بۇگىن 80 جاستان اسقان شاعىندا قازاق ونەرىنىڭ كورنەكتى تۇلعاسى, ءانشى, قازاقستاننىڭ ەڭبەك سىڭىرگەن ءارتيسى, پروفەسسور, ەلىمىزدە تۇڭعىش رەت «ەسترادالىق ۆوكال» كافەدراسىنىڭ نەگىزىن سالعان قايراتكەر ليۋتسيا تولەشوۆا ومىردەن ءوتتى, دەپ حابارلايدى Egemen.kz.
قارالى حاباردى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى اسحات ماەميروۆ ەستىرتتى.
«الەمدى جايلاعان ىندەتتەن قازاقتىڭ اياۋلى تۇلعاسى ليۋتسيا قاجىعاليقىزى دۇنيە سالدى. ماسكەۋدەگى گنەسيندەر اتىنداعى مۋزىكا اكادەمياسىن تامامداعان ليۋتسيا تولەشوۆا ءوزىنىڭ سانالى عۇمىرىن كاسىبي ەسترادا ونەرىنە ارنادى. سوڭعى دەمى ۇزىلگەنشە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «ەسترادالىق ۆوكال» كافەدراسىنىڭ پروفەسسورى بولىپ ەڭبەك ەتتى.
ليۋتسيا قاجىعاليقىزى ت.زابيروۆا, ب.شاداەۆا, س.مايعازيەۆ, ب.مۇحيتدينوۆا, گ.قاسپاقوۆا, م.ءمۇسىرالى, ج.ارىستانوۆا, ءا.كاريموۆ, ق.تۇنتەكوۆ, ب.قۇلعاراەۆ, د.كادەن, ب.رەتباەۆ, ت.ب. سەكىلدى شاكىرتتەر تاربيەلەگەن. جۇرەگى ونەر دەپ سوققان ليۋتسيا قاجىعاليقىزىمەن ءومىر مەن ونەر جولىندا ارىپتەس بولدىق, سىيلاستىق. ومىردە ەرەكشە قادىر تۇتقان ليۋتسيا قاجىعاليقىزىنىڭ وي-ارماندارى مەن ماقساتتارى كوپ ەدى... اجالعا نە شارا؟! وتباسىنا, تۋما-تۋىسقاندارى مەن ارىپتەستەرىنە, بارلىق شاكىرتتەرىنە قايعىرىپ كوڭىل ايتامىن», دەدى اسحات ماەميروۆ.