مەملەكەت باسشىسى نۇرسۇلتان نازارباەۆ نيدەرلاند كورولدىگىنىڭ سىرتقى ىستەر ءمينيسترى فرانس تيممەرمانسپەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
كەزدەسۋ بارىسىندا ءتۇرلى سالالارداعى ەكىجاقتى ىنتىماقتاستىقتى نىعايتۋ ماسەلەلەرى قارالدى. اتاپ ايتقاندا, ساۋدا-ەكونوميكالىق جانە ينۆەستيتسيالىق سالالارداعى ءوزارا ىقپالداستىق اياسىن كەڭەيتۋگە ەرەكشە نازار اۋدارىلدى. حالىقارالىق كۇن تارتىبىندەگى وزەكتى ماسەلەلەر دە تالقىلاندى.
مەملەكەت باسشىسى سىرتقى ىستەر ءمينيسترىنىڭ قازاقستانعا رەسمي ساپارىنا ريزاشىلىعىن ءبىلدىردى.
– نيدەرلاند – قازاقستان ەكونوميكاسىنا ءىرى ينۆەستيتسيا سالۋشى ءارى ەۋروپا ەلدەرى اراسىنداعى ساۋدا-ەكونوميكالىق سەرىكتەسىمىز. ءبىز ەكىجاقتى قارىم-قاتىناستاردى دامىتۋعا مۇددەلىمىز. بۇل ساپار مەملەكەتتەرىمىز ءۇشىن ماڭىزدى بولىپ سانالادى, – دەدى نۇرسۇلتان نازارباەۆ.
سىرتقى ىستەر ءمينيسترى كەزدەسۋدىڭ وتۋىنە جاسالعان مۇمكىندىك ءۇشىن العىسىن ايتتى.
– العاشقى رەسمي ساپارداعى مىندەتىم – گااگادا وتەتىن يادرولىق قاۋىپسىزدىك جونىندەگى سامميتكە قاتىسۋ ءۇشىن نيدەرلاند كورولىنىڭ ءبىزدىڭ ەلگە كەلۋ جونىندەگى شاقىرۋىن جەتكىزۋ. سونداي-اق, پرەمەر-مينيسترمەن ەكىجاقتى كەزدەسۋلەر جوسپارلانعان. ءبىز تەڭىزگە شىعاتىن جانە پورتتىق ينفراقۇرىلىمدارى دامىعان ەل, ال قازاقستان وراسان الەۋەتى بار ەل رەتىندە كۇش-جىگەر بىرىكتىرىپ, زور ناتيجەگە جەتەمىز دەپ سانايمىز, – دەدى ف.تيممەرمانس.
سىرتقى ساياسات ۆەدومستۆوسىنىڭ باسشىسى قازاقستاننىڭ الەمدەگى ەڭ دامىعان 30 ەلدىڭ قاتارىنا كىرۋ تۋرالى جوسپارىن ىسكە اسىرۋعا نيدەرلاندتىڭ اتسالىسۋ نيەتى بارىن اتاپ ءوتتى.
گااگادا وتەتىن الداعى يادرولىق قاۋىپسىزدىك جونىندەگى سامميتكە قاتىستى ف.تيممەرمانس يادرولىق قارۋ سالدارىنان بولاتىن قاسىرەتتەر تۋرالى قازاقستان وزگە ەلدەردىڭ بارىنەن دە جاقسى بىلەتىنىنە توقتالدى.
– سەمەي پوليگونى اۋماعىندا يادرولىق سىناقتار جۇرگىزىلىپ, ونىڭ زارداپتارىمەن ۇزاق جىلدار بويى كۇرەسۋگە تۋرا كەلدى. قازاقستان بۇل شارانىڭ قانشالىقتى شىعىن اكەلەتىنىن بىلەدى. سوندىقتان بىزگە قاۋىپسىزدىكتىڭ بارلىق ماسەلەسىن ساقتاۋعا مۇمكىندىك بەرەتىن ءتيىمدى حالىقارالىق جۇيە قۇرۋ كەرەك. ونى ساقتاۋ ءۇشىن قازاقستان ۇستانىپ وتىرعان باعىتتى بارلىق ەل قولدايدى, – دەدى مينيستر.