڭ, شەتەلدىك ۇيىمداردىڭ ءتىزىمى قايتا قارالدى. 2014 جىلى ءتىزىم 17 ۋنيۆەرسيتەتپەن تولىقتىرىلىپ, 8-ءى الىنىپ تاستالدى.
شەتەلدە تاعىلىمدامادان ءوتۋ ورنىنا قويىلاتىن تالاپتاردىڭ ولشەمى بەكىتىلدى. اتاپ ايتقاندا, تاعىلىمدامالار تەك قانا جەتەكشى شەتەلدىك جوعارى وقۋ ورىندارى مەن ولاردىڭ جانىنداعى مەديتسينالىق مەكەمەلەردىڭ بازاسىندا, سونداي-اق, الەمگە تانىمال وڭىرلىك عىلىمي-زەرتتەۋ ورتالىقتارىندا, كومپانيالار مەن سالالىق ۇيىمداردا جۇزەگە اسىرىلاتىن بولادى.
بۇعان قوسا, ستيپەنديادان ايىرۋعا جانە كوميسسياعا كەلىپ تۇسكەن وتىنىشتەردى قاراۋعا بايلانىستى ماسەلەلەر قارالدى.