قر ۇلتتىق ەكونوميكا ءمينيسترى اسەت ەرعاليەۆ بيىلعى 10 ايداعى ەلىمىزدىڭ ەكونوميكالىق دامۋىن باياندادى, دەپ حابارلايدى Egemen.kz.
«بيىلعى قاڭتار-قازان ايلارىندا قازاقستان ەكونوميكاسىنىڭ ءوسۋ كورسەتكىشى 3,5%-دى قۇرادى. وسى كەزەڭدە نەگىزگى ترەندتەر بويىنشا قىزمەت كورسەتۋ سەكتورىنداعى ءوسۋ قارقىنىنىڭ جەدەلدەۋى, وڭدەۋ ونەركاسىبى مەن قۇرىلىس سالالارىنداعى ەكونوميكانىڭ ءوسۋى مەن تۇراقتىلىعىنىڭ درايۆەرلەرى بولىپ قالا بەرۋى, ەكسپورتتىڭ جوعارى ءوسىم ديناميكاسى, ءوندىرۋشى ەمەس سەكتورلارداعى جوعارى ينۆەستيتسيالىق بەلسەندىلىكتىڭ ساقتالۋى بايقالدى», دەدى مينيستر ۇكىمەتتىڭ بۇگىنگى وتىرىسىندا.
ونىڭ ايتۋىنشا, بيىلعى قاڭتار-قازانىندا ناقتى سەكتورداعى ءوسىم 2,9% قۇرادى. ال قىزمەت كورسەتۋ سالاسىنداعى ىسكەرلىك بەلسەندىلىك 3,4%-عا دەيىن ءوستى.
«سالالار اراسىندا اقپارات جانە بايلانىس, ساۋدا, سۋمەن جابدىقتاۋ, قۇرىلىس, ەلەكترمەن جابدىقتاۋ, وڭدەۋ ونەركاسىبى جوعارى ءوسىم كورسەتۋدە», دەيدى ءا. ەرعاليەۆ.