ەلوردادا قورعانىس ءمينيسترى, گەنەرال-لەيتەنانت مۇرات بەكتانوۆ قازاقستانداعى ءۇندىستان رەسپۋبليكاسىنىڭ توتەنشە جانە ۋاكىلەتتى ەلشىسى شۋبحدارشيني تريپاتحيمەن جانە ءۇندىستاننىڭ اسكەري اتتاشەسى پولكوۆنيك ميلان نالاۆادەمەن كەزدەستى, دەپ جازادى Egemen.kz.
كەزدەسۋ بارىسىندا تاراپتار ءوزارا قىزىعۋشىلىق تۋدىرعان وزەكتى ماسەلەلەردى تالقىلادى.
اسكەري ءبىلىم بەرۋ, جاۋىنگەرلىك دايارلىق پەن بىتىمگەرشىلىك اۋقىمىنداعى ىنتىماقتاستىق پەرسپەكتيۆالارى قارالدى. قورعانىس ۆەدومستۆوسىنىڭ باسشىلىعى ءۇندىستان اسكەري اتتاشەسىنىڭ قازاقستانداعى بىتىمگەرشىلىك ميسسياسىن دامىتۋعا قوسقان ۇلەسىن اتاپ ءوتتى. ولاردىڭ جۇرگىزىپ وتىرعان جۇمىسىنىڭ ارقاسىندا «ليۆانداعى بۇۇ-نىڭ ۋاقىتشا كۇشتەرى» ميسسياسىنا قازاقستاندىق بىتىمگەرشىلىك روتاسىنىڭ ءۇندى باتالونى قۇرامىندا قاتىسۋى تۋرالى ۋاعدالاستىققا قول جەتكىزىلدى.
پولكوۆنيك ميلان نالاۆادەنىڭ 2017 جىلدان بەرى جالعاسىپ كەلە جاتقان قازاقستانداعى ميسسياسى وسى جىلدىڭ قازان ايىندا اياقتالادى.
ايتا كەتسەك, بيىلعى جىلدىڭ ماۋسىمىندا قر قم بىتىمگەرشىلىك دايارلىق ورتالىعىنا بارعان ءۇندى تاراپى وسى ورتالىقتى دامىتۋ اياسىنداعى ءوزارا ءىس-قيمىلدى نىعايتۋعا دايىن ەكەنىن جەتكىزدى.