– بۇل داۋىردە ءوز ءتىلىن, ادەبيەتىن بىلمەگەن, قادىرلەمەگەن ادام تولىق ءماندى ينتەلليگەنت ەمەس دەۋگە بولادى. سەبەبى, ول قاندايلىق ءبىلىمى بولسا دا, رۋحاني, وي تاربيەسىندە سىڭارجاق ازامات بولادى, – دەپ م.اۋەزوۆ ايتقانداي, ءتىل – رۋحى بيىك, ماڭگىلىك وشپەس مۇرا بولىپ قالۋى ءتيىس. مەيلى دارىگەر, مەيلى كاسىپكەر, ءتىپتى, شاحتەر بولسا دا, ءوزىنىڭ تۋعان ءتىلى – انا ءتىلىن جەتىك ءبىلۋى قاجەت. سەبەبى, ءتىل – ءبىزدىڭ تاعدىرىمىز, ءتىل – ەلدىڭ تاعدىرى.
ءار ەلدىڭ وزىنە ءتان, حالقىنا ورتاق ءتىلى بار. سول سياقتى ءبىزدىڭ انا ءتىلىمىز – قازاق ءتىلى. تىلدىك رۋحاني بايلىقتى دامىتۋ – بىزگە قويىلعان مىندەت. قازىرگى تاڭدا سول مىندەت ازدى-كوپتى دەڭگەيدە جۇزەگە اسىرىلىپ جاتىر. بىراق ءالى دە كۇشىنە تولىق ەنە قويعان جوق. ارينە, ول ءبىر كۇندە ىسكە اساتىن نارسە ەمەس. جۇزەگە اسۋى ءۇشىن كوپ ەڭبەكتەنۋ كەرەك. قازاق ماڭگۇرتتىكتەن قۇتىلامىن دەسە, ەڭ الدىمەن ءتىل ساياساتىن جانداندىرۋى كەرەك. ءتىل ساياساتىن مۇلدە ويلاۋ ەلەگىنەن تىس قالدىراتىن بولساق, ماڭگىلىك «شالا قازاق» بولىپ قالۋىمىز دا عاجاپ ەمەس.
تالاي قيىندىقتى كورگەن انا ءتىلىمىزدى ساقتاپ, ءارى قاراي دامىتۋ مىنا ءبىزدىڭ قولىمىزدا. ەلىمىز جيىرما ەكى جىلدىڭ ىشىندە تالاي بيىكتەر مەن بەلەستەردى باعىندىردى. بۇل – ازداعان ۋاقىت ىشىندەگى كولەمدى جەتىستىك. ال ءتىلىمىز جايلى اۋىز تولتىرا ەشتەڭە ايتا المايمىز. قاراپايىم قازاقتىڭ بالالارى ءبىر-بىرىمەن سارناپ ورىسشا سويلەسكەندە, قاراداي قارنىڭ اشادى. سول جاستار ءتىلىمىزدىڭ تاعدىرى بولاشاق ەلىمىزدىڭ تاعدىرى ەكەنىن بىلمەيتىن دە شىعار-اۋ, ءسىرا؟!
ءتىل – قاي ۇلتتىڭ بولماسىن تىرەگى, ەلىمىزدىڭ بولاشاعى. دارىندى دراماتۋرگ, اقىن جۇسىپبەك ايماۋىتوۆ اتامىز: «انا ءتىلى – حالىق بولىپ جاساعاننان بەرى جان دۇنيەمىزدىڭ ايناسى, ءوسىپ-ءونىپ تۇرلەنە بەرەتىن, ءماڭگى قۇلامايتىن ءبايتەرەگى», دەگەندەي, ءتىل تاعدىرى – ەل تاعدىرى ەكەنىن استە جادىمىزدان شىعارمايىق. تىلگە قۇرمەت – ەلگە قۇرمەت ەكەنىن دە ۇمىتپايىق.
ەرنار مامىربەكوۆ,
№45 بەيىمدەلگەن ورتا مەكتەبىنىڭ
11-سىنىپ وقۋشىسى.