ەگيپەتتە 4500 جىل بۇرىن ءومىر سۇرگەن پەرعاۋىن دجوسەردىڭ كونە قابىرى قالپىنا كەلتىرۋدەن كەيىن اشىلدى, دەپ حابارلايدى Egemen.kz AP-كە سىلتەمە جاساپ.
دجوسەر پيراميداسى جەرلەۋ كەشەنىنىڭ ورنىنداعى وڭتۇستىك قابىر دەپ اتالاتىن قۇرىلىم نەگىزىنەن جەر استىندا ورنالاسقان. وعان كىرەتىن دالىزدەر ءلابيرينتى يەروگليفتەر مەن پليتكالارمەن بەزەندىرىلگەن. ورتالىق جەرلەۋ بىلىگىندە مىسىردىڭ ءۇشىنشى اۋلەتى كەزىنەن گرانيتپەن قاپتالعان ساركوفاگ بار. الايدا, شىن مانىندە, فاراون ول جەردە ەمەس, جاقىن ماڭداعى ساككاراداعى ايگىلى ستەپ پيراميداسىندا جەرلەنگەن.
بۇل ەكى عيمارات ەلدەگى ەڭ باي ارحەولوگيالىق ەسكەرتكىشتەردىڭ ءبىرى كاير ماڭىنداعى ساككارا كەشەنىنىڭ ءبىر بولىگىن قۇرايدى. يۋنەسكو مالىمەتتەرى بويىنشا, پيراميدا - ەجەلگى الەمدەگى مونۋمەنتالدى ساۋلەت ونەرىنىڭ العاشقى ۇلگىلەرىنىڭ ءبىرى جانە ەڭ كونە پيراميدا. ول گيزاداعى پيراميدالاردىڭ قۇرىلىسىنا باستاۋ بولعان دەپ سانالادى.
مىسىردىڭ تۋريزم مينيسترلىگى بۇل اپتادا قابىردىڭ اشىلۋى 2006 جىلى باستالعان قالپىنا كەلتىرۋ جۇمىستارىنىڭ اياقتالعانىن بىلدىرەتىنىن ايتتى. قابىر سەيسەنبىدە اشىلدى.
وڭتۇستىك قابىردەن باسقا, ساككارا ۇستىرتىندە كەمىندە 11 پيراميدا بار.