قارقارالىدا مەديتسينالىق كومەك كورسەتۋ اياسى كەڭەيدى. مۇندا مەملەكەتتىك-جەكەمەنشىك سەرىكتەستىك بويىنشا اشىلعان گەمودياليز ورتالىعى جۇمىس ىستەي باستادى, دەپ حابارلايدى Egemen.kz.
ەندى سوزىلمالى بۇيرەك اۋرۋى بار ناۋقاستارعا وبلىس ورتالىعىنا نەمەسە باسقا قالالارعا بارۋدىڭ قاجەتى جوق. ورتالىق زاماناۋي جابدىقتارمەن جابدىقتالعان. ونىڭ قۋاتى كۇنىنە 10 ادامعا دەيىن قابىلداۋعا مۇمكىندىك بەرەدى. ال اۋداندا گەمودياليزگە مۇقتاج بۇيرەك اۋرۋى بار بەس پاتسيەنت ەسەپتە تۇر.
«كۇيەۋىم بىرنەشە جىلدان بەرى اۋىرىپ كەلەدى, وتكەن جىلدان باستاپ وعان گەمودياليزدى تۇراقتى الۋ كەرەكتىگى بەلگىلى بولدى. قاراعاندىعا ۇنەمى بارۋعا تۋرا كەلدى. بۇل قالتامىزدى قاعادى. قارقارالىدا وسىنداي ورتالىقتىڭ اشىلۋى – تۇراقتى ەمدەلۋدى قاجەت ەتەتىندەر ءۇشىن ۇلكەن قۋانىش», دەيدى قالا تۇرعىنى قالامقاس تولەۋحانوۆا.