سىرداريادا سەڭ قوزعالدى

اۋا رايىنىڭ جىلىنۋىنا بايلانىستى سىرداريادا سەڭ قوزعالدى. بۇل تۋرالى «قازاقستان» تەلەارناسى حابارلادى. سىرداريا وزەنىندە تۇتاسقان مۇز وڭتۇستىك قازاقستان وبلىسىنداعى بالتاكول ەلدى مەكەنى تۇسىنان قىزىلوردا وبلىسىنا قاراي قوزعالعان. ال ءبىزدىڭ قولىمىزعا كەلىپ تۇسكەن سوڭعى اقپاراتتا تۇتاسقان مۇزدىڭ جاڭاقورعان اۋدانىنىڭ قاندوز اۋىلىنا قاراي باعىت الىپ بارا جاتقانى تۋرالى جازىلعان ەكەن. جالپى, قازىرگى كەزدە شاردارا سۋ قويماسىنان تومەن قاراي سەكۋندىنا 1000 تەكشە مەتر سۋ بوساتىلۋدا. ال كوكساراي سۋ رەتتەگىشى وسىنىڭ 500 تەكشە مەترىن قابىلداۋدا. سونداي-اق, قىزىلوردا سۋ تورابىنان سەكۋندىنا 360 تەكشە مەتر سۋ ءوتىپ جاتىر. وسى شاھارداعى مۇزدىڭ قالىڭدىعى 46 سانتيمەتر بولسا, قازالى اۋدانىندا ول 64 سانتيمەترگە جەتكەن. جەرگىلىكتى جەردەگى مامانداردىڭ ايتۋىنشا, دارياداعى مۇز 20-25 ناۋرىز ارالىعىندا قىزىلوردا قالاسى تۇسىنان وتەتىن كورىنەدى. ءامىرحان الماعانبەتوۆ. دەرەككوز: «قازاقستان» تەلەارناسى. فوتو: Syrdarya.gov.kz.