مەملەكەت باسشىسى قاسىم-جومارت توقاەۆ بەلگىلى جازۋشى, قوعام قايراتكەرى سۇلتان ءورازاليننىڭ وتباسى مەن جاقىن تۋىستارىنا كوڭىل ايتتى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي جازدى, دەپ حابارلايدى Egemen.kz.
«بەلگىلى جازۋشى, قازاقستاننىڭ ەڭبەك سىڭىرگەن قايراتكەرى, قازاق تەلەۆيزياسىنىڭ قۇرمەتتى ارداگەرى, حالىقارالىق تەلەۆيزيا جانە راديو اكادەمياسىنىڭ اكادەميگى سۇلتان ءورازاليننىڭ دۇنيەدەن وتۋىنە بايلانىستى كوڭىل ايتامىن.
سۇلتان ءشارىپ ۇلى وتاندىق تەلەارنادا جەمىستى جۇمىس جاساپ, ۇلتتىق قۇندىلىقتاردىڭ قايتا جاڭعىرىپ, كوگىلدىر ەكراندا ناسيحاتتالۋىنا مول ۇلەس قوستى. ساياسي-اكىمشىلىك قىزمەتتى دە ابىرويلى اتقاردى. اۆتورلىق قۇقىق, مەملەكەتتىك ءتىلدىڭ مارتەبەسىن ارتتىرۋ, ۇلتتىق ساياسات, تەرمينولوگيا مەن ونوماستيكا ماسەلەلەرىن كوتەرىپ, كوكەيكەستى ويلارى مەن ۇتىمدى باستامالارىن قوعام نازارىنا ۇسىندى. قارىمدى قالامگەر رەتىندە شىعارماشىلىق جولدا دا تابىستى ەڭبەك ەتتى.
ونەگەلى عۇمىر كەشىپ, سوڭىنا ادەبي مول مۇرا قالدىرعان سۇلتان ءشارىپ ۇلىنىڭ جارقىن بەينەسى ۇمىتىلمايدى.
مارقۇمنىڭ يمانى سالامات, جانى ءجانناتتا بولسىن», دەپ جازىلعان پرەزيدەنتتىڭ جەدەلحاتىندا.