قر پرەزيدەنتى قاسىم-جومارت توقاەۆ XVII ەۋرازيالىق مەديافورۋمعا قاتىسۋشىلاردى قۇتتىقتادى, دەپ جازادى Egemen.kz.
قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ فورۋمنىڭ اشىلۋى كەزىندە قاسىم-جومارت توقاەۆتىڭ قۇتتىقتاۋىن وقىدى.
«XVII ەۋرازيا مەديافورۋمىنا كەلگەندەرىڭىزگە قۋانىشتىمىن. 19 جىل ىشىندە ول ءبىزدىڭ ەلدەگى جانە بۇكىل ايماقتاعى جەتەكشى مەديا-پلاتفورماعا اينالدى. بۇل شارا ءداستۇرلى تۇردە تالانتتى جۋرناليستەر مەن مەديا مەنەدجەرلەردى, بەلگىلى ساياساتكەرلەر مەن بەدەلدى ساراپشىلاردى جينايدى. ال فورۋمدا تالقىلاناتىن ماسەلەلەر اۋقىمى بۇقارالىق اقپارات قۇرالدارىنىڭ شەڭبەرىنەن الدەقايدا كەڭ», دەپ جازىلعان قۇتتىقتاۋدا.
«جان-جاقتى جاھاندىق ترانسفورماتسيا, ىرگەلى وزگەرىستەر, الەۋمەتتىك پروتسەستەر كەزىندە ۋاقىت ىرعاعىنا ىلەسىپ, ەڭ وزەكتى ماسەلەلەردى اشىق تالقىلاۋ جانە شەشىمدەردى بىرگە تابۋ بۇرىنعىدان دا ماڭىزدى. كوروناۆيرۋس داعدارىسىنىڭ باستالۋىمەن بۇكىل الەمدە حالىقتىڭ ساپالى اقپاراتقا دەگەن سۇرانىسى ارتىپ, جالعاندىق اقپاراتپەن كۇرەسكە قاجەتتىلىك تۋىندادى. فورۋم وسى باعىتتاعى ۇردىستەر مەن تاسىلدەردى تالقىلاۋعا تاماشا مۇمكىندىك بەرەدى», دەپ اتاپ ءوتتى پرەزيدەنت.
قاسىم-جومارت توقاەۆتىڭ ايتۋىنشا, جاڭا شىندىق مەديا سالاسى ءۇشىن جاڭا مىندەتتەر قويادى. تسيفرلاندىرۋ پروتسەسى ەداۋىر جەدەلدەدى. اۋديتوريانىڭ قالاۋى مەن ادەتى تەز وزگەرۋدە, اقپاراتتى ۇسىنۋدىڭ جاڭا فورماتى پايدا بولۋدا, الەۋمەتتىك جەلىلەر ترانسفورماتسيالانىپ جاتىر.
«مەن بۇل ماسەلەنى كاسىبي تۇردە تالقىلاۋ بۇقارالىق اقپارات قۇرالدارىنىڭ دامۋىنا جاڭا سەرپىن بەرەتىنىنە سەنىمدىمىن. ەل تاۋەلسىزدىگىنىڭ 30 جىلدىعىنا ارنالعان سەسسيا دا باي بولاتىنىنا سەنىمدىمىن. ءبىرىزدى وزگەرىستەردىڭ قازاقستاندىق جولى مەن حالىق بىرلىگىن ساقتاۋدىڭ بىرەگەي تاجىريبەسى ەرەكشە نازار اۋدارۋعا لايىق. مەملەكەتىمىزدىڭ ستراتەگيالىق باعىتىنىڭ ماڭىزدى قۇرامداس بولىگى - اشىق ديالوگ پەن جان-جاقتى سەرىكتەستىك», دەدى مەملەكەت باسشىسى ءوزىنىڭ قۇتتىقتاۋىندا.
«وسىعان وراي, فورۋم قازىرگى زامانعى مەديا ترەندتەردى تۇسىنۋگە عانا ەمەس, سونىمەن قاتار حالىقارالىق فورماتتاعى ىنتىماقتاستىق كوكجيەگىن كەڭەيتۋگە ىقپال ەتەدى دەپ ايتۋعا بولادى. قازاقستان ارقاشان كونسترۋكتيۆتى كۇن ءتارتىبىن ىلگەرىلەتۋگە مۇددەلى جانە بارلىق سالادا, سونىڭ ىشىندە بۇقارالىق اقپارات قۇرالدارى مەن شىعارماشىلىق يندۋستريادا بىرلەسكەن جوبالاردى جۇزەگە اسىرۋعا دايىن», دەپ قورىتىندىلاعان قاسىم-جومارت توقاەۆ مەديافورۋم قاتىسۋشىلارىنا جەمىستى جۇمىس پەن ساتتىلىك تىلەدى.