ىشكى ىستەر ورگاندارى قىزمەتكەرلەرىنىڭ اراسىندا بيىل 11 جىل قاتارىنان ۇيىمداستىرىلعان «پاراساتتى پوليتسەي» رەسپۋبليكالىق بايقاۋى مارەسىنە جەتتى. بايقاۋدا نۇر-سۇلتان, الماتى, شىمكەنت قالالارى, وبلىستار جانە كولىكتەگى پوليتسيا دەپارتامەنتتەرى قىزمەتكەرلەرىنەن, ونىڭ ىشىندە وزگە ەتنوس وكىلدەرى بار 17 كوماندا باق سىناستى.
ەل تاۋەلسىزدىگىنىڭ 30 جىلدىعى مەن قازاقستان حالقى تىلدەرى كۇنىن مەرەكەلەۋ اياسىندا وتكەن بيىلعى بايقاۋدىڭ باس جۇلدەسىن نۇر-سۇلتان قالاسىنىڭ پوليتسيا دەپارتامەنتى جەڭىپ السا, ءبىرىنشى ورىنعا باتىس قازاقستان ءوڭىرىنىڭ نامىسىن قولدان بەرمەگەن پوليتسەيلەر كومانداسى تابان تىرەدى. ال جۇلدەلى ەكىنشى ورىندى الماتى مەن قوستاناي وبلىستارىنىڭ كوماندالارى ءوزارا ءبولىسىپ, 3-ورىن اقمولا مەن تۇركىستان وبلىستارىنىڭ پد جانە كولىكتەگى پد-ءنىڭ ەنشىسىنە ءتيدى. ءداستۇرلى سايىسقا قازىلىق جاساعان القا مۇشەسىنىڭ ءبىرى ىشكى ىستەر ورگاندارى جانە ۇلتتىق ۇلان قازاقستاندىق ارداگەرلەر ۇيىمىنىڭ ارداگەرى سلانقوجا قاراقىستىق ىشكى ىستەر ورگاندارى قىزمەتكەرلەرى اراسىندا مەملەكەتتىك ءتىلدى كەڭىنەن ناسيحاتتاۋدا «پاراساتتى پوليتسەي» سايىسىنىڭ الار ورنى ەرەكشە ەكەنىن اتاپ ءوتتى.
پاندەمياعا بايلانىستى بيىل بايقاۋ ونلاين فورماتتا وتكىزىلگەن. ال ىشكى ىستەر ورگاندارى اراسىندا كەڭىنەن تانىمال سايىستىڭ باستى كوزدەگەنى – ءتارتىپ ساقشىلارى اراسىندا مەملەكەتتىك ءتىلدىڭ مارتەبەسى مەن ماڭىزىن ارتتىرۋ, قولدانىسىن كەڭەيتۋ بولىپ سانالادى. «پوليتسيا قىزمەتكەرلەرىنىڭ مەملەكەتتىك تىلگە, ەلىنە, وتانىنا دەگەن قۇرمەتىن ارتتىرۋ, تىلدىك ورتانى قالىپتاستىرۋ, سونداي-اق, ءتىل مادەنيەتىنە تاربيەلەۋدە دە بايقاۋدىڭ الار ورنى ەرەكشە. سول سەبەپتى دە بولار «پاراساتتى پوليتسەيگە» قاتىسۋ – ءار قىزمەتكەر ءۇشىن مارتەبە», دەيدى ءىس-شاراعا مۇرىندىق بولىپ جۇرگەن ءىىم يدەولوگيالىق جانە يميدجدىك جۇمىس دەپارتامەنتىنىڭ باسشىسى البينا ماحامبەتوۆا.