بيىلعى 10 ايدا ەلىمىزدە 9 مىڭنان استام ءورت بولىپ, سونىڭ سالدارىنان 358 ادام جاراقات السا, وكىنىشكە قاراي, 297 ادام قازا بولعان. ال قۇتقارىلعاندار سانى 4 مىڭنان اسادى. بۇل جايىندا ورتالىق كوممۋنيكاتسيالار قىزمەتى الاڭىندا وتكەن بريفينگتە توتەنشە جاعدايلار مينيسترلىگى ورتكە قارسى قىزمەت كوميتەتىنىڭ توراعاسى نۇربولات دەربىسوۆ حابارلادى.
كوميتەت توراعاسىنىڭ مالىمدەۋىنشە, قۇتقارۋشىلار كۇنىنە ورتا ەسەپپەن 150-گە جۋىق ءتۇرلى سيپاتتاعى توتەنشە جاعدايعا بايلانىستى شاقىرتۋ السا, ولاردىڭ بۇل باسىم بولىگى ءتىلسىز جاۋدى اۋىزدىقتاۋعا قاتىستى. ول سونداي-اق جىل باسىنان بەرى تۇرعىن ءۇي سەكتورىندا تىركەلەتىن ءورتتىڭ 13,6 پايىزعا تومەندەگەنىن, الايدا قازا تاپقاندار سانىنىڭ 16, جاراقات العانداردىڭ 45 پايىزعا وسكەنىن ايتتى: «تجم بولىمشەلەرى ەلىمىزدىڭ بارلىق وڭىرىندە 15 تامىزدان 15 قازانعا دەيىن رەسپۋبليكالىق ءورت قاۋىپسىزدىگى اكتسياسىن جىل سايىن وتكىزەدى».
ءورت قاۋىپسىزدىگى ءىس-شاراسى كەزىندە جەرگىلىكتى اكىمدىك وكىلدەرىمەن بىرلەسىپ, الەۋمەتتىك-تۇرمىستىق جاعدايى ناشار, كوپبالالى وتباسىلاردان شىققان جەتكىنشەكتەردىڭ, جەتىم بالالاردىڭ تۇرعىن ۇيلەرىنە بارىپ, ولارعا ناقتى قانداي كومەك قاجەت ەكەنىن انىقتاۋ, توتەنشە جاعدايلار تۋىنداۋىنا نەعۇرلىم بەيىم, ياعني اۆتونومدى جىلىتۋ جۇيەلەرى بار تۇرعىن ۇيلەردى ارالاپ, ءورتتىڭ الدىن الۋ جۇمىستارى جۇرگىزىلەدى.
ن.دەربىسوۆتىڭ مالىمدەۋىنشە, قازىرگى ۋاقىتتا تجم-دە 107 مىڭنان استام تۇرعىن ءۇي ەسەپكە الىنعان. اكتسيا كەزىندە بۇل ۇيلەردىڭ بارلىعى تولىق تەكسەرىلىپ, شامامەن 400 مىڭ ادامعا نۇسقاۋ بەرىلگەن. پروفيلاكتيكالىق جۇمىستار اۆتونومدى جىلىتۋ جۇيەلەرى بار ۇيلەردىڭ تۇرعىندارى اراسىندا ءالى دە جالعاسۋدا.