ۇلىس لەبىن اكەلگەن بيلەر

ەلورداداعى بەيبىتشىلىك جانە كەلىسىم سارايىندا تۇرىك رەسپۋبليكاسىنىڭ مەملەكەتتىك «حالىق ءبيى» ءانسامبلى كورەرمەندەرگە كونتسەرتتىك باعدارلاما ۇسىندى. ناۋرىز مەيرامىنىڭ لەبى سەزىلە باستاعانداي. باۋىرلاس تۇرىك حالقى مەرەكەگە وراي ەكى ەل اراسىنداعى مادەني بايلانىستى نىعايتۋ ماقساتىندا تۇركياداعى ەڭ ءبىر تانىمال شىعارماشىلىق ۇجىمنىڭ كونتسەرتىن استانالىقتارعا ۇسىندى. ونى ەلىمىزدەگى تۇركيا ەلشىلىگى مەن ءجۇنىس ەمرە اتىنداعى تۇرىك مادەنيەت ورتالىعى ۇيىمداستىردى. كونتسەرت الدىندا كورەرمەندەرگە جىلى لەبىزىن ارناعان ءجۇنىس ەمرە اتىنداعى تۇرىك مادەنيەت ورتالىعىنىڭ ديرەكتورى يبراھيم يىلدىرىم مەرەكەلەر ءار ۇلتتىڭ تۇرمىس-تىرشىلىگىندە ماڭىزدى ورىن الاتىنىن, بىرلىك, باۋىرمالدىق سەزىمدەرىن جانداندىراتىن ماڭىزدى كۇن ەكەنىن اتاپ ءوتتى. «ناۋرىز مەرەكەسى تەك قانا قازاق پەن تۇرىك حالىقتارى ءۇشىن عانا ەمەس, بارلىق تۇرىك تەكتەس تۋىستاس حالىقتار ءۇشىن دە ماڭىزدى سانالادى. ءبىز بۇل ءىس-شارانى ۇيىمداستىرۋدا تۇرىك الەمى تۇسىنىگىن نىعايتۋدى, ەكى ەل اراسىنداعى سىيلاستىقتى مادەنيەتپەن دانەكەرلەۋدى ماقسات ەتتىك», دەدى ول. سالتاناتتى كەش ءداستۇرلى ءانشى زاعيپا يمان­عازيەۆانىڭ ورىنداۋىنداعى «كىزىل چىكلار» اتتى تۇرىك جۇرتىنىڭ بەلگىلى ونەر تۋىندىسىمەن باس­تالدى. سوسىن الەمنىڭ ەڭ ۇلكەن ساحنالارىندا ونەر كورسەتىپ جۇرگەن «حالىق ءبيى» ءانسامبلى تۇركيانىڭ ءارتۇرلى ايماقتارىنا ءتان ۇلتتىق شىعارمالاردى, سونداي-اق, «چيفتەتەللي», «حالاي», «بۋردۋر», «كارادەنيز», «زەيبەك» اتتى بيلەردى كورەرمەن نازارىنا بىرىنەن كەيىن ءبىرىن ۇسىندى. ايگۇل سەيىلوۆا, «ەگەمەن قازاقستان». ________________________________ سۋرەتتەردى تۇسىرگەن ەرلان وماروۆ.