الماتى قالاسىنداعى ۇلتتىق كىتاپحانادا قۋعىن-سۇرگىنگە ۇشىراعاندار جونىندەگى مەملەكەتتىك جانە وڭىرلىك كوميسسيا جۇمىس توپتارىنىڭ باسىن قوسقان سەمينار ءوتتى. Zoom قوسىمشاسى ارقىلى ونلاين فورماتتا ۇيىمداستىرىلعان كەزدەسۋدە الماتى, شىمكەنت قالالارى, الماتى, جامبىل, قىزىلوردا جانە تۇركىستان وبىستارى بويىنشا جۇمىس توپتارىنىڭ جەتەكشىلەرى بايانداما جاساپ, بەلگىلى عالىمدار ءسوز سويلەدى.
باسقوسۋ بارىسىندا قۋعىن-سۇرگىنگە ۇشىراعان, سوت ورگاندارى اقتاعان تۇلعالارعا قاتىستى مۇراعاتتىق قىلمىستىق ىستەردى جيناقتاۋ, اقتاۋعا جاتپايتىن ازاماتتارعا قاتىستى دەرەكتەردى تەكسەرۋ, باسقا وڭىرلەرگە جەر اۋدارىلعاندار جونىندە مالىمەتتەرمەن الماسۋ سەكىلدى ماڭىزدى ماسەلەلەر تالقىلاندى. اتاپ ايتقاندا, جۇمىس توبىنىڭ جەتەكشىلەرى جيىن بارىسىندا 372 كوتەرىلىستى باسۋ بارىسىندا سوتسىز جانە تەرگەۋسىز اتىلىپ كەتكەن, سونداي-اق وسى كوتەرىلىستەرگە قاتىسقانى جانە قولداعانى ءۇشىن قۋعىن-سۇرگىنگە ۇشىراعان ساياسي قۋعىن-سۇرگىن قۇرباندارى تۋرالى اقپاراتتاردى انىقتاۋ كەزىندە تۋىنداپ وتىرعان كەدەرگىلەر جايلى مالىمدەپ, ماتەريالدار جيناۋ كەزىندە جۇمىس تاجىريبەسىمەن الماسۋدىڭ ماڭىزدىلىعى جونىندە وي-پىكىرلەرىن ورتاعا سالدى.
سەميناردا ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ مۇشەسى سابىر قاسىموۆ, الماتى قالاسى اكىمىنىڭ ورىنباسارى, ساياسي قۋعىن-سۇرگىن قۇرباندارىن اقتاۋ جونىندەگى قالالىق كوميسسيانىڭ توراعاسى ەرجان باباقۇماروۆ ارنايى قۇرىلعان كوميسسيانىڭ وسى ۋاقىتقا دەيىن اتقارعان جۇمىستارىنا ەگجەي-تەگجەيلى توقتالسا, مەملەكەتتىك كوميسسيا جۇمىس توبىنىڭ جەتەكشىسى, تاريح عىلىمدارىنىڭ دوكتورى, ۇعا قۇرمەتتى اكادەميگى تالاس وماربەكوۆ جۇمىس توبى قۇرامىنا ەنگەن عالىمداردىڭ قۇپيا قۇجاتتارمەن جۇمىس جۇرگىزۋ كەزىندە انىقتاعان تىڭ دەرەكتەرىنە توقتالا كەلىپ, 1929-1931 جىلدارى قازاقستاندا 372 رەت شارۋالاردىڭ بۇقارالىق باس كوتەرۋلەرى بولعانى جونىندە تاريحي مالىمەتتەردى قايتا جاڭعىرتتى.
الماتى قالالىق كوميسسياسى جۇمىس توبىنىڭ جەتەكشىسى شولپان زابيح وسى كۇنگە دەيىن اقتالماعان بىرقاتار كوتەرىلىسكە قاتىسۋشىلاردىڭ انىقتالعانىن ايتسا, تۇركىستان وبلىسى بويىنشا جۇمىس توبىنىڭ جەتەكشىسى, تاريح عىلىمدارىنىڭ دوكتورى حازرەتالى تۇرسىن كەڭەس وكىمەتىنىڭ اۋىلشارۋاشىلىق رەفورمالارى كەزىندەگى ساياسي قۋعىنداۋ ساياساتىنىڭ سالدارلارىنا توقتالدى. ال 1928-1933 جىلدارداعى جەتىسۋ وڭىرىندەگى شارۋا كوتەرىلىستەرىنىڭ سەبەپ-سالدارى مەن ەرەكشەلىكتەرىنە ساراپتاما جاساعان الماتى وبلىستىق كوميسسياسى جۇمىس توبىنىڭ جەتەكشىسى ەركىن ستامشالوۆ بۇل ايماقتاعى شارۋالار كوتەرىلىستەرى اۋقىمى جاعىنان ۇلكەن ءارى الەۋمەتتىك تۇرعىدان كۇردەلى ەكەنىن اتاپ ءوتتى.
ءۇش ساعاتقا سوزىلعان سەمينار جۇمىسىنىڭ سوڭىندا قاتىسۋشىلار مالىمەتتەرمەن الماسۋ, بىرلەسىپ جۇمىس ىستەۋ جانە الداعى اتقارىلاتىن جۇمىستا ارىپتەستىك قولداۋ كورسەتۋ, تەحنيكالىق جاراقتاندىرۋدى جەتىلدىرۋگە قاتىستى ويلارىن ورتاعا سالىپ, ناقتى ۇسىنىستارىن ءبىلدىردى.