الماتىدا «مەملەكەتتىك قىزمەتتىڭ پەرسونالىن باسقارۋدى جەتىلدىرۋدىڭ باسىمدىقتارى» تاقىرىبىندا عىلىمي-ءتاجىريبەلىك سەمينار ءوتتى.
وعان مەملەكەتتىك ورگانداردىڭ پەرسونالدى باسقارۋ قىزمەتتەرىنىڭ (كادرلىق قىزمەتتەردىڭ) باسشىلارى, الماتى قالاسى جانە الماتى وبلىسى بويىنشا ورتالىق ورگانداردىڭ اۋماقتىق بولىمشەلەرىنىڭ وكىلدەرى, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ, حالىقارالىق بيزنەس اكادەمياسىنىڭ, ءبىلىم جانە عىلىم مينيسترلىگىنىڭ وكىلدەرى قاتىستى.
جاڭا جاعدايلاردا مەملەكەتتىك قىزمەتتىڭ پەرسونالىن باسقارۋ جۇيەسىن جەتىلدىرۋ تۋرالى باياندامامەن مەملەكەتتىك قىزمەت ىستەرى اگەنتتىگىنىڭ مەملەكەتتىك قىزمەتتىڭ پەرسونالىن باسقارۋ ءبولىمى مەڭگەرۋشىسىنىڭ ورىنباسارى الما قۇلجامبەكوۆا ءسوز سويلەدى.
سەمينار جۇمىسىنا, سونىمەن قاتار, شەتەلدىك ساراپشى – قازاق-نەمىس ۋنيۆەرسيتەتىنىڭ دەكانى, گەرمانيالىق پروفەسسور بودو لوحمان قاتىستى. ول گەرمانيانىڭ مەملەكەتتىك قىزمەتتىڭ پەرسونالىن باسقارۋ بويىنشا تاجىريبەسى تۋرالى ايتىپ بەردى.
سەميناردىڭ ماقساتى «قازاقستان-2050» ستراتەگياسىندا قويىلعان مىندەتتەرمەن, قازاقستان پرەزيدەنتىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىمەن, سونىمەن قاتار, قازاقستان رەسپۋبليكاسىنىڭ مەملەكەتتىك قىزمەت تۋرالى جاڭا زاڭناماسىمەن انىقتالدى.
پرەزيدەنتتىڭ قازاقستان حالقىنا ارناعان بيىلعى جولداۋىندا ەلدىڭ مەملەكەتتىك كادرلىق ساياساتىن ارى قاراي جەتىلدىرۋدىڭ ماڭىزدى باعىتتارى ايقىندالدى.
2013 جىلى اۋىلدىق وكرۋگتەردىڭ, اۋداندىق ماڭىزى بار قالالاردىڭ, اۋىلداردىڭ, سەلولاردىڭ اكىمدەرىن سايلاۋ ءوتتى, ولاردىڭ قىزمەتتەرى مەن شتاتتارى ءبىرشاما كەڭەيىپ, وكىلەتتىلىكتەرى وزگەردى. ەندى ورتالىق مەملەكەتتىك ورگانداردىڭ اۋداندىق, قالالىق جانە اۋماقتىق بولىمشەلەرى دەڭگەيىندە بىرىڭعاي كادرلىق قىزمەتتەر قۇرىلدى. بۇدان بۇرىن اۋداندىق جانە اۋىلدىق دەڭگەيدە 5 مىڭداي ادام نەگىزگى قىزمەتىن «كادرشى» مىندەتتەرىن ورىنداۋمەن بىرگە اتقاردى.
بۇگىنگى كۇنى قالالاردا جانە اۋدانداردا كادرلىق جۇمىستى جۇيەلەندىرۋ ءۇشىن بىرىڭعاي پەرسونالدى باسقارۋ قىزمەتتەرى قۇرىلعان, ولاردىڭ جالپى شتاتتىق سانى – 515 ادام.
جاڭا زاڭنامامەن مەملەكەتتىك قىزمەت سالاسىندا تالىمگەرلىك, روتاتسيا, تاعىلىمداما, مەملەكەتتىك قىزمەتشىلەردىڭ جۇمىس ساپاسىن باعالاۋ مەن مانسابىن جوسپارلاۋ جانە باسقا دا ينستيتۋتتار قاراستىرىلعان.
سەمينار سەكتسياسىنىڭ جۇمىسى بارىسىندا تاقىرىپتىق ماسەلەلەردى تالقىلاۋ بويىنشا كىشى توپتاردا جۇمىستار جۇرگىزىلدى. كىشى توپتار مودەراتورلارىنىڭ پرەزەنتاتسيالارى ناتيجەلەرى بويىنشا مەملەكەتتىك ورگاندار, اۋداندار جانە وبلىستار دەڭگەيىندە مەملەكەتتىك قىزمەتتىڭ پەرسونالىن باسقارۋدى جەتىلدىرۋ بويىنشا ۇسىنىستار مەن تاجىريبەلىك شارالار دايىندالدى.
«ەگەمەن-اقپارات».