ءىىم ەسىرتكى قىلمىسىنا قارسى ءىس-قيمىل دەپارتامەنتى باسقارماسىنىڭ باسشىسى بەرىكحان نۇرعاليەۆتىڭ حابارلاۋىنشا, بىرەر كۇننەن كەيىن سينتەتيكالىق ەسىرتكىنىڭ تاعى 11 جاڭا ءتۇرى مەن 17 پرەكۋرسوردىڭ زاڭسىز اينالىمى ءۇشىن قىلمىستىق جاۋاپكەرشىلىك قاراستىرىلعان ۇكىمەت قاۋلىسى كۇشىنە ەنەدى.
ونلاين فورماتتا وتكەن بريفينگتە باسقارما باسشىسى ەڭ كوپ تارالعان ەسىرتكى ءۇشىن قىلمىستىق سالماقتىڭ اۋىرلاي تۇسكەنىن ايتا كەلىپ, باس بوستاندىعىنان ايىرۋدىڭ ناقتى مەرزىمى بەلگىلەنگەنىن مالىمدەدى. سونداي-اق بۇدان بىلاي «پيرالەرون» (جىلدامدىق), مەفەدرون (مەف) جانە سينتەتيكالىق كاننابينويدتەردىڭ (سپايس) زاڭسىز اينالىمىمەن اينالىسقانداردى قىلمىستىق جاۋاپكەرشىلىككە تارتۋ ءۇشىن ءبىر گرامنىڭ ءوزى جەتكىلىكتى. ال بۇرىن «سينتەتيكا زەرتحاناشىلارىن» جازاعا تارتۋ ءۇشىن «اق اجالدىڭ» سالماعى 50 گرامنان كەم بولماۋعا ءتيىس ەدى.
ءىىم مەن پارلامەنت دەپۋتاتتارىنىڭ ادام اعزاسىنا اسەرى وتە كۇشتى زاتتاردىڭ زاڭسىز اينالىمى ءۇشىن جاۋاپكەرشىلىكتى كوزدەيتىن زاڭ جوباسىن بىرلەسىپ ازىرلەپ جاتقانىن ايتقان پوليتسيا پولكوۆنيگى: «كەي ءدارى-دارمەكتەردى قولدانعاندا ادام ساناسى وزگەرە باستايدى. ەسىرتكى جاساۋشىلار بۇل دارىلەردى جاسوسپىرىمدەردىڭ دەنساۋلىعىنا تاجىريبە جاساۋ ماقساتىندا پسيحواكتيۆتى زاتتار رەتىندە پايدالانۋى ابدەن مۇمكىن», دەدى.
ەسىرتكى قىلمىسىنا قارسى ءىس-قيمىل بويىنشا اتقارىلعان جۇمىستاردىڭ ءبىرى – جويىلعان جاسىرىن ەسىرتكى زەرتحانالارى. جىل باسىنان بەرى پوليتسيا قىزمەتكەرلەرى وسىنداي 13 زەرتحانانى اشكەرەلەگەن. ونىڭ 2-ءۋى – نۇر-سۇلتان قالاسىندا, 4-ءۋى – قاراعاندى, 3 – الماتى مەن سولتۇستىك قازاقستان وبلىستارىندا جانە بىرەۋى اقتوبە وڭىرىندە انىقتالىپ وتىر. ماسەلەن, قاراعاندى وبلىسىندا جۇرگىزىلگەن اۋقىمدى وپەراتسيا كەزىندە ەلىمىزدىڭ بىرنەشە وڭىرىندە جۇمىس ىستەگەن ءىرى ەسىرتكى سينديكاتىنىڭ جولى جابىلدى. قازىرگى تاڭدا وسى دەرەك بويىنشا ترانسۇلتتىق قىلمىستىق قوعامداستىق قۇرۋعا جانە ونى باسقارۋعا, ۇيىمداسقان قىلمىستىق توپپەن ەسىرتكى ساتۋعا قاتىستى 8 قىلمىستىق ءىس قوزعالعان.
بريفينگ بارىسىندا ەلىمىزدەگى ەسىرتكى قىلمىسىنا قارسى ءىس-شارالار ناتيجەلەرىنە كەڭىنەن توقتالعان سپيكەر «رەفلەكس» جانە «قاراسورا» جەدەل وپەراتسيالارىنىڭ قورىتىندىلارىمەن دە تانىستىردى. سينتەتيكالىق ەسىرتكىلەردى ءوندىرۋ جانە وتكىزۋ فاكتىلەرىن انىقتاۋعا باعىتتالعان «رەفلەكس» وپەراتسياسى جەلتوقسانعا دەيىن جالعاسادى. ب.نۇرعاليەۆتىڭ مالىمدەۋىنشە, جەدەل ءىس-شارانىڭ العاشقى اپتاسىندا-اق سينتەتيكالىق ەسىرتكىلەردىڭ زاڭسىز اينالىمىنا قاتىستى 6 قىلمىس انىقتالىپ, شامامەن 1 كيلوگرامم ەسىرتكى تاركىلەنگەن. ال ءبىر كيلو «سينتەتيكا» ءۇش مىڭ دوزاعا تەڭ.
«قاراسورا» – جابايى سورانىڭ ءپىسىپ-جەتىلۋ كەزىندە ەلىمىزدە جىل سايىن وتكىزىلەتىن ارنايى وپەراتسيا. بيىل رەسپۋبليكالىق وپەراتسيا اياسىندا 851 ەسىرتكى قىلمىسى, ونىڭ ىشىندە 416 وتكىزۋ, 126 ەسىرتكى ساقتاۋ, قۇرامىندا ەسىرتكى بار وسىمدىكتەردى ءوسىرۋدىڭ 233 فاكتىسى انىقتالعان. تاركىلەنگەن 10 توننادان استام ەسىرتكى زاتتارىنىڭ ىشىندە 8,5 توننا ماريحۋانا, 65,6 كگ گاشيش, 60,2 كگ سينتەتيكالىق ەسىرتكى, 764 گرامم گەروين بار. ءىىم وكىلى «قاراسورا» كەزىندە جالپى سالماعى 8 توننا سورانىڭ 12,9 مىڭنان استام بۇتاسى تابىلىپ, جويىلعانىن دا حابارلادى.