قىرعىز بەن قىتاي شەكاراسىندا قارۋلى قاقتىعىس ورىن الدى. بۇل تۋرالى 24.kz حابارلادى.
قىرعىز رەسپۋبليكاسى مەملەكەتتىك شەكارا قىزمەتىنىڭ مالىمدەۋىنشە, اتىس قىرعىز اسكەريلەرى مەن بەلگىسىز توپتىڭ اراسىندا بولعان. 11 ادامنان تۇراتىن قارۋلى توپ شەكاراشىلارمەن قاقتىعىسپاس بۇرىن, ىستىقكولدىڭ اڭ شارۋاشىلىعى قىزمەتكەرىن ءولتىرىپ, ونىڭ قارۋ-جاراقتارىن الىپ كەتكەن ەكەن. قاقتىعىس كەزىندە قارۋلى توپتان ەكى ادام قازا تاپتى. اسكەريلەر اراسىندا زارداپ شەككەندەر جوق. وقيعا ورنىنا قىرعىز شەكارا جاساعىنىڭ جەدەل ارەكەت ەتۋ توبى كەلىپ جەتىپ, قارۋلى توپتى قورشاۋعا الدى. قىرعىزستاننىڭ پرەمەر-ءمينيسترى «ەگەر ولار ءوز ەركىمەن بەرىلمەيتىن بولسا, بىردەن قارۋ قولدانۋ» جونىندە بۇيرىق بەردى.
ايدار ورىسباەۆ.
دەرەككوز: 24.kz
فوتو: Vesti.ru