سوچيدە وتەتىن وليمپيا ويىندارى كەزىندە اقش قارۋلى كۇشتەرىنىڭ ەكى اسكەري كورابلى قارا تەڭىز اۋماعىندا كۇزەتكە تۇرىپ, شۇعىل جاعدايلار ورىن الا قالسا, بىردەن ارالاسا كەتەدى. بۇل تۋرالى Ras.kz حابارلادى.
پەنتاگوننىڭ رەسمي وكىلى كونتر-ادميرال دجون كەربيدىڭ ايتۋىنشا, قارا تەڭىز بويىن بويلاپ جۇزەتىن اقش اسكەري كورابلدەرى مەن گەرمانيادا تۇرعان ۇشاقتارى قاجەتتىلىك تۋعان جاعدايدا, سوچيدەگى امەريكالىقتاردى قاتەر قۇرساۋىنان الىپ شىعادى. CNN تەلەكومپانياسى ۇشاقتاردىڭ سوچيگە ەكى ساعاتتىڭ ىشىندە جەتىپ كەلە الاتىنىن, بىراق مۇنداي وپەراتسيالار ءۇشىن مىندەتتى تۇردە رەسەيلىكتەر تاراپىنان رۇقسات سۇرالاتىنىن مالىمدەدى.
دجون كەربيدىڭ سوزىنە قاراعاندا, «قۇراما شتاتتار رەسەي ۇكىمەتىنە قىسقى وليمپيادانى وتكىزۋگە دايىندىق كەزىندە ءوزىنىڭ جان-جاقتى قولداۋىنا سۇيەنۋدى ۇسىنعان بولاتىن». «ەگەر رەسەي ۇكىمەتىمەن كونسۋلتاتسيا جۇرگىزۋ بارىسىندا الدەقانداي توتەنشە تۋىنداعان جاعدايلارعا بايلانىستى جاردەم كەرەك ەتىلسە, ءبىز كۇشىمىزبەن جانە قارا تەڭىزدە جۇرگەن ەكى كەمەمىزبەن بىرگە, باسقا دا اسكەري-اۋە, اسكەري-تەڭىز قۇرالدارىمىزدى ىسكە قوسۋعا دايىنبىز», – دەدى ول.
بۇدان بۇرىن پەنتاگوننىڭ باسشىسى چاك حەيگەل ەگەر سوچي وليمپياداسىن وتكىزۋ كەزەڭىندە رەسەيلىكتەر جاعىنان قاۋىپسىزدىكتى قامتاماسىز ەتۋگە بايلانىستى ءوتىنىش بولىپ جاتسا, وعان قول ۇشىن بەرۋگە ءازىر ەكەندەرىن مالىمدەگەن بولاتىن.
قاڭتاردىڭ 19-ى كۇنى رەسەيدىڭ پرەزيدەنتى ۆلاديمير پۋتين سوچيدەگى ويىندار قاۋىپسىزدىگىن ساقتاۋدىڭ وتە ماڭىزدى دا جاۋاپتى ماسەلە ەكەنىن ايتتى. ول وسىدان كەيىن قارا تەڭىز جاعاسىنداعى قالاعا كەلىپ, مۇنداعى جاعدايمەن تانىستى. ازىرگە قاۋىپ شاقىراتىنداي دابىلدى احۋال جوق.
ايدار ورىسباەۆ.
دەرەككوز: Ras.kz
فوتو: Rg.ru