قاسىم-جومارت توقاەۆ قازاقستانعا رەسمي ساپارمەن كەلگەن شۆەيتساريا كونفەدەراتسياسى فەدەرالدى جينالىسىنىڭ ۇلتتىق كەڭەسىنىڭ (تومەنگى پالاتاسىنىڭ) توراعاسى اندرەاس ەبيدى قابىلدادى, دەپ جازادى Egemen.kz اقورداعا سىلتەمە جاساپ.
مەملەكەت باسشىسى شۆەيتساريانى قازاقستاننىڭ ەۋروپاداعى ماڭىزدى سەرىكتەستەرىنىڭ ءبىرى ەكەنىن ايتا وتىرىپ, ولاردىڭ ونەركاسىپ, «جاسىل» ەكونوميكا, اۋىل شارۋاشىلىعى جانە قارجى سالاسىنداعى جوعارى يننوۆاتسيالىق الەۋەتىن اتاپ ءوتتى.
قازاقستان پرەزيدەنتى ءبىزدىڭ ەلدىڭ شيكىزاتتىق ەمەس سەكتورىنا شۆەيتساريا كاپيتالى مەن تەحنولوگيالارىن تارتا وتىرىپ, جاڭا ءىرى جوبالاردى ىسكە اسىرۋعا بەيىلدى ەكەنىن ءبىلدىرىلدى. مەملەكەت باسشىسىنىڭ ايتۋىنشا, بۇل قازاقستان ەكونوميكاسىنداعى شۆەيتساريالىق بيزنەستىڭ ونسىز دا بەرىك پوزيتسياسىن ودان ءارى نىعايتۋعا ىقپال ەتەدى.
شۆەيتساريا – 2005 جىلدان بەرى ەلىمىزدىڭ ەكونوميكاسىنا 27 ميلليارد دوللاردان استام ينۆەستيتسيا سالعان ەڭ ءىرى ءۇش ينۆەستورىنىڭ ءبىرى. ءبىزدىڭ ەلدە Glencore Xstrata, ABB, Philipp Morris, Rieter, Schindler, Bühler, Leica, Nestlé, Roche, Novartis, Syngenta, Ammann Group جانە باسقا دا ءىرى شۆەيتساريالىق كومپانيالار تابىستى جۇمىس ىستەيدى.
سونىمەن قاتار شۆەيتساريامەن اراداعى تاۋار اينالىمى بىلتىر 1,7 ميلليارد دوللارعا جەتىپ, جالپى ساۋدا سەكىرتەرىنىڭ اراسىندا 11-ءشى ورىنعا ىلىنگەن. مەملەكەت باسشىسى قازاقستان مەن شۆەيتساريا اراسىنداعى قارىم-قاتىناستاردىڭ تابىستى دامۋىنا ەكى ەلدىڭ تىعىز ساياسي بايلانىستارى ىقپال ەتەدى دەگەن پىكىرىن ءبىلدىردى. وسىعان بايلانىستى قاسىم-جومارت توقاەۆ جاقىندا شۆەيتساريا پرەزيدەنتى گاي پارمەلاندپەن مازمۇندى كەلىسسوزدەر وتكىزگەنىن اتاپ ءوتتى.
جەمىستى بايلانىستاردى جالعاستىرۋ ءۇشىن مەملەكەت باسشىسى كەلەسى كەزدەسۋدى بيىل قاراشا ايىنىڭ سوڭىندا وتكىزۋگە دايىن ەكەنىن ءبىلدىردى.
ءوز كەزەگىندە اندرەاس ەبي ەكىجاقتى ىنتىماقتاستىقتىڭ قازىرگى دامۋ دەڭگەيىن وڭ باعالاپ, ونى پارلامەنتارالىق بايلانىستار ارقىلى نىعايتۋعا سەپتەسۋگە دايىن ەكەنىن ءبىلدىردى. وسىعان بايلانىستى «قازاقستان - شۆەيتساريا» پارلامەنتارالىق ىنتىماقتاستىق توبىنىڭ جۇمىسىن جانداندىرۋ تۋرالى كەلىسىمگە قول جەتكىزىلدى.
اڭگىمەلەسۋشىلەر اۋعانستانداعى قازىرگى جاعدايعا ەرەكشە نازار اۋداردى. تاراپتار بۇل ماسەلە بويىنشا جان-جاقتى پىكىر الماسىپ, وسى ەلدەگى اسكەري-ساياسي جانە گۋمانيتارلىق جاعدايدىڭ شيەلەنىسۋىنە الاڭداۋشىلىق ءبىلدىردى.
قاسىم-جومارت توقاەۆ 26 تامىزدا كابۋل حالىقارالىق اۋەجايىندا لاڭكەستىك جاساعانداردى ايىپتاپ, تەرروريستىك قاۋىپكە قارسى تۇرۋ, اۋعانستانداعى جاعدايدى تۇراقتاندىرۋ, الەمدەگى جانە ورتالىق ازياداعى بەيبىتشىلىك پەن قاۋىپسىزدىكتى نىعايتۋ ءۇشىن عالامدىق قوعامداستىقتىڭ كۇش-جىگەرىن جۇمىلدىرۋ قاجەت دەگەن پىكىر ءبىلدىردى.